“ʻE Hoko Nai Ha Ngaahi Mana Maʻaku?,” Liahona, Fēpueli 2023.
Haʻu, ʻo Muimui ʻIate Au
ʻE Hoko Nai Ha Ngaahi Mana Maʻaku?
Naʻe fakahoko ʻe Kalaisi ha ngaahi mana lahi lolotonga ʻEne ngāue fakafaifekau ʻi he māmaní, hangē ko e taimi naʻá Ne liliu ai ʻa e vaí ko e uaine ʻi he kātoanga taʻane ʻi Kená (vakai, Sione 2:1–11). Hangē ko ia ʻoku tau vakai ki ai ʻi he Fuakava Foʻoú, kuo fakahoko maʻu pē ʻa e ngaahi maná ʻo fakafou ʻi he mālohi ʻo e lakanga fakataulaʻeikí mo e tuí.
Mahalo ʻe fifili ha niʻihi, ka te u maʻu fēfē ʻa e tui ʻe hoko ʻa e ngaahi maná maʻakú?
Naʻe akoʻi ʻe Palesiteni Lāsolo M. Nalesoni ʻo pehē: “Fai ʻa e ngāue fakalaumālié ke maʻu ai ʻa e ngaahi maná. Kole ʻi he faʻa lotu ki he ʻOtuá ke tokoniʻi koe ke ke fakaʻaongaʻi ʻa e faʻahinga tui ko iá” (“Ko e Mālohi ʻo e Ivi Fakalaumālié,” Liahona, Mē 2022, 100).
Ngaahi Tefitoʻi Moʻoni ʻOkú ne Puleʻi ʻa e Ngāue ʻo e Ngaahi Maná
Ko hotau ʻOtuá ko e ʻOtua ʻo e ngaahi mana: Sione 6:5–14; 1 Nīfai 17:51; 2 Nīfai 27:23; Molomona 9:15, 18–19
Tui mo falala ki he ʻEikí: Maʻake 4:36–41; Molomona 9:20–27; ʻEta 12:12, 18; Molonai 7:33
Mālohi ʻo e Lakanga Fakataulaʻeikí: ʻAlamā 23:6; Molomona 9:17–18