“ʻOkú Ke Fiemaʻu ʻa e Sākalamēnití?,” Liahona, Fēpueli 2023.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
ʻOkú Ke Fiemaʻu ʻa e Sākalamēnití?
ʻI hono passi atu ʻa e sākalamēnití kiate iá, naʻe ala atu ʻa e kiʻi tamasiʻí, tuʻu taimi siʻi, peá ne toe tuku hifo hono nimá.
Tā fakatātaaʻi ʻe Dilleen Marsh
Naʻe fakaafeʻi au ʻe ha taha ʻo hoku ngaahi kaungāmeʻa mamaé ke u ʻalu ki hono uōtí ʻi ha Sāpate ʻaukai ke kau ʻi hono fakahingoa mo tāpuakiʻi hono fohá. Hili e tāpuakí, naʻe hokosia e taimi ki he sākalamēnití.
Lolotonga hono tufaki ʻo e sākalamēnití ki he haʻofangá, naʻá ku fakatokangaʻi e fakafotu taʻu ono ʻo hoku kaungāmeʻá, ʻa ia ʻoku taimi nounou ʻa ʻene tokanga ki ha meʻá (ADHD). Naʻá ne lue holo ʻi mui ʻi he falelotú ka naʻe kamata ke ne feohi fakalongolongo mo ha taha ʻo e kau tangata matuʻotuʻa ange ne kau ʻi hono tufa ʻo e sākalamēnití.
ʻI heʻene taʻepauʻia pe naʻe ʻosi maʻu ʻe he kiʻi tamasiʻí ʻa e sākalamēnití pe ʻikaí, naʻe hapai fakalelei atu ʻe he tangatá ʻa e laulau sākalamēnití ki ai. Naʻe ala atu ʻa e kiʻi tamasiʻí, peá ne toe tuku hifo hono nimá. Ne hoko atu ki ha fetoumoliliuaki ne kiʻi faikehe ʻi he ngaahi sekoni hono hokó ʻi he toutou ala atu ʻa e kiʻi tamasiʻí mo tuku hifo hono nimá. Naʻe hangē naʻe ʻikai ke ne fakapapauʻi ʻa e meʻa ke faí. Naʻe tatali ʻi he faʻa kātaki ʻa e tangata matuʻotuʻa angé.
Faifai pea fehuʻi ange ʻe he kiʻi tamasiʻí, “ʻOkú ke fiemaʻu ke u maʻu e sākalamēnití?”
Naʻe tali ange ʻe he tangataʻeiki matuʻotuʻa angé, ʻi ha leʻo manavaʻofa, “ʻOkú ke fiemaʻu e sākalamēnití?”
Naʻe talaange ʻe he kiʻi tamasiʻí ʻio, pea ʻikai toe fakatuotuai, naʻá ne ala atu hono nimá ʻo toʻo ʻa e maá. ʻI hono tufa ʻe he tangatá ʻa e sākalamēnití ki he niʻihi kehé, naʻe foki ʻa e kiʻi tamasiʻí ki hono fāmilí ʻo tangutu ki lalo.
Naʻe akoʻi lahi au ʻe heʻeku manatu ki he fepōtalanoaʻaki ʻa e tangatá mo e kiʻi tamasiʻí fekauʻaki mo e founga ʻoku fengāueʻaki ai ʻa e Tamai Hēvaní mo kitautolu, ko ʻEne fānaú.
ʻOku ʻikai fakamālohiʻi kitautolu ʻe heʻetau Tamai ʻi Hēvaní ki ha faʻahinga meʻa, ka ʻokú Ne fakaafeʻi kitautolu ʻi he ʻofa mo e faʻa kātaki ke tau maʻu. Pea ʻokú Ne tuʻu mateuteu leva ke tāpuakiʻi kitautolu, pea ʻoku mafao mai maʻu pē Hono toʻukupu ʻofá kiate kitautolu. ʻI he taimi ʻoku tau fili ai ke kakapa atu kiate Iá, kuó Ne ʻosi ʻi ai, ʻo mateuteu ke foaki ʻEne ʻofá mo e ngaahi tāpuaki fakaofó kiate kitautolu.