“Ko Hoku Tāpuaki Maná,” Liahona, Fēpueli 2023.
Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko Hoku Tāpuaki Maná
ʻOku ou houngaʻia ʻi heʻeku ʻiloʻi ʻoku tatau e mālohi ʻo e lakanga fakataulaʻeikí ʻi he fonua kotoa pē.
Laʻitā ne maʻu ʻi he angalelei ʻa e tokotaha naʻá ne faʻú
ʻI he fakaʻosinga ʻo ʻeku ako ʻi Siapaní, naʻá ku fononga ki Taileni ke fai ha fakatotolo ʻi he malaʻe ne u ako ki aí maʻa hoku mataʻitohi MA. Naʻá ku fiefia ka naʻá ku tailiili ʻi he fononga ko ʻení.
Kimuʻa peá u mavahé, naʻá ku kole ha tāpuaki lakanga fakataulaʻeiki. Lolotonga e tāpuakí, naʻe faleʻi au ke u fekumi ki ha ngaahi tāpuaki ʻo e lakanga fakataulaʻeikí ʻi he ngaahi taimi faingataʻá. Naʻe fakahā mai kiate au: “Manatuʻi, ʻoku ʻikai ha feituʻu ʻi he māmaní naʻe ʻikai fakatupu ʻi he mālohi ʻo e lakanga fakataulaʻeikí. Ko ia, ko e fē pē ha feituʻu te ke ʻalu ki ai, fekumi ki ha taha maʻu lakanga fakataulaʻeiki ʻo kole ha tokoni, pea ʻe faitāpuekina koe.”
Naʻe ʻikai ke u ʻilo pe te u maʻu fēfē ʻa e Siasí ʻi Taileni ʻi heʻeku aʻu atú. Naʻe teʻeki ke faʻu ʻa e ʻinitanetí, ko ia naʻe ʻikai ke u lava ʻo kumi ʻa e tuʻuʻanga ʻo e ngaahi falé. Ne mau aʻu atu ki he malaʻe vakapuna Pengikokí ʻi ha hoʻatā Tokonaki. Naʻá ku lotu fakamātoato ʻi he pasí, “Tamai Hēvani, ko e Sāpaté ʻapongipongi. Kātaki ʻo tokoni mai ke u ʻiloʻi e Siasí.”
Ne u fakaʻosi ʻeku lotú peá u sio atu ki tuʻa. Naʻá ku ʻohovale ʻi heʻeku sio ki ha fakaʻilonga ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he lea faka-Tailení mo e lea faka-Pilitāniá.
ʻI he pongipongi hono hokó, ne u ʻalu ʻi ha tekisī veʻe tolu ki he fale ko iá. Hili iá, naʻe ʻomai ʻe he kāingalotu aí ha tuʻasila ʻo ha ʻapi naʻe ofi ange ki he feituʻu ʻuta ne u ngāue aí ʻa ia naʻe fakahoko ai e ngaahi fakataha ʻa e koló. Naʻá na toe ʻomi foki mo e fika telefoni ʻo e ongo faifekau taimi kakató. ʻI he Sāpate hono hokó, naʻá ku ʻalu ai ki he kolo ko iá.
Hili ha ngaahi ʻaho ʻo ʻeku ngāue ʻi ha ngaahi houa lahi ʻi he laʻā velá, ne kamata ke u ongosia. Ne faifai peá u puke.
Naʻá ku telefoni ki he ongo faifekau taimi kakató, pea naʻa mau fakataimitēpileʻi ha taimi ke mau fakataha ai ʻi he feituʻu ʻo e koló. ʻI heʻeku aʻu atu he ʻaho hono hokó, naʻe ʻikai ke ʻi ai ha taha ia ai. ʻI heʻeku tatali ʻi tuʻá, naʻá ku lotu, “Tamai Hēvani, ʻoku ou ʻilo te Ke lava ʻo fakamoʻui au, kapau ko Ho finangaló ia. Kātaki ʻo tokoniʻi muʻa au.”
Naʻe ʻikai fuoloa kuo aʻu mai ʻa e ongo faifekaú mo e palesiteni fakakoló. ʻI he hilifaki e nima ʻo e kau maʻu lakanga fakataulaʻeiki ʻe toko tolú ni ki hoku ʻulú, ne u ongoʻi e mālohi ʻo e Laumālie Māʻoniʻoní ʻi heʻene mafola mei hoku ʻulú ki hoku ngaahi louhiʻivaʻé. Naʻe fakamoʻui au he taimi pē ko iá.
ʻI ha kiʻi kolo siʻisiʻi ne mamaʻo mei hoku fonua tupuʻangá, ne u kumi tokoni ai mei he kau maʻu lakanga fakataulaʻeikí. Naʻe tāpuakiʻi au ʻe he ʻEikí ʻo fakafou ʻi Hono lakanga fakataulaʻeikí mo ʻeku tuí. ʻI heʻeku ngaahi folau talu mei he taimi ko iá mo ʻeku kole ha ngaahi tāpuaki lahi mei he kau maʻu lakanga fakataulaʻeikí ʻi he funga ʻo e māmaní. ʻOku ou houngaʻia ʻi heʻeku ʻiloʻi ko e mālohi ʻo e lakanga fakataulaʻeikí ʻoku maʻu ʻe he kau maʻu lakanga fakataulaʻeiki moʻui tāú ʻoku tatau pē ia ʻi he fonua kotoa pē.