Ngāue Fakaetauhi ʻi he Loto-fakatōkilaló

ʻĪmisi

ko hono papitaiso ʻe Sione ʻa Sīsuú

Ko Hono Papitaiso ʻe Sione ʻa Sīsuú, tā ʻe Harry Anderson

Ko Sione Papitaisó Ko ha Sīpinga ʻo e Loto-fakatōkilaló

Naʻe aʻusia ʻe Sione Papitaiso ha lavameʻa lahi ʻi heʻene ngāué. Naʻá Ne ʻomi ki ha tokolahi ha mahino lahi ange ʻo e moʻoní. Ka naʻe mahino kia Sione ko hono tefitoʻi fatongiá ke teuteuʻi e kakaí ke liliu ʻe he Fakamoʻuí. Naʻe ʻiloʻi ʻe Sione “[kuo pau ke] fakaʻaʻau [ʻa Sīsū] ki muʻa, [kae] fakaʻauʻau [ia] ki mui” (Sione 3:30). Naʻá ne ʻiloʻi ʻa ia naʻe taau ke maʻu ʻa e fakalāngilangí mo e nāunaú. Naʻá ne ʻiloʻi e feituʻu ne maʻu mei ai e mālohi ke fai leleí. Mahalo ne hīkisia e niʻihi kehé ʻi he ngaahi lelei kotoa ne nau faí, ka naʻe fakafōtunga ʻe Sione ʻa e ʻulungaanga faka-Kalaisi ʻo e loto-fakatōkilaló.

ʻI he taimi naʻe haʻu ai ʻa Sīsū kia Sione ʻo kole ke papitaisó, naʻe tali loto-fakatōkilalo ange ʻa Sione mo e ʻohovale ki heʻene kolé: “ʻOku ngali mo au ke u papitaiso ʻiate koe, [ka] ʻokú ke haʻu kiate au?” (Mātiu 3:14). Naʻe toe fakahaaʻi leva ʻe Sione ʻa e loto-fakatōkilaló ʻaki ʻene talangofua ki he fakahinohino ʻa e Fakamoʻuí mo fai e meʻa naʻá Ne kole angé.

Koeʻuhí ko ʻene loto-fakatōkilaló, naʻe lava ai ʻe Sione ʻo teuteuʻi ʻa e halá ke haʻu ai ha tokolahi kia Sīsū Kalaisi.

ʻĪmisi

tangata matuʻotuʻa ange ‘oku fai ‘ene lotu

Ko Hono Akoako ʻo e Loto-fakatōkilaló ʻi he Ngāue Fakaetauhí

ʻE tokoni ʻetau feinga ke ako e loto-fakatōkilaló ʻi heʻetau feinga ke fetauhiʻakí.

1. ʻOku fiemaʻu ʻa e loto-fakatōkilaló ke tali ha fatongia ke ngāue fakaetauhi meiate kinautolu kuo ui ke tataki kitautolú (vakai, 1 Pita 5:1–6; Filipai 2:8). ʻOku tokoniʻi kitautolu ʻe he loto-fakatōkilaló ke tau laka atu ki muʻa ʻi he tui ʻe tāpuakiʻi ʻe he ʻEikí ʻa ʻetau ngaahi ngāué (vakai, ʻEta 12:27; Tokāteline mo e Ngaahi Fuakava 1:28).

2. ʻOku fiemaʻu ʻa e loto-fakatōkilaló ke fekumi ki ha fakahinohino mo muimui ki he ngaahi ueʻi fakalaumālié. ʻE ngaohi kitautolu ʻe he loto-fakatōkilaló ke tau akoʻingofua mo tauʻatāina ange ki he ngaahi ueʻi ʻa e Laumālié. (Vakai, Tokāteline mo e Ngaahi Fuakava 112:10.) lʻOku mateuteu ange ʻa e loto-fakatōkilaló ke maʻu ha ueʻi fakalaumālie pea ʻoku loto-vaivai ange mo fonu ʻi he manavaʻofá. ʻE tokoni hono maʻu e ueʻi fakalaumālié ke tau tokoni ʻi he founga ʻe lelei taha kiate kinautolu ʻoku tau ngāue fakaetauhi ki aí.

3. ʻOku fiemaʻu ʻa e loto-fakatōkilaló ke feohi mo tokoniʻi ha taha ʻoku kehe meiate kitautolú (vakai, Loma 12:3–5; Filipai 2:1–3). Neongo pe ko e hā e ngaahi faikehekehé, ka ʻe lava ke tokoni ʻetau feinga ke mahino e founga ʻoku tau tatau aí ke tau fetuʻutaki lelei ange ai mo e niʻihi kehé. ʻE tokoniʻi kitautolu ʻi heʻetau akoako fakahoko e founga ʻo e fakafanongo fakaleleí ke maʻu ha mahino kiate kinautolu, ako meiate kinautolu, mo fakatokangaʻi ʻa e founga te tau lava ʻo tokoniʻi ai kinautolú. ʻE lava ke ʻomi ʻe hono fehuʻi kiate kitautolu “Ko e hā ha meʻa ʻe tokoni lahi taha kiate au kapau naʻá ku ʻi honau tūkungá?” ha ngaahi fakakaukau.

4. ʻOku fiemaʻu ʻa e loto-fakatōkilaló ke fakatokangaʻi ʻoku tau kei ako pē mo tupulaki fakataha. Te tau lava ʻo kātekina e niʻihi kehé mo ʻamanaki lelei te nau kātakiʻi kitautolu. (Vakai, Kolose 3:12–13.) Fekumi ki ha fakamatala tokoni fekauʻaki mo e ngaahi founga te tau lava ʻo lelei ange aí.

5. ʻI he tafaʻaki ʻe tahá, ʻoku ʻikai faingofua maʻu pē ke tali e tokoní. ʻOku fakanatula pē ʻetau fiemaʻu ke tau ongoʻi te tau lava ʻo fakaleleiʻi ʻa e ngaahi palopalemá ʻiate kitautolu pē. Ka neongo ia, ko hono tali e ngāue fakaetauhi ʻa e niʻihi kehé ko ha founga ia ke fakamālohia ai ʻa e feohi fakakaungāmeʻá, he ʻoku fakatupulaki ʻe hono tokoniʻi ʻo e niʻihi kehé e feʻofaʻakí ʻiate kitautolu. ʻOku fiemaʻu ʻa e loto-vaivaí mo e loto-fakatōkilaló ke fakangofua ʻa e niʻihi kehé ke nau tokoniʻi kitautolu ʻa ia ʻoku totonu ke tau ngāue kotoa ke maʻu ia. (Vakai, 1 Pita 3:8–9.)

ʻĪmisi

fefine ʻoku lau folofola

Ko Hono Fakatupulaki ʻo e Loto-fakatōkilaló

ʻI he fakaʻau ke tau ʻiloʻi ʻa e Fakamoʻuí, te tau ʻiloʻi lelei ange ʻa e meʻa naʻá Ne mei fai ke ngāue fakaetauhi ʻi hotau tuʻungá. Te tau fakatupulaki fēfē ʻa e ʻulungaanga faka-Kalaisi ʻo e loto-fakatōkilaló?

1. Te tau lava ʻo ʻaukai mo lotua ha loto-fakatōkilalo (vakai, Hilamani 3:35; Saame 35:13).

2. Te tau lava ʻo manatuʻi pea houngaʻia ʻi he meʻa kuó Ne fai maʻatautolú (vakai, Mōsaia 4:11).

3. Te tau lava ʻo ʻiloʻi ʻetau fakafalala kiate Iá (vakai, Mōsaia 2:23–25; ʻEta 12:27).

4. Te tau lava ʻo fakatomala (vakai, ʻAlamā 5:26–29).

5. ʻE lava ke tupulaki ʻetau loto-fakatōkilaló ʻi heʻetau fakaafeʻi ʻa e Laumālié ki heʻetau moʻuí (vakai, Tokāteline mo e Ngaahi Fuakava 11:12).