“Ngaahi Sū ʻIkai Haʻí mo e ʻOfa ʻa e Fakamoʻuí,” Liahona, Fēpueli 2023.
Leʻo ʻo e Kau Māʻoniʻoni ʻi he Ngaahi ʻAho Kimui Ní
Ngaahi Sū ʻIkai Haʻí mo e ʻOfa ʻa e Fakamoʻuí
ʻI heʻeku tūʻulutui taʻefaʻakātaki hifo ke nonoʻo ha toe hoaʻi sū ʻe tahá, naʻe akoʻi mai ʻe he ʻEikí ha lēsoni loto-fakatōkilalo fekauʻaki mo ʻEne ʻofa ʻiate kitautolú.
Kuó u hoko ko ha faiako ako makehe ʻi ha ngaahi taʻu lahi maʻá e fānau ʻi he vahaʻa ʻo e taʻu nimá mo e valú. ʻOku fefaʻuhi ʻeku fānau akó mo ha ngaahi faingataʻaʻia fakaesino lahi—mei he ngaahi lavea lahi ʻo e ʻutó mo e ʻōtisimí (autism) ki he ngaahi faingataʻaʻia fakaeakó.
Ko e tokolahi ʻo ʻeku fānau akó ʻoku ʻikai ke nau fuʻu lava lelei ʻo fai e ngaahi ngāue angamahení pea ʻikai ke nau lava ʻo nonoʻo honau suú. ʻOku ou fakahīkihikiʻi e mātuʻa ʻoku nau fakatau e sū fakamaʻu fakapipikí (velcro) maʻa ʻenau fānaú, ka ʻoku ou lāunga ʻi he mātuʻa ʻoku nau fakatau e sū tepí maʻa ʻenau fānaú.
Tā fakatātaaʻi ʻe Enya Todd; taá ʻi he angalelei ʻa e tokotaha faʻu tohí
Ke nonoʻo maʻu e sū ʻo e fānaú ko ha palopalema ia ki heʻenau malú. Ko ia, ʻoku tuʻo lahi ʻi he ʻaho kotoa pē, ʻa ʻeku faʻa tūʻulutui mo haʻi ʻa e ngaahi sū ʻo ʻeku fānau ako īkí. ʻI he lolotonga ʻo e ʻaho akó, ʻoku fakatou fakamole taimi mo fakahela ʻeni.
Kimuí ni mai, ʻi heʻeku tūʻulutui taʻefaʻakātaki hifo ʻi he malaʻe vaʻingá ke toe nonoʻo ha sū ʻe tahá, naʻe haʻu ha fakakaukau fakaʻofoʻofa. Naʻá ku sioloto atu ki he tūʻulutui ʻa e Fakamoʻuí ʻi he tafaʻaki ʻo ʻEne kau ākongá ke fai ha tokoni ʻofa ʻaki hono fufulu honau vaʻé. Ne haʻu leva e ngaahi folofola ʻa e Fakamoʻuí ki heʻeku fakakaukaú: “Ko ʻeku tala moʻoni atu kiate kimoutolu, Ko e meʻa ʻi hoʻomou fai ia ki ha taha ʻoku kihiʻi siʻi hifo ʻi hoku kāingá ni, ko hoʻomou fai ia kiate aú” (Mātiu 25:40).
Naʻá ku ongoʻi e ʻofa ʻa e Fakamoʻuí ki he kiʻi fānau naʻá ku tūʻulutui ʻi hono tafaʻakí ke tokoniʻí. Naʻá ku toe ongoʻi foki ʻa e ʻofa ʻa e ʻEikí kiate aú. Naʻá ku ongoʻi naʻá Ne fakahoungaʻi au ʻi he ngaahi houa ne u fakamoleki ʻi he uike takitaha ke tokoniʻi Hono ngaahi ʻofaʻanga tuʻu laveangofua tahá.
Naʻe ʻomi ʻe he aʻusia fakaʻofoʻofa ko ʻení kiate au ha nonga mo ha ivi ne u fuʻu fiemaʻú mo ha fakapapau ʻoku ou ʻi he feituʻu ʻoku totonu ke u ʻi aí, ʻo fai ʻa e meʻa ʻoku totonu ke u faí. ʻOku ou houngaʻia koeʻuhí ko e ʻEikí mo ʻEne ngaahi ʻaloʻofa ongongofua ʻi heʻeku moʻuí. Pea ʻi he taimi ní ʻoku ou houngaʻia ʻi he ngaahi faingamālie fakaʻaho ke tūʻulutui ai ʻo nonoʻo e ngaahi suú.