“Ko e Moʻoni ʻOku ʻAmanaki Mai ʻa e Tamai Hēvaní ke Tau Haohaoa?,” Liahona, Fēpueli 2023.
Haʻu, ʻo Muimui ʻIate Au
Ko e Moʻoni ʻOku ʻAmanaki Mai ʻa e Tamai Hēvaní ke Tau Haohaoa?
Naʻe folofola ʻa e Fakamoʻuí ʻi Heʻene Malanga ʻi he Moʻungá ʻo pehē, “Ko ia ke haohaoa ʻa kimoutolu he ʻoku haohaoa ʻa hoʻomou Tamai ʻoku [ʻi] he langí” (Mātiu 5:48). Ka ʻe malava fēfē nai ʻeni? ʻE lava ke hangē ʻoku lōmekina kitautolú pea te tau ala loto-foʻi kapau he ʻikai ke tau tuʻu hifo ʻo manatuʻi e founga mo e taimi ʻoku tau maʻu ai ʻa e haohaoá.
ʻEkitivitī: Pāsolo Haohaoá
Konga 1
Naʻe akoʻi ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē: “Ko hotau ʻamanaki leleiʻanga pē ki ha haohaoa moʻoní, ko ʻetau maʻu ia ko ha meʻafoaki mei he langí—ʻoku ʻikai ke tau lava ʻo ʻngāueʻiʼ ia.”1
Kumi fakafāmili pe ʻiate koe pē ʻa e ʻuhinga ʻo e haohaoá ʻi he Fakahinohino ki he Ngaahi Folofolá ʻi he polokalama Gospel Library pe ʻi he ChurchofJesusChrist.org. Lau ʻa e ngaahi fakamoʻoni fakafolofola ʻoku ʻoatu fakataha mo hono fakaʻuhingá. Te ke lava foki ʻo fakakaukau ke lau e lea ʻa Palesiteni Lāsolo M. Nalesoni ko e “Perfection Pending” mei he konifelenisi lahi ʻo ʻOkatopa 1995.2
Ko e hā hoʻo mahino ki he haohaoá he taimi ní? Aleaʻi mo hoʻo fāmilí pe hiki ʻi hoʻo tohinoá ʻa e founga ʻoku liliu ai hoʻo mahino ki he ngaahi veesi ko ʻení mo e fakaʻuhingaʻi ʻi he ongoongoleleí ʻa e haohaoá.
Konga 2
Mou faʻu fakafāmili ha kiʻi pāsolo faingofua ʻaki haʻamou kosi ha laʻipepa ki ha ngaahi kongokonga pāsolo. Kimuʻa pea fokotuʻutuʻu ʻa e pāsoló, toʻo ha konga ʻe taha koeʻuhí ke ʻoua ʻe kakato ʻa e pāsoló ʻi hono fokotuʻutuʻú. ʻOange ki he mēmipa takitaha ʻo e fāmilí ʻa e toenga ʻo e ngaahi kongokonga pāsoló pea ʻai ke nau fakahingoa ʻa e ngaahi kongá ʻaki ʻa e ngaahi meʻa te nau lava ʻo fai ke ngāueʻi ai ʻa e haohaoá.
ʻI he taimi ʻoku fakahingoa ai ʻa e ngaahi kongá, fokotuʻutuʻu ʻa e pāsoló ʻo ʻoua ʻe kau ai ʻa e konga naʻá ke toʻo ʻi he kamataʻangá. Ko ʻene kakato pē ʻa e pāsoló, pea toki fakahā ʻa e konga fakaʻosí. Kimuʻa pea fokotuʻu iá, aleaʻi ha ngaahi founga ʻoku tokoniʻi ai kitautolu ʻe he Toluʻi ʻOtuá ke tau fakalakalaka pea hiki ha niʻihi ʻo e ngaahi meʻá ni ʻi he konga fakaʻosí.
ʻTe tau lava ʻo iku pē ki he haohaoá ʻo fakafou ʻi he mālohi huhuʻi ʻo Sīsū Kalaisí mo ʻEne Fakaleleí.3