Naʻe lea ʻa e ʻAposetolo ko Paulá kau ki he fekihiaki ʻa e Kau Māʻoniʻoni ʻi Kolinitoó fekauʻaki mo e ngaahi angafai ʻo e ngaahi tui fakalotú. Naʻá ne fakamamafaʻi mai ʻoku ʻi ai ha ngaahi fatongia taʻengata mo fakalangi ʻo e tangatá mo e fefiné pea ʻokú na fekauʻaki ʻiate kinaua ʻi he palani ʻa e ʻEikí. Naʻá ne toe akoʻi foki ʻa e kāingalotu ʻo e Siasí ki he founga totonu hono teuteuʻi ʻo e sākalamēnití.
Lau ʻa e ngaahi lea ko ʻeni ʻoku fakahaaʻi mai ai ʻa e ongo ʻa ha kakai ʻe niʻihi fekauʻaki mo e malí:
“ʻOku fuʻu mahuʻinga kiate au ke u aʻusia ha tuʻunga lelei ʻi heʻeku ngāue maʻuʻanga moʻuí. ʻOku ʻikai ke u fie vahevahe ʻeku tokangá ʻi heʻeku ngaahi taumuʻa fakangāué mo e nofomalí.”
“ʻOku ʻikai ke u fie tukupā ki ha feohi taimi lōloa. ʻOku ou hohaʻa naʻá ku fai ha fili te u fakatomala ai he kahaʻú.”
“Te u pōpula he nofomalí. He ʻikai lava ke u fai ha meʻa pē ʻoku ou loto ki ai.”
“ʻOku ou ʻilo ko e malí ko e fili mahuʻinga taha ia te u faí pea ʻoku ou fiefia ke u aʻu ki ai.”
Lekooti ʻi hoʻo tohinoa ako folofolá hoʻo ongo fekauʻaki mo e malí.
ʻOku toe lahi ange ʻetau laukonga ʻi he 1 Kolinitō 11 ki he meʻa naʻe tohi ʻe he ʻAposetolo ko Paulá ke tali ʻa e ngaahi hohaʻa ʻa e kāingalotu ʻo e Siasí ʻi Kolinitoó. Lau ʻa e 1 Kolinitō 11:3, ʻo kumi ki he meʻa naʻe akoʻi ʻe Paula fekauʻaki mo e ngaahi fatongia ʻo e husepānití.
ʻOku ʻuhinga ʻa e kupuʻi lea “ko e ʻulu ʻo e fefiné ʻa e tangatá” ko e fatongia toputapu ʻo e tangatá ke puleʻi ʻa e ʻapí. ʻOku ʻuhinga ʻa e puleʻí ke tataki mo fakahinohino ʻa e niʻihi kehé ʻi he founga angatonu ʻi he ngaahi meʻa fakalaumālié mo fakatuʻasinó.
Fakatokangaʻi ʻi he veesi 3 pe ko hai ʻokú ne puleʻi mo fakahinohino ʻa e husepānití ʻi heʻene puleʻi hono fāmilí. Ko e hā ʻe mahuʻinga ai ki ha husepāniti mo ha tamai ke hanga kia Kalaisi ke tataki mo fakahinohino ia?
ʻI he mahino kiate kitautolu ʻa e founga ʻoku pule ai ʻa e Tamai Hēvaní ʻi Hono puleʻangá, ʻe lava ke tau ʻilo ko e ʻOtua ia ʻo e maau kae ʻikai ʻo e moveuveu (vakai T&F 132:8).
Hangē ko hono lekooti ʻi he 1 Kolinitō 11:4–16, naʻe tali ʻe Paula ʻa e ngaahi fehuʻi ʻa e Kau Māʻoniʻoni ʻi Kolinitoó kau ki he ngaahi angafai ʻa e tangatá mo e fefiné ʻi he taimi naʻa nau lotu mo kikite ai lolotonga ʻenau ngaahi huú. Naʻe kau ʻi he ngaahi angafai ko ʻení ʻa e tui ʻe he kakai fefiné ha ngaahi pūlou ki honau ʻulú.
Naʻe maʻuhala ʻa kinautolu naʻa nau lau ʻa e ngaahi akonaki ʻa Paula ʻi he Fuakava Foʻoú ʻi heʻenau pehē ʻoku mahuʻinga ange ʻa e fatongia ʻo e tangatá ʻi he fatongia ʻo e fefiné. Naʻe fakamahino ʻe ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ‘a e maʻuhala ko ʻení:
ʻĪmisi
Elder M. Russell Ballard
“ʻOku tuʻunga tatau ʻa e kakai tangatá mo fafine ʻi he ʻao ʻo e ʻOtuá mo e Siasí, ka ʻoku ʻikai ʻuhinga e tuʻunga tataú ko ha meʻa tatau. ʻOku kehekehe e ngaahi fatongia mo e ngaahi meʻafoaki faka-ʻOtua ʻo e kakai tangata mo fafiné ʻi honau natulá kae ʻikai ʻi honau mahuʻingá pe ivi takiekiná. ʻOku fokotuʻu ʻe he tokāteline hotau Siasí ʻa e houʻeiki fafiné ke tatau mo e houʻeiki tangatá kae kei kehekehe pē. ʻOku ʻikai ke lau ʻe he ʻOtuá ʻoku lelei ange pe mahuʻinga ange ʻa e tuʻunga tangatá pe fefiné ia ʻi he tahá. …
“ʻOku maʻu ʻe he kakai tangatá mo fafiné ha ngaahi meʻafoaki kehekehe, ngaahi mālohinga kehekehe, mo e ngaahi fakakaukau mo e ngaahi ongo kehekehe. Ko e taha ia ʻo e ʻuhinga tefito ʻoku fie maʻu ai ʻe he tangatá ʻa e fefiné mo e fefiné ʻa e tangatá” (“Men and Women in the Work of the Lord,” New Era, ʻEpeleli 2014, 4).
Lau ʻa e 1 Kolinitō 11:11, ʻo kumi ki he meʻa naʻe akoʻi ʻe Paula kau ki he vā ʻo e husepānití mo e uaifí. ʻOku ʻuhinga ʻa e kupuʻi lea “ʻi he ʻEikí” ki he palani ʻa e ʻEikí ke tokoniʻi kitautolu he tau hoko ʻo hangē ko Iá pea maʻu ʻa e moʻui taʻengatá.
ʻOku tau ako ʻa e moʻoni ko ʻení mei he 1 Kolinitō 11:11: ʻI he palani ʻa e ʻEikí, he ʻikai lava ke maʻu ʻe he tangatá mo e fefiné ʻa e moʻui taʻengatá kapau ʻe ʻikai ke na fakatou kau ai (vakai foki T&F 131:1–4).
Ko e mali ʻi ha vā ʻo ha tangata mo ha fefine ko e konga ia ʻo e palani ʻa e ʻOtuá. Fakakaukau ki he ngaahi fehuʻi ko ‘ení: ʻE tokoni fēfē ha tamai pe faʻē angatonu ki hono fakahoko e palani ʻa e ʻOtuá? ʻOku tokoni fēfē ia ke teuteuʻi kitautolu ke tau hoko ʻo hangē ko e Tamai Hēvaní?
ʻĪmisi
scissors
ʻĪmisi
one blade of scissors
Fakakaukau ki hono ngāueʻaki ʻo e helekosí. ʻE kei ʻaonga ha helekosi kapau ʻe vete hono ongo matá peá ke feinga ke kosi ʻaki ha mata pē ʻe taha ha lauʻipepa pe konga tupenu? ʻOku tatau fēfē ha helekosi mo ha husepāniti mo ha uaifi ʻokú na feinga ke maʻu ʻa e moʻui taʻengatá?
ʻĪmisi
Elder David A. Bednar
Lau ʻa e lea ko ʻeni ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻo kumi ki he palani ke ngāue fakataha ʻa e husepānití mo e uaifí ke maʻu ʻa e moʻui taʻengatá: “Fakatatau mo e palani faka-ʻOtuá, ʻoku fakataumuʻa ke fakalakalaka fakataha ʻa e tangatá mo e fefiné ki he haohaoá mo e nāunauʻia kakato. Koeʻuhí ko e mahino hona natulá mo e meʻa ʻokú na malavá, ʻoku ʻomi ai ʻe he tangata mo fefine takitaha ki he nofo malí ha ngaahi fakakaukau mo ha ngaahi taukei makehe. Neongo ʻoku kehekehe pē e tokoni ʻa e tangatá mo e fefiné, ka ʻoku faitatau ʻena tokoni ki he maʻumaʻulutá mo e uouangatahá, ʻa ia he ʻikai lava ke aʻusia ʻi ha toe founga kehe. ʻOku fakakakato mo fakahaohaoaʻi ʻe he tangatá ʻa e fefiné, pea fakakakato mo fakahaohaoaʻi ʻe he fefiné ʻa e tangatá, ʻi heʻena feakoʻaki mo fefakamālohiaʻakí mo fetāpuekinaʻaki ʻiate kinauá” (“Marriage Is Essential to His Eternal Plan,” Ensign, Sune 2006, 83–84).
Tohi ʻi ho tohinoa ako folofolá ha niʻihi ʻo e ngaahi natula mo e ngaahi fatongia kehekehe ʻo e tangatá mo e fefiné ʻokú na fetokoniʻaki mo fefakamālohiaʻaki ai ʻi ha fāmili.
Naʻe fakahā ʻi he “Ko e Fāmilí: Ko Ha Fanongonongo ki Māmani,”, ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá: “Tuʻunga ʻi ha palani fakalangi, ʻoku ʻa e ngaahi tamaí ai, ke nau puleʻi honau fāmilí ʻi he ʻofa mo e māʻoniʻoni pea ko honau fatongia ke tokonaki ʻa e ngaahi fie maʻu ʻo e moʻuí pea mo ha maluʻi maʻa honau ngaahi fāmilí. Ko e tefitoʻi fatongia ʻo e ngaahi faʻeé ke lehilehiʻi hake ʻa ʻenau fānaú. ʻI he ngaahi fatongia toputapú ni, ʻoku haʻisia ai ʻa e ngaahi tamaí mo e ngaahi faʻeé ke nau fetokoniʻaki ko ha kaungā-ngāue tuʻunga tatau. Ka ʻe fie maʻu ke fai ha liliu fakafoʻituitui ia ʻo ka hoko ha faingataʻaʻia fakaesino, mate, pe ko ha ngaahi toe tūkunga kehe” (Ensign, Nov. 2010, 129).
Fakakaukau ki he ngaahi ʻulungaanga kehekehe kau ki he malí ʻoku hā mai ʻi he ngaahi lea naʻá ke lau ʻi he kamataʻanga ʻo e lēsoní. Hili ia pea tali ʻa e fehuʻi ko ʻení ʻi hoʻo tohinoa ako folofolá: Hili hoʻo ako ʻa e 1 Kolinitō 11:1–16, te ke tali fēfē ki ha taha ʻoku ʻikai mahino ki ai ʻa e mahuʻinga ʻo e malí ʻi he palani ʻa e ʻOtuá?
ʻOku akoʻi ʻe Paula ʻa e Kau Māʻoniʻoni ʻi Kolinitoó ke ʻoua ʻe toʻo maʻamaʻa ʻa e sākalamēnití
Ko e hā ʻokú ke fakakaukau ki ai ʻi hoʻo lau ʻa e ngaahi kupuʻi lea ko ʻení?
“Ko ha aʻusia fakalaumālie moʻoni.”
“Ko hono fakafoʻou ʻo e laumālié.”
“Ko e meʻa fakafiefia taha ia ʻi hoku ʻaho Sāpaté.”
Fakalaulauloto ki he taimi fakamuimuitaha naʻá ke maʻu ai ʻa e sākalamēnití, peá ke fakakaukau pe ʻoku fakamatalaʻi ʻe he ngaahi kupuʻi lea ko ʻení hoʻo aʻusiá.
ʻI hoʻo ako ʻa e 1 Kolinitō 11:17–34, kumi ki he ngaahi moʻoni ʻe lava ke tokoni ke toe fakalaumālie mo ʻuhingamālie ange ai hoʻo aʻusiá.
ʻI he taimi ʻo Paulá, naʻe tauhi ʻe he kāingalotu ʻo e Siasí ha angafai naʻe tatau mo e ʻOhomohe Fakaʻosí. Naʻa nau faʻa fakataha ʻo maʻu meʻatokoni pea toki maʻu ʻa e sākalamēnití. Naʻe fakahalaiaʻi ʻe he ʻAposetolo ko Paulá ʻa e ngaahi fakataha peheé koeʻuhí naʻe hoko pē ia ko ha ngaahi houa maʻu meʻatokoni fakataha kae ʻikai tauhi ʻa e molumalu hono maʻu ʻo e sākalamēnití. ʻOku fakamahino ʻe he Liliu ʻa Siosefa Sāmitá ʻa e lea ʻa Paula kau ki he taumuʻa ʻo ʻenau fakatahá: “[ʻO ka mou fakataha ʻi he potu pē ʻe taha, ʻoku ʻikai ko e kai ia ʻo e ʻohomohe ʻa e ʻEikí]?” (Liliu ʻa Siosefa Sāmitá, 1 Kolinitō 11:20 ).
Neongo naʻe fakataumuʻa ʻa e ngaahi fakataha ko ʻení ke fakatupulaki ʻa e feohí mo e faaitahá, ka naʻe faʻa iku ʻo fai ai ha fakafekiki. Hangē ko hono lekooti ʻi he 1 Kolinitō 11:17–22, naʻe fakahalaiaʻi ʻe Paula ʻa e fakakikihi naʻe faʻa hoko ʻi he vā ʻo e Kau Māʻoniʻoni ʻi Kolinitoó he lolotonga ʻa e ngaahi maʻu meʻatokoni ko ʻení.
Lau ʻa e 1 Kolinitō 11:23–26, ʻo kumi ki he meʻa naʻe poupouʻi ʻe Paula ke manatuʻi ʻe he kāingalotu ʻo e Siasí fekauʻaki mo e sākalamēnití. ʻOku tatau ʻa e foʻi lea ko e fakahā (shew) ʻi he veesi 26 mo e foʻi lea ko e fakahā (show) pea ʻokú na puʻaki tatau pē. Ka ʻoku ʻuhinga ʻa e foʻi lea faka-Kiliki naʻe liliu mei aí ki he malangaʻaki, fanongonongo, pe fakamoʻoni .
ʻĪmisi
Last Supper
Lau ʻa e 1 Kolinitō 11:27–30, ʻo kumi ki he fakatokanga ʻa Paula ki he Kau Māʻoniʻoni ʻi Kolinitoó fekauʻaki mo e sākalamēnití.
ʻOku tau ako mei he ngaahi veesi ko ʻení ko kinautolu ʻoku nau maʻu ʻa e sākalamēnití neongo ʻa e ʻikai ke nau taaú, ʻoku nau fakahalaiaʻi mo tanumaki ha mala kiate kinautolu.
ʻOku fakapapauʻi ʻa e moʻoni ko ʻení ʻi he Tohi ʻa Molomoná, ʻa ia naʻe fakatokanga ai ʻa Sīsū Kalaisi kiate kinautolu ʻoku nau maʻu ʻa e sākalamēnití neongo ʻenau taʻetaaú, ko ʻenau kai mo inu ai ʻa e malaʻiá ki honau ngaahi laumālié (vakai 3 Nīfai 18:29). ʻIkai ko ia pē, ka naʻe tala ʻe he Fakamoʻuí ki he kau taki lakanga fakataulaʻeikí ʻoku ʻikai totonu ke nau fakangofua ʻa kinautolu ʻoku ʻikai tāú ke nau maʻu ʻa e sākalamēnití (vakai 3 Nīfai 18:29). Kapau ʻokú ke fifili fekauʻaki mo ho tuʻunga taau ke maʻu ʻa e sākalamēnití, ʻoku totonu ke ke talanoa ki hoʻo pīsopé pe palesiteni fakakoló.
Ko e foʻi lea faka-Kiliki ʻoku liliu ʻi he 1 Kolinitō 11:29 ko e “malaʻia,” ʻe toe lava pē ke liliu ko e “fakahalaiaʻi” . ʻOku ʻuhinga ʻa e Fakahalaiaʻí ki hono “fakamāuʻi pe lau ʻe he ʻOtuá ʻoku halaia” (Fakahinohino ki he Ngaahi Folofolá, “Fakahalaiá, Fakahalaiaʻí,” scriptures.lds.org). ʻOku ʻuhinga ʻa e halaiá ko e “tuʻunga ia ʻoku taʻofi ai ʻa e fakalakalaka ʻa ha taha pea ʻikai tali ke ne hū ki he ʻafioʻanga ʻo e ʻOtuá mo Hono nāunaú. ʻOku tuʻunga kehekehe ʻa e anga ʻo e malaʻiá. Ko kinautolu kotoa pē ʻoku ʻikai te nau maʻu hono kakato ʻo e hakeakiʻi fakasilesitialé ʻe fakangatangata ʻa e anga ʻo ʻenau fakalakalaká mo honau ngaahi faingamālié, pea te nau malaʻia ʻo aʻu ki he tuʻunga ko iá” (Fakahinohino ki he Ngaahi Folofolá, “Malaʻiá,” scriptures.lds.org).
Manatuʻi “‘oku ‘ikai fie maʻu ke tau haohaoa pea tau toki maʻu ‘a e sākalamēnití, ka ‘oku totonu ke tau maʻu ‘i hotau lotó ‘a e laumālie ‘o e loto-fakatōkilaló mo e fakatomalá” (True to the Faith: A Gospel Reference [2004], 148). ʻOku ʻikai ke tau taau ke maʻu ʻa e sākalamēnití kapau te tau maʻu ia ʻaki ʻa e loto ʻoku ʻikai fakatomala pea ʻikai ha holi ke manatu mo muimui ki he Fakamoʻuí.
Fakakaukau ki he ʻuhinga ʻe lava ke malaʻia ai hotau ngaahi laumālié ʻi hono maʻu ʻo e sākalamēnití ʻi he taimi ʻoku ʻikai ke tau taau aí.
Toe lau ʻa e 1 Kolinitō 11:28, ʻo kumi ki he fakahinohino ʻa Paula ki he kāingalotu ʻo e Siasí ʻa e meʻa ke nau fai he lolotonga ʻenau maʻu ʻa e sākalamēnití. Fakakaukau ke fakaʻilongaʻi ʻa e meʻa ʻokú ke maʻú.
ʻOku tau ako mei he veesi ko ʻení ʻoku totonu ke tau sivisiviʻi ʻetau moʻuí ʻi he taimi ʻoku tau maʻu ai ʻa e sākalamēnití.
Ko e hā ʻa e ngaahi founga ʻokú ke pehē ʻoku totonu ke tau sivisiviʻi ʻaki ʻetau moʻuí?
ʻOku ʻikai fakataumuʻa pē hono sivisiviʻi ʻetau moʻuí ke fakakaukauʻi pe ʻoku tau taau ke maʻu ʻa e sākalamēnití, kā ke fakakaukauʻi foki ʻa e tuʻunga ʻo ʻetau feinga ke tauhi ʻetau ngaahi fuakava mo e ʻOtuá pea mo e founga ʻe lava ke tau feinga ai ke fakatomala mo fakalakalaká.
Lau ʻa e ngaahi lea ko ʻení, peá ke fakakaukau ki he ngaahi founga ʻe lava ke ke sivisiviʻi ai hoʻo moʻuí ʻi he taimi ʻokú ke maʻu ai ʻa e sākalamēnití.
ʻĪmisi
President Howard W. Hunter
Ko e lea eni ʻa Palesiteni Hanitā ki haʻane aʻusia lolotonga ʻene maʻu ʻa e sākalamēnití: “Naʻá ku fai kiate au ʻa e fehuʻi ko ʻení: “ʻOku ou fakamuʻomuʻa nai ʻa e ʻOtuá ʻi he meʻa kotoa pē pea mo tauhi kotoa ʻEne ngaahi fekaú?” Naʻá ku fakalaulauloto leva mo tukupā. Ko ha tufakanga mafatukituki ke fai ha fuakava mo e ʻEikí ke tauhi maʻu pē ʻEne ngaahi fekaú, pea ʻoku mafatukituki tatau pē hono fakafoʻou ʻo e fuakava ko iá ʻaki hono maʻu ʻo e sākalamēnití. . ʻOku mahuʻinga fau ʻa e ngaahi momeniti ʻo e fakakaukau lolotonga hono tufa ʻo e sākalamēnití. Ko e ngaahi momeniti ia ke te sivisiviʻi ai kita, vakaiʻi ʻete fakakaukaú, vakaiʻi kita—ko ha taimi ke te fakakaukau pea tukupā” (“Thoughts On the Sacrament,” Ensign, Mē 1977, 25).
ʻĪmisi
Tad R. Callister
Naʻe akoʻi ʻe Teeti R. Kalisitā, ko e palesiteni lahi ʻo e Lautohi Faka-Sāpaté pea ʻi he lolotonga ʻene mēmipa ʻi he Fitungofulú, ko e sākalamēnití ko ha taimi ke te fakakaukau ai mo sivisiviʻi kita: “Ko e sākalamēnití … ko ha taimi ke vakaiʻi ke loloto ange ʻete fakakaukaú mo sivisiviʻi kita. … Ko e sākalamēnití ko ha taimi ke tau manatu ai ki he Fakamoʻuí mo tau fakahoa ʻetau moʻuí ki he Faʻifaʻitakiʻanga Māʻongoʻongá [Sīsū Kalaisi]. Ko ha taimi ke tuku fakatafaʻaki hono fakatonuhiaʻi kitá; ko e taimi ia ʻo e moʻoni kānokató. Kuo pau ke tuku ki he tafaʻakí ʻa e ngaahi ʻuhingá mo e fakamatamataleleí kae tuku hotau laumālié ki hono tuʻunga totonú, ke fetuʻutaki mo ʻetau Tamai Hēvaní ʻa e laumālie ki he Laumālie. ʻOku tau hoko ʻi he momeniti ko ʻení ko ha fakamaau pē kiate kitautolu, ʻo fakakaukau ki he tuʻunga totonu ʻo ʻetau moʻuí pea mo e tuʻunga totonu ke tau ʻi aí” (The Infinite Atonement [2000], 291).
Ko e founga ʻe taha ke fakaʻaongaʻi ai ʻa e tefitoʻi moʻoni ko ʻeni hono sivisiviʻi ʻetau ngaahi moʻuí ko ʻetau fakakaukau he lolotonga ʻetau teuteu ke maʻu ʻa e sākalamēnití ki haʻatau tali ki ha ngaahi fehuʻi. Hangē ko ʻení, ʻe lava ke ke fehuʻi, “Te u lava fēfē ʻo hoko ko ha ākonga lelei ange ʻa Sīsū Kalaisi?” “ʻOku tatau fēfē ʻeku moʻuí mo e moʻui ʻa e Fakamoʻuí? Ko e hā ha ngaahi faikehekehe?” “Ko e hā ha vaivaiʻanga ʻoku ou lolotonga faingataʻaʻia ai mo taʻofi ʻeku tupulaki fakalaumālié?” “Ko e hā ʻe lava ke u fai he uiké ni ke u toe kiʻi lelei ange ai?”
Lisi ʻi ho tohinoa ako folofolá ha ngaahi fehuʻi te ke lava ʻo fai kiate koe kimuʻa pea ʻi he lolotonga ʻa e sākalamēnití.
Lekooti ʻi ho tohinoa ako folofolá haʻo palani ʻo e meʻa te ke fai ke ke toe mateuteu ange ai ʻi he faingamālie hoko te ke maʻu ai ʻa e sākalamēnití.
ʻI hoʻo sivisiviʻi hoʻo moʻuí ki muʻa pea ʻi he lolotonga ʻa e sākalamēnití, ʻe lava ke tokoniʻi koe ʻe he ʻEikí ke ke ʻilo ʻa e founga ke toe lelei ange ai hoʻo tauhi hoʻo ngaahi fuakavá mo taau ke maʻu ʻa e ngaahi tāpuaki ʻokú Ne finangalo ke ʻoatu maʻaú. Tukupā ke muimui ki ha ngaahi ueʻi fakalaumālie ʻokú ke maʻu.
ʻOku tau lau ʻi he 1 Kolinitō 11:33–34 ʻa e toe fakahinohino ʻa Paula ki he Kau Māʻoniʻoni ʻi Kolinitoó kau ki he meʻatokoni naʻa nau maʻu ʻi he taimi naʻá nau fakataha ai ke maʻu ʻa e sākalamēnití. Naʻá ne tala ki he Kau Māʻoniʻoní ke nau fakakaukau kiate kinautolu takitaha pea fakaʻehiʻehi mei he fakafekikí.
Hiki ʻa e fakamatala ko ʻení ʻi lalo ʻi he ngaahi ngāue ke fai he ʻahó ni ʻi hoʻo tohinoa ako folofolá:
Kuó u ako ‘a e 1 Kolinitō 11 peá u fakakakato ‘a e lēsoni ko ‘ení ‘i he (‘ahó).
Ko ha ngaahi fehuʻi, fakakaukau, mo e ʻilo makehe ʻoku ou fie vahevahe mo ʻeku faiakó: