Talateu kia 2 Sioné

Naʻe fakahā ʻe he ʻAposetolo ko Sioné ʻi heʻene tohi hono uá ʻene hohaʻa koeʻuhí ko e ngaahi ivi tākiekina ʻo e hē mei he moʻoní ʻi he Siasí. ʻI he taimi tatau, naʻá ne toe fakahā ʻene fiefia ʻi he kāingalotu ʻo e Siasí naʻa nau kei mālohi mo tauhi mateaki ki he ongoongoleleí (vakai, 2 Sione 1:4). ʻOku fakahaaʻi ʻi heʻene ngaahi leá ʻa e fiefia mo e houngaʻia ʻoku ongoʻi ʻe he kau taki ʻo e Siasí kiate kinautolu ʻoku kei tui faivelenga ki he ʻEikí. ʻI hoʻo ako ʻa e 2 Sione, ʻe lava ke fakamālohia koe ʻi he fakamanatu ʻa Sione ke feʻofaʻakí, talangofua ki he ngaahi fekau ʻa e ʻOtuá, mo nofo faivelenga ʻi he tokāteline ʻo Kalaisí.

Naʻe fakahā ʻe he tokotaha faʻu tohí ko iá “ko e motuʻa” (2 Sione 1:1), pea ʻoku pehē ʻe he tala tukufakaholó naʻe tohi ʻe Sione, ko e taha ʻo e fuofua Kau ʻAposetolo ʻe Toko Hongofulu Mā Uá, ʻa e tohi ko ʻení (vakai, Bible Dictionary, “John, Epistles of”).

ʻOku ʻikai ʻiloʻi pau e taimi mo e feituʻu ne tohi ai e 2 Sioné. Kapau ʻoku tonu e tukufakaholo ʻo e nofo fuoloa ʻa Sione ʻi ʻEfesoó, naʻá ne mei lava ʻo fai e tohí ni mei ai ʻi he vahaʻa ʻo e A.D. 70 mo e 100.

Naʻe fai ʻa e Tohi Hono Ua ʻa Sioné ki he “fineʻeiki kuo filí mo ʻene fānaú” (2 Sione 1:1). ʻOku ʻikai ʻiloʻi pe naʻe lea ʻa Sione ki hono fāmilí pe kulupu pau ʻe taha ʻo e kakaí pe naʻe lea ki he Siasí fakakātoa ʻi he lea fakatātā.

Naʻe tohi ʻe ʻEletā Pulusi R. Makongikī ʻo e Kōlomu ʻo e Kau ʻAposetolo ʻe Toko Hongofulu Mā Uá, mahalo ko e 2 mo e 3 Sioné ko ha ngaahi tohi ia ʻa Sione ki he mēmipa ʻo hono fāmili ofí (vakai, Doctrinal New Testament Commentary, 3 vols. [1965–73], 3:409–10, 12–14).

Pea ʻoku malava pē ʻuhinga ʻa e kupuʻi lea “fineʻeiki kuo filí” ki ha haʻofanga faka-Kalisitiane (vakai, 2 Sione 1:13). Ko e foʻi lea faka-Kalisi ki he siasí ko e fakaefefine, pea naʻe angamaheni ke ʻuhinga ki he Siasí ko ha fefine (vakai, ʻEfesō 5:25–27, 32; Liliu ʻa Siosefa Sāmitáa, Fakahā 12:1–3, 7 [ʻi he Fakahinohino ki he Folofolá, scriptures.lds.org]; Fakahā 19:7–8).

Hangē ko e 1 Sioné, ʻoku mahino ne fai ʻe Sione e tohi ko ʻení ke tali ki he ngaahi akonaki hala ko ia naʻe ʻikai haʻu moʻoni ʻa Sīsū Kalaisi ki he māmaní ʻi he kakanó. Naʻá ne fakamatalaʻi ko e kāingalotu ne nau akoʻi naʻe ʻikai maʻu ʻe Kalaisi ha sino fakamatelié ʻoku totonu ke ʻoua naʻa tali kinautolu ki ha fale ʻa ha taha pe haʻofanga (vakai, 2 Sione 1:7–10).

Naʻe fakatokanga ʻa Sione ʻi he tohí ni fekauʻaki mo e kau akonaki loi naʻe hū mai ki he Siasí. Naʻá ne faleʻi e kāingalotu ʻo e Siasí ke ʻoua te nau tokanga pe feohi mo e niʻihi fakafoʻituitui ko ʻení.

2 Sione 1. ʻOku fakamanatu ʻe Sione ki he Siasí ʻa e fekau ke feʻofaʻakí. ʻOkú ne fakatokanga telia e kau akonaki loi mo kākā ʻi he Siasí pea faleʻi e kau mēmipa ʻo e Siasí ke ʻoua naʻa fakaʻatā ke nau kei nofo ʻi he haʻofangá.