2 Pita

Naʻe poupouʻi ʻe he ʻAposetolo ko Pitá e Kāingalotú ke fakatupulaki ʻi heʻenau ʻilo kia Sīsū Kalaisí ʻi he feinga ke hangē pē ko Iá. Naʻe fakatokanga foki ʻa Pita ʻe takihalaʻi ʻe he kau palōfita mo e kau akonaki loí e kakaí. Naʻá ne kikite ʻe manukiʻi ʻe he kau faiangahalá ʻa e kau māʻoniʻoní ʻi he ngaahi ʻaho fakaʻosí, ʻi heʻenau tui ʻe foki mai ʻa Sīsū Kalaisí. Naʻe poupouʻi ʻe Pita e Kāingalotú ke teuteu faivelenga ki he Hāʻele ʻAnga Ua Mai ʻa e Fakamoʻuí.

Fakakaukau ki he ngaahi ʻulungaanga ʻokú ke saiʻia ai ʻi ha mēmipa ʻo e fāmilí pe kaungāmeʻa. ʻOkú ke tui nai te ke lava ʻo fakatupulaki ha ngaahi ʻulungaanga lelei tatau pē? Kapau ko ha finemui koe, fakakaukau ki he kaveinga ʻo e Kau Finemuí, ko e konga ʻoku pehē: “Ko e ngaahi ʻofefine kitautolu ʻo ʻetau Tamai Hēvaní, ʻokú Ne ʻofa ʻiate kitautolu, pea ʻoku tau ʻofa ʻiate Ia.” Fakakaukau ki he ngaahi tuʻunga ʻulungaanga mahuʻinga ʻi he kaveingá ni, tautautefito ki he natula faka-ʻOtuá.

Tatau ai pē pe ko ha finemui pe talavou koe, ko e hā e ʻuhinga ʻo e “natula faka-ʻOtuá” kiate koé?

Naʻe tohi ʻe he ʻAposetolo ko Pitá ʻa e tohí ni ki he kāingalotu ʻo e Siasí ʻa ia ne nau tui kia Sīsū Kalaisí. Hangē ko ia ʻoku lekooti ʻi he 2 Pita 1:1–4, naʻá ne akoʻi kinautolu te nau lava ʻo “kau … ʻi he anga ʻa e ʻOtuá” (veesi 4). ʻOku ʻuhinga e kupuʻi lea “natula ʻa e ʻOtuá” ki he ngaahi ʻulungaanga ʻo e Tamai Hēvaní mo Sīsū Kalaisí.

Lau e 2 Pita 1:5–7, ʻo kumi ha niʻihi ʻo e ngaahi ʻulungaanga natula faka-ʻOtua ʻo e Tamaí mo e ʻAló. Hiki ʻi he saati ʻi laló, ʻa e ngaahi ʻulungaanga ʻokú ke maʻu ʻi he potufolofolá. Hili iá pea fakafuofuaʻi ʻi he meʻafua 1 ki he 10, e anga hoʻo ongoʻi ki hoʻo faivelengá ʻi hoʻo feinga ke maʻu ʻa e ngaahi ʻulungaanga fakalangi ko ʻení ʻi hoʻo moʻuí (1 = ʻIkai feinga ke maʻu; 10 = Feinga faivelenga ke maʻu). ʻOku ʻosi hiki atu ʻa e ʻulungaanga faka-ʻOtuá. ʻOku ʻuhinga e lea faʻa taʻofi ʻi he veesi 6 ki he mapuleʻi kitá.

Lau e 2 Pita 1:8–11, ʻo kumi e ngaahi tāpuaki ʻe lava ke maʻu ʻe kinautolu ʻoku faivelenga ʻi hono fakatupulaki e ngaahi ʻulungaanga fakalangi ʻo e Tamai Hēvaní mo Sīsū Kalaisí. ʻOku ʻuhinga e kupuʻi lea “ke fakatuʻumaʻu homou uí mo homou filí” ʻi he veesi 10 te ke maʻu lolotonga hoʻo ʻi he moʻui fakamatelié ʻa e fakapapau pe palōmesi ʻa e ʻOtuá te ke maʻu ʻa e moʻui taʻengatá; ʻoku ʻuhinga ʻa Pita ki he meʻá ni ko ha “lea moʻoni lahi ʻo e kikité” (2 Pita 1:19).

ʻĪmisi

Prophet Joseph Smith

Naʻe akoʻi ʻe he Palōfita ko Siosefa Sāmitá ʻoku fakapapauʻi e ui mo e fili ʻa ha taha hili hono fakamoʻoniʻi ʻe ha taha ʻene faivelenga ki he ʻEikí: “‘Hili e tui ha tokotaha kia Kalaisi, fakatomala mei heʻene ngaahi angahalá, pea papitaiso ki he fakamolemoleʻi ʻo ʻene ngaahi angahalá pea maʻu ʻa e Laumālie Māʻoniʻoní, (ʻi he hilifaki ʻo e nimá), ʻa ia ko e ʻuluaki Fakafiemālié ia, pea tuku ke ne hokohoko atu ke fakavaivaiʻi ia ʻi he ʻao ʻo e ʻOtuá, ʻi he fiekaia mo fieinua ki he māʻoniʻoní, pea moʻui ʻaki ʻa e ngaahi folofola kotoa pē ʻo e ʻOtuá, pea he ʻikai fuoloa kuo folofola ʻa e ʻEikí kiate ia, Foha, ʻe hakeakiʻi koe. ʻI he fakamoʻoniʻi kakato ia ʻe he ʻEikí, pea ʻilo ʻoku fakapapau ʻa e tangatá ke tauhi kiate Ia ʻi he ngaahi fakatuʻutāmaki kotoa pē, pea ʻe ʻilo leva ʻe he tangatá ʻoku fakapapauʻi hono uiuiʻí mo e filí” (ʻi he History of the Church, 3:380).

ʻOkú ke pehē ko e hā ʻoku fakaangaʻi ai ʻe he kakai ʻe niʻihi e taʻu motuʻa ʻo e kau palōfitá mo e kau ʻaposetolo ʻe niʻihi? Te ke tali fēfē ki ha taha ʻokú ne pehē ʻoku fuʻu motuʻa e kau palōfitá mo e kau ʻaposetoló ke hoko ko ha kau taki lelei? ʻI hoʻo hokohoko atu ke ako e 2 Pita 1, kumi ha foʻi moʻoni fekauʻaki mo e kau palōfitá mo e kau ʻaposetoló ʻoku mahuʻinga ange ʻi honau taʻu motuʻá.

Hangē ko hono lekooti ʻi he 2 Pita 1:12–19, naʻe ʻiloʻi ʻe he ʻAposetolo ko Pitá ʻe vave haʻane mate, ko ia ai naʻá ne vahevahe ʻene fakamoʻoni pau kia Sīsū Kalaisí. Naʻá ne pehē ʻi heʻene fakamoʻoní “ʻa e lea moʻoni lahi ʻo e kikité” (2 Pita 1:19). ʻOku fakamatalaʻi mahino ange “ʻa e lea moʻoni lahi ʻo e kikite” ko ʻení ʻi he Tokāteline mo e Ngaahi Fuakava 131:5 ko e ʻilo ʻoku lava ke maʻu ʻe ha taha ʻi he moʻuí ni ʻi ha fakahā “kuo fakamaʻu hake ia ki he moʻui taʻengatá.” ʻOku toe ʻuhinga foki ʻeni ki “[hono fakapapauʻi] homou uí mo homou filí” (2 Pita 1:10), ʻa ia naʻá ke ako ki ai ʻi he konga ʻuluaki ʻo e 2 Pita 1.

Lau e 2 Pita 1:20–21, ʻo kumi e meʻa naʻe akoʻi ʻe Pita fekauʻaki mo e fatongia ʻo e “kau tangata māʻoniʻoni ʻo e ʻOtuá,” pe ko e kau palōfitá. Fakatokangaʻi ange ʻoku pehē ʻe he Liliu ʻa Siosefa Sāmitá, 2 Pita 1:20, “ʻI hono ʻuluaki ʻiloʻi ʻení, ʻoku ʻikai foaki mai ha kikite ʻo e folofolá ʻi ha faʻahinga loto fakatāutaha ʻa e tangatá.”

Fakatefito ʻi he meʻa naʻe akoʻi ʻe Pitá, te tau lava ʻo ʻiloʻi ʻa e moʻoni ko ʻení: ʻOku maʻu ʻe he kau palōfitá ʻa e folofolá ʻi he Laumālie Māʻoniʻoní. (Mahalo te ke fie tohi pe fakaʻilongaʻi ʻeni ʻi hoʻo folofolá.) Ko e folofolá ko e “ngaahi lea ia kuo tohi pe lea ʻaki” (Fakahinohino ki he Folofolá, “Folofolá,” scriptures.lds.org; vakai foki, T&F 68:2–4).

Kuo ʻosi fakamafaiʻi ha folofola ʻe niʻihi. Ko e ngaahi tohi fakamafaiʻí “ko e fakatahataha ia ʻo ha ngaahi tohi toputapu ʻoku ʻiloa, pea lau ʻoku falalaʻanga. ʻOku ui ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e ngaahi tohi ko iá ko e ngaahi tohi tapu ʻa e Siasí pea ʻoku kau ki ai ʻa e Fuakava Motuʻa mo e Fuakava Foʻoú, ko e Tohi ʻa Molomoná, ko e Tokāteline mo e Ngaahi Fuakavá, mo e Mataʻitofe Mahuʻingá” (Fakahinohino ki he Folofolá, “Ngaahi Tohi Folofola Fakamafaiʻí,” scriptures.lds.org).

ʻĪmisi

Elder Dallin H. Oaks

ʻI hoʻo lau e fakamoʻoni ko ʻeni ʻa ʻEletā Tāleni H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá, kumi ʻene fakamoʻoni ʻoku hokohoko atu ke maʻu ʻe he kau palōfitá ʻa e folofolá: “Ko e laine ʻo e mafai ʻo e lakanga fakataulaʻeikí ko e founga ia kuo folofola mai ai e ʻOtuá ki Heʻene fānaú ʻo fakafou he ngaahi tohi folofolá he kuohilí. Pea ko e founga ia ʻokú Ne lolotonga folofola mai aí ʻo fakafou ʻi he ngaahi akonaki mo e faleʻi ʻa e kau palōfita mo e kau ʻaposetolo moʻuí mo e kau taki kehe kuo ueʻi fakalaumālié” (“Ongo Founga ʻo e Fetuʻutakí,” Ensign pe Liahona, Nōvema 2010, 84).

Fakakaukau ki he mahuʻinga ʻo hono ʻiloʻi naʻe ngāue ʻaki pea ʻoku kei ngāue ʻaki ʻe he ʻOtuá ʻa e kau palōfitá ke ʻomi e folofolá ki Heʻene fānaú.

1. Tali ‘a e ngaahi fehuʻi ko ‘ení ‘i hoʻo tohinoa ako folofolá:

   1. Ko e hā ha ngaahi potufolofola, mei he kau palōfita ʻo e kuonga muʻá pe mei he kau palōfita he ʻaho ní, kuó ne kaunga ki hoʻo moʻuí?

   2. Kuo tāpuekina fēfē koe ʻi he ngaahi potufolofola ko iá?

Toe fakakaukau ki he fakamoʻoni ʻa ʻEletā ʻOakesí pea fakasio ha faingamālie ʻi he ngaahi ʻaho ka hoko maí ke fakamoʻoni ai ki he niʻihi kehé, ʻo hangē ko e fakahinohino ʻa e Laumālié, fekauʻaki mo e moʻoni ʻo e kau palōfitá mo e mahuʻinga ʻo hono maʻu mo ako e folofolá.

Ko e hā nai ʻe fili ai e kakaí ke faiangahalá naʻa mo e taimi ʻoku nau ʻilo ai ʻoku hala e meʻa ʻoku nau faí?

ʻOku tau lau ʻi he 2 Pita 2 naʻe fakatokanga ʻa e ʻAposetolo ko Pitá ki he Kāingalotú fekauʻaki mo e kakai ʻe feinga ke kākaaʻi kinautolú. ʻI hoʻo ako e 2 Pita 2, kumi e ngaahi moʻoni ʻe lava ʻo tokoni atu ke ke ʻiloʻi mo fakaʻehiʻehi ai mei he ngaahi kākā ʻoku iku ki he angahalá.

Lau e 2 Pita 2:1–3, ʻo kumi e fakatokanga ʻa Pita kau kiate kinautolu ʻe feinga ke kākaaʻi e Kāingalotú. Ko e “ngaahi hē fakamalaʻiá” (2 Pita 2:1) ko e ngaahi akonaki hala mo fakatupu ʻauhá ia.

Ko ha moʻoni ʻe taha te tau lava ʻo ako mei he ngaahi veesi ko ʻení ʻoku feinga e kau loí ke kākaaʻi kitautolu.

Lau ʻa e fakamatala ko ʻeni ʻa ʻEletā M. Lāsolo Palati ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻo kumi e meʻa ʻoku akoʻi ʻe he kau akonaki loí he ʻahó ni ke lava ʻo takihalaʻi kitautolú:

ʻĪmisi

Elder M. Russell Ballard

“Ko e kau palōfita loí mo e kau akonaki loí ʻa kinautolu ʻoku nau fakahā ko e tokotaha loi mo kākā ʻa e Palōfita ko Siosefa Sāmitá; ʻoku nau fakafepakiʻi ʻa e ʻUluaki Mata Meʻa-Hā-Maí ʻo pehē ne ʻikai ke hoko. ʻOku nau fakamatala ko e Tohi ʻa Molomoná mo e ngaahi folofola kehe kuo fakamafaiʻí ʻoku ʻikai ko ha lēkooti folofola ia mei onoʻahó. ʻOku nau toe feinga foki ke toe fakaʻuhingaʻi ʻa e natula ʻo e Toluʻi ʻOtuá, pea ʻoku nau fakaʻikaiʻi ʻa e pehē naʻe ʻomai pea ʻoku hokohoko atu hono ʻomai ʻe he ʻOtuá ha ngaahi fakahā he ʻahó ni ki Heʻene kau palōfita kuo fakanofo pea hikinimaʻí.

“Ko e kau palōfita mo e kau akonaki loí ʻa kinautolu ʻoku feinga fielahi ke ʻomi ha ngaahi fakaʻuhinga foʻou ki he folofolá ke fakahaaʻi ʻoku ʻikai totonu ke tali e ngaahi tohi toputapú ni ko e ngaahi lea ʻa e ʻOtuá ki Heʻene fānaú, ka ko e ngaahi lea ʻo e kau tangata ne ʻikai ueʻi fakalaumālie, ʻo fakangatangata ʻi heʻenau fakakaukau mo e ʻilo fakapalatahá. Ko ia ai, naʻa nau fakakikihi ʻoku fie maʻu ha fakaʻuhinga foʻou ki he ngaahi folofolá pea ʻoku nau feʻunga makehe ke fai ʻa e fakaʻuhinga ko iá.

“Mahalo ko e meʻa fakamalaʻia tahá ko ʻenau fakaʻikaiʻi ʻa e Toetuʻu mo e Fakalelei ʻa Sīsū Kalaisí, ʻo nau pehē he ʻikai ke lava ʻe ha ʻOtua ʻo fakahaofi kitautolu. ʻOku nau fakafisingaʻi ʻa e fie maʻu ʻo ha Fakamoʻuí. ʻI hono fakanounoú, ʻoku feinga ʻa e kau kākā ko ʻení ke toe fakaʻuhinga foʻou ʻa e ngaahi tokāteline ʻo e Siasí ke feʻunga mo ʻenau ngaahi fakakaukau pē ʻanautolú, pea hoko ai ke fakaʻikaiʻi ʻa Kalaisi mo Hono fatongia faka-Mīsaiá.

“Ko e kau palōfita loí mo e kau akonaki loí ʻa kinautolu foki ʻoku nau feinga ke liliu ʻa e ngaahi tokāteline fakalaumālie mei he ʻOtuá, ʻa ia ʻoku nau maluʻi ai ʻa e toputapu ʻo e nofo-malí, natula fakalangi ʻo e fāmilí, mo e tokāteline mahuʻinga ʻo e angamaʻa fakatāutahá. ʻOku nau taukaveʻi ha toe fakaʻuhinga ki he angamaʻá ke fakatonuhiaʻi ʻa e feʻauakí, tonó, mo e ngaahi vā fetuʻutaki fakahomosekisualé. ʻOku poupouʻi tauʻatāina ʻe he niʻihi ʻa e fakalao ʻo e ngaahi mali fakahomosekisualé” (“Beware of False Prophets and False Teachers,” Ensign, Nov. 1999, 63–64).

Fakakaukau ki he ngaahi taimi mahalo naʻá ke fehangahangai ai mo e ngaahi akonaki pe ngaahi pōpoaki mei he kau akonaki loí. Ko e hā ʻoku tokoni ai ke ʻiloʻi e ngaahi pōpoaki mo e ngaahi akonaki ʻa e kau akonaki loí?

ʻOku tau lau ʻi he 2 Pita 2:4–17 ha ngaahi sīpinga ʻo e meʻa naʻe hoko ki he kakai naʻe muimui ki he kau akonaki loí ʻi he kuohilí, kau ai ʻa kinautolu naʻe muimui ʻia Sētane ʻi he maama fakalaumālié, ko e kakai naʻe moʻui ʻi he taimi ʻo Noá, mo e kakai ʻo Sōtoma mo Komolá. Naʻe ʻomi foki ʻe Pita ha ngaahi sīpinga ʻo ha niʻihi fakafoʻituitui naʻe ʻikai tākiekina ʻe he kau akonaki loí, hangē ko Noa mo Loté. Naʻe fakamatalaʻi leva ʻe Pita ʻa e ʻulungaanga kovi ʻo e kau akonaki loí.

ʻĪmisi

worm on hook

ʻOku maʻu fēfē ʻe ha tangata toutai ʻa e iká?

ʻOku tatau ʻa e ngaahi founga ʻa ha tangata toutai ki hono maʻu e iká mo e kau akonaki loí. Lau e 2 Pita 2:18–19, ʻo kumi e founga ʻoku fakalotoʻi ai ʻe he kau akonaki loí e Kāingalotú ke muimui ki heʻenau ngaahi akonakí.

Ko e hā e founga ʻoku hangē ai e ngaahi akonaki ʻa e kau palōfita mo e kau akonaki loí ko ha tauhele taumātaʻu pe mounú?

ʻOku tau ako ʻi he 2 Pita 2:19 ʻoku talaʻofa ʻe he kau akonaki loí ʻa e tauʻatāiná. ʻI hono fakalea ʻe tahá, ʻoku nau akoʻi ʻoku iku ʻa e angahalá ki ha tauʻatāina lahi ange, kae ʻikai ko e talangofua ki he ngaahi fekaú.

ʻOku tau lava ʻo ako mei he ngaahi veesi ko ʻení ʻoku feinga e kau akonaki loí ke kākaaʻi kitautolu ki he tui ʻoku iku ʻa e angahalá ki ha tauʻatāina lahi angé.

Toe lau e veesi 19 ʻo kumi e meʻa ʻoku hoko ki he kakai ʻoku ikunaʻi ʻe he ngaahi akonaki loí mo e angahalá.

2. Tohi ʻi hoʻo tohinoa ako folofolá, ha ngaahi sīpinga ʻe ua pe tolu ʻo e ngaahi akonaki hala ʻoku ngalingali ʻokú ne tuʻuaki e tauʻatāiná kae ngalingali ke iku ki he nofo pōpulá.

Lau e 2 Pita 2:20–22, ʻo kumi e meʻa naʻe akoʻi ʻe Pita fekauʻaki mo kinautolu ʻoku toe foki ki he angahalá hili ʻenau hao mei aí.

3. Tali ‘a e ngaahi fehuʻi ko ‘ení ‘i hoʻo tohinoa ako folofolá:

   1. ʻOkú ke pehē ko e hā ʻe ʻahiʻahiʻi ai ʻa kinautolu kuo “hao mei he ngaahi ʻuli ʻo māmaní ʻi he ʻiloʻi ʻa e ʻEikí mo e Fakamoʻui ko Sīsū Kalaisí” (2 Pita 2:20) ke toe foki ki heʻenau ngaahi founga angahalaʻiá?

   2. Ko e hā ha faleʻi te ke fai ke tokoniʻi ha taha ke kei tui faivelenga kia Sīsū Kalaisi mo ʻEne ongoongoleleí kae ʻikai toe foki ki he ngaahi angahala kimuʻá?

ʻI hono fakaʻosi ʻe he ʻAposetolo ko Pitá ʻa e tohi ko ʻení, mahalo ko e taha ʻo ʻene ngaahi fakamoʻoni fakaʻosi kuo tohí, naʻá ne fakamanatu ki he Kāingalotú ʻa e Hāʻele ʻAnga Ua Mai ʻa Sīsū Kalaisí pea akoʻi ange e founga ke nau teuteu ai ki aí. Hangē ko hono lekooti ʻi he 2 Pita 3:1–9, naʻá ne akoʻi ʻe manukiʻi mo lumolumaʻi ʻe he kakai ʻe niʻihi ʻi he ngaahi ʻaho fakaʻosí ʻa kinautolu ʻoku tui ki he Hāʻele ʻAnga Ua Maí.

Lau e 2 Pita 3:10–14, ʻo kumi e meʻa naʻe akoʻi ʻe Pita fekauʻaki mo e Hāʻele ʻAnga Ua Maí. ʻOku ʻuhinga ʻa e foʻi lea ʻulungaanga ʻi he veesi 11 ki he tōʻongá pea ʻoku ʻuhinga e “holi atu” ʻi he veesi 12 ki he holi fakamātoato ki ha meʻa.

Ko e hā e faleʻi naʻe fai ʻe Pita ki he Kāingalotú ke teuteuʻi kinautolu ki he Hāʻele ʻAnga Ua Maí?

ʻOku ʻuhinga e kupuʻi lea “taʻe ha ʻila, mo taʻehalaia” ʻi he veesi 14 ki he maʻa mei he angahalá. Ko kinautolu ʻoku maʻa mei he angahalá kuo nau fakalelei ki he ʻOtuá, pe toe fakafoki ki he uouangataha mo e faaitaha mo Iá, pea te nau maʻu e mālōlō mo e Fakamoʻuí ʻi Heʻene hāʻele maí. ʻOku tau ako mei he ngaahi akonaki ʻa Pitá te tau lava ʻo teuteu ki he Hāʻele ʻAnga Ua Mai ʻa e Fakamoʻuí ʻi he moʻui faka-ʻOtuá pea tokanga fakamātoato ki Heʻene Hāʻele Maí. Fakakaukau ke hiki pe fakaʻilongaʻi e tefitoʻi moʻoni ko ʻení ʻi hoʻo folofolá ofi ki he 2 Pita 3:11–14.

Ko e hā ha ngaahi meʻa te tau lava ʻo fai ke moʻui faka-ʻOtua ai ʻi heʻetau tokanga fakamātoato ki he Hāʻele ʻAnga Ua Maí?

ʻOku tau lau ʻi he 2 Pita 3:15–18 naʻe fakahaaʻi ʻe Pita naʻe faingataʻa ke mahino ha niʻihi ʻo e ngaahi akonaki ʻa Paulá. Naʻá ne toe fakatokanga foki fekauʻaki mo e tō ki he faiangahalá. Naʻá ne fakaafeʻi ʻa e Kāingalotú ke “tupulekina ʻi he ʻofa, pea mo e ʻilo ki hotau ʻEikí” (2 Pita 3:18).

4. Hiki ʻa e fakamatala ko ʻení ʻi lalo ʻi he ngaahi ngāue ke fai ʻi he ʻahó ni ʻi hoʻo tohinoa ako folofolá:

   Kuó u ako ʻa e 2 Pita peá u fakakakato ʻa e lēsoni ko ʻení ʻi he (ʻaho).

   Ko e ngaahi fehuʻi, ngaahi fakakaukau, mo e ngaahi mahino makehe ʻoku ou fie vahevahe mo ʻeku faiakó: