“Li na’leb’ chirix li Najter Chaq’rab’,” Eb’ li Esilal sa’ li Najter Chaq’rab’ (2022)
“Li na’leb’ chirix li Najter Chaq’rab’,” Eb’ li Esilal sa’ li Najter Chaq’rab’
Li na’leb’ chirix li Najter Chaq’rab’
Eb’ lix yeechi’ihom li qaChoxahil Yuwa’ reheb’ li ralal xk’ajol junxil
Li xb’een raqal li Santil Hu, a’an li Najter Chaq’rab’. Li loq’laj hu a’in kitz’iib’aak sa’ najter q’e kutan, naq maji’ nayo’la li Jesukristo. Wankeb’ li seraq’ li nokoxtenq’a chixpaab’ankil li Jesukristo. Naxk’ut chiqu naq chiqajunilo wanko sa’ xjunkab’al li qaChoxahil Yuwa’ ut naq a’an naxraheb’ li ralal xk’ajol.
Deuteronomio 7:7–9; Isaias 45:10–12
Sa’ li Najter Chaq’rab’, Jehova malaj Qaawa’ yeeb’il re li Jesukristo. A’an naxtaaqe lix taqlahom lix Choxahil Yuwa’. Chalen chaq xkutankil laj Adan ut li xEva, li qaChoxahil Yuwa’ naxtaqla li Qaawa’ Jesukristo chiraatinakileb’ lix profeet. Li qaChoxahil Yuwa’ naxtaqla li Santil Musiq’ej re qatenq’ankil chixnawb’al naq yaal li raatin li profeet.
Exodo 6:2–3; 2 Kronikas 20:20; Amos 3:7; 2 Pedro 1:21; Moises 2:1
Li Qaawa’ kixyeechi’i re li profeet aj Abraham ut li xSara, li rixaqil, naq lix junkab’aleb’ te’k’iiq ut te’rosob’tesi chixjunil li ruchich’och’. Laj Jakob, li rimameb’, k’a’jo’ xnimal xjunkab’al ut ke’ok choq’ nimla tenamit. Neke’xk’ab’a’in lix junkab’al laj Israel, malaj eb’ laj Israelita. Eb’ li profeet ke’xk’ut chiruheb’ naq te’iloq chi uub’ej toj sa’ li kutan naq taak’ulunq li Jesukristo.
Genesis 15:5–6; 17:1–8; Deuteronomio 18:15; Isaias 7:14
Wankeb’ naab’al li seraq’ sa’ li Najter Chaq’rab’ li neke’xk’ut chan ru naq li Qaawa’ kixb’aanu chixjunil kixyeechi’i reheb’ laj Israelita.
Genesis 9:13–17; Jeremias 11:4–5; Hebreos 11:1–35
Naq eb’ laj Israelita ke’rab’iheb’ li profeet ut ke’xpaab’eb’ li taqlahom, ke’tenq’aak xb’aan li Qaawa’. Naq ink’a’ ke’ab’in, ink’a’ kiru chixtenq’ankileb’.
Deuteronomio 11:26–28; Job 36:11–12
Laa’at jun komon sa’ xjunkab’al li qaChoxahil Yuwa’. Chaab’il xch’ool li qaChoxahil Yuwa’, ut a’an nakatxra. Wan li na’leb’ kixk’uub’ choq’ aawe. B’antiox re li Qaawa’ Jesukristo, naru tatsutq’iiq rik’in li qaChoxahil Yuwa’. Jo’ kik’utman chiruheb’ laj Israelita, naru taasik’ ru xpaab’ankil li Qaawa’ ut xpaab’ankileb’ lix taqlahom.