“Li Paswa,” Eb’ li Esilal sa’ li Najter Chaq’rab’ (2022)
“Li Paswa,” Eb’ li Esilal sa’ li Najter Chaq’rab’
Li Paswa
Kolb’il rix xb’aan li Qaawa’
Laj Farahon ink’a’ kiraj rach’ab’ankileb’ laj Israelita, jo’kan naq li Qaawa’ kixye re laj Moises naq tixtaqla jun chik li yajel. Li xb’een yo’lajenaq sa’ chixjunileb’ li junkab’al sa’ Egipto te’kamq, jo’kan ajwi’ li xb’een yo’lajenaq re chixjunileb’ lix xul.
Li Qaawa’ kixyeechi’i reheb’ laj Israelita naq wi te’xb’aanu li kixye, li yajel tixnumsiheb’ ut ink’a’ tixrahob’tesiheb’.
Li Qaawa’ kixye reheb’ laj Israelita naq chixjunileb’ li junkab’al tento te’xmayeja jun ral karneer teelom maak’a’ reek’, ut naq te’xb’on xb’een li rokeb’aaleb’ lix kab’l rik’in xkik’el li karneer.
Li Qaawa’ kixye reheb’ laj Israelita naq te’xk’uub’ ut te’xtzeka li ral karneer sa’ junpaat. Naq yooqeb’ chi wa’ak, tento naq ak tiqtooqeb’ ut yo’on wanqeb’ chi elk sa’ rochocheb’. Li Qaawa’ kixye naq wi te’xb’aanu a’in, eb’ li xb’een yo’lajenaq te’kole’q rix chiru li yajel.
Jo’ kixye li Qaawa’, kichal li yajel. Chixjunileb’ li xb’een yo’lajenaqeb’ sa’ Egipto ke’kam, jo’ ajwi’ li xb’een ralal laj Farahon. A’b’anan li yajel kinume’ chiru li junjunq kab’l b’ar wi’ b’onb’il xb’een li rokeb’aal rik’in xkik’el li karneer. Ke’kole’ rix li xb’een yo’lajenaqeb’ sa’ xyanqeb’ laj Israelita xb’aan naq ke’ab’in chiru li Qaawa’.
Naq laj Farahon kiril naq kikamsiik li ralal xb’aan li yajel, kixye re laj Moises ut laj Aaron naq te’xk’am chixjunileb’ laj Israelita ut naq te’elq chaq Egipto.
Ke’el chaq laj Israelita, a’b’an toj yoo xjosq’il laj Farahon. Kixch’utub’ lix teep aj pleet ut eb’ lix b’eleb’aal ut xkoheb’ chirixeb’ laj Israelita.
Eb’ laj Israelita ke’xxaqab’ rib’ chixk’atq li Kaqi Palaw. Toja’ naq kiwulak laj Farahon ut lix teep aj pleet. Naq eb’ laj Israelita ke’rileb’ chi chalk laj Egipto, ke’xuwak. A’b’an laj Moises kixye reheb’ laj Israelita naq li Qaawa’ tixkoleb’ rix.
Naq yookeb’ chi nach’ok laj Egipto, li Qaawa’ kixye re laj Moises naq tixtaqsi lix xuq’. Laj Moises kixtaqsi, ut li Qaawa’ kixjach ru li palaw. Eb’ laj Israelita ke’xq’ax ru li palaw chiru chaqi ch’och’. Ke’eelelik chiru laj Farahon ut lix teep aj pleet.
Li teep aj pleet aj Egipto xkoheb’ chirixeb’ laj Israelita. Naq kolb’il rix chixjunileb’ laj Israelita chixjunpak’al li palaw, li Qaawa’ kixkanab’ chi t’ane’k li ha’. Eb’ laj Egipto ke’kam sa’ li palaw.
Ach’ab’anb’ileb’ chik laj Israelita. Ke’b’ichan, ke’xajok, ut ke’b’antioxin chiru li Qaawa’. Junelik kijultiko’ reheb’ li Paswa jo’ xhoonal naq li Qaawa’ kixkoleb’ rix ut kirach’ab’eb’ sa’ Egipto.