“Lix yo’ob’tesinkil li ruchich’och’,” Eb’ li Esilal sa’ li Najter Chaq’rab’ (2022)
“Lix yo’ob’tesinkil li ruchich’och’,” Eb’ li Esilal sa’ li Najter Chaq’rab’
Genesis 1–2; Moises 1–3; Abraham 3–5
Lix yo’ob’tesinkil li ruchich’och’
Jun xchaq’al ru na’ajej choq’ reheb’ li ralal xk’ajol li qaChoxahil Yuwa’
Li qaChoxahil Yuwa’ kixk’ut li k’uub’anb’il na’leb’ re li kolb’a-ib’ sa’ choxa. Chiqajunil kiqajap li qe xb’aan xsahil qach’ool! Tooruuq chi k’ulunk sa’ ruchich’och’ re taqak’ul li qajunxaqalil. Naq wanko sa’ ruchich’och’, taqatzol xtaaqenkil li Ralal li Dios, li Qaawa’ Jesukristo. Li Qaawa’ kixyo’ob’tesi li ruchich’och’ chi b’eresinb’il xb’aan li Dios.
Genesis 1:1; Job 38:4–7; Moises 1:32–33; 2:1; Abraham 3:22–27
Sa’ xb’een li kutan, li Qaawa’ kixjach ru li saqen rik’in li aak’ab’. Kutan kixye re li saqen, ut q’ojyin kixye re li aak’ab’.
Genesis 1:3–5; Moises 2:3–5; Abraham 4:1–5
Sa’ xkab’ li kutan, kixjach ru li ha’ li wan sa’eb’ li choql sa’ choxa ut li wan sa’eb’ li ninqi palaw sa’ ruchich’och’.
Genesis 1:6–8; Moises 2:6–8; Abraham 4:6–8
Sa’ rox li kutan, li Qaawa’ kixyiib’eb’ li ninqi palaw ut li chaqi ch’och’. Palaw kixye re li ha’ ut ch’och’ kixye re li chaqi ch’och’. Kirutz’u’uji li ch’och’ rik’in li k’iila paay chi atz’um, ru che’, ki’il q’een, ut toon che’.
Genesis 1:9–13; Moises 2:9–13; Abraham 4:9–13
Sa’ xkaa li kutan, kixyo’ob’tesi li saq’e’ re saqeno’k chiru li kutan. Toja’ naq kixyo’ob’tesi li po ut eb’ li chahim re saqeno’k chiru li q’ojyin.
Genesis 1:14–19; Moises 2:14–19; Abraham 4:14–19
Sa’ ro’ li kutan, li Qaawa’ kixyo’ob’tesi li k’iila kar sa’ li palaw ut li k’iila xik’anel xul sa’ choxa. Kirosob’tesiheb’ li xul re te’k’ihanq ut kirosb’tesiheb’ li kar re te’xnujob’resi li ha’.
Genesis 1:20–23; Moises 2:20–23; Abraham 4:20–23
Sa’ xwaq li kutan, kixyo’ob’tesiheb’ li xul sa’ li ch’och’, eb’ li neke’b’eek ut eb’ li neke’xjukuki rib’.
Genesis 1:24–25; Moises 2:24–25; Abraham 4:24–25
Sa’ xwaq li kutan, li qaChoxahil Yuwa’ ut li Qaawa’ ke’kub’e toj sa’ li ruchich’och’. Ke’xyo’ob’tesi li winq ut li ixq jo’ chanru xjalam-uuch li Dios. Li qaChoxahil Yuwa’ kixye reheb’ naq te’ril rib’ chirib’il rib’ ut naq te’wanq xkok’al. Taqlanb’ileb’ ajwi’ li winq ut li ixq chirilb’al li ch’och’ ut eb’ li xul.
Genesis 1:26–27; Moises 2:26–27; Abraham 4:26–31; 5:7–8
Sa xch’ool li qaChoxahil Yuwa’ rik’in chixjunil li ke’xyo’ob’tesi. Sa’ xwuq li kutan, ke’hilan chaq chiru chixjunileb’ lix k’anjel. K’a’jo’ xch’ina-usal li ruchich’och’ ut nujenaq rik’in li yu’amej.