“Laj Elias ut eb’ laj tij re laj Bahal,” Eb’ li Esilal sa’ li Najter Chaq’rab’ (2022)
“Laj Elias ut eb’ laj tij re laj Bahal,” Eb’ li Esilal sa’ li Najter Chaq’rab’
1 Reyes 18
Laj Elias ut eb’ laj tij re laj Bahal
Lix profeet li Qaawa’ ut eb’ laj tij aj b’alaq
Toj maak’a’ xha’ li awa’b’ejihom re Israel. Li rey aj Ajab kixye re li tenamit naq te’xtaaqe jun pak’b’il dios, laj Bahal xk’ab’a’.
Li Qaawa’ kixtaqla laj Elias li profeet chirilb’al laj Ajab. Laj Elias kixb’oq chixjunil li tenamit chi taqe’k sa’ jun li tzuul. A’an kixye re li rey ut eb’ lix tij naq aran te’ril ani li tz’aqal Dios, ma li Qaawa’ malaj laj Bahal.
Laj Elias kixch’olob’ k’a’ru te’xb’aanu. A’an ut eb’ laj tij te’xmayeja jun teelom wakax chiru li artal, a’b’an moko te’xloch ta li xam. Ruuchil a’an, eb’ laj tij te’xtz’aama chiru laj Bahal naq tixloch. Toja’ naq laj Elias tixtz’aama chiru li Qaawa’ naq tixloch. Laj Elias kixnaw naq ka’ajwi’ li tz’aqal Dios tixloch li xam.
Eb’ laj tij re laj Bahal ke’xtz’aama chiru xdioseb’ chalen eq’la toj wa’leb, a’b’an maak’a’ kik’ulman. Laj Elias kixye reheb’ naq maare yoo chi wark laj Bahal, lix dioseb’.
Ke’josq’o’ laj tij, ke’pisk’ok sa’ xb’een li artal, ut ke’xjap re toj ewu. Ke’royb’eni naq lix dioseb’ taasumenq, a’b’an toj maak’a’ li xam.
Toja’ naq kitz’aq laj Elias. A’an kixyiib’ jun artal chiru li Qaawa’, kixpik jun li jul chixsutam, ut kixkawresi li mayej.
Laj Elias kixpatz’ re li tenamit naq te’xnujob’resi kaahib’ li barril, toja’ naq oxib’ sut te’xhoy li ha’ sa’ xb’een li si’ li wan chiru li artal. T’aqt’aq li si’ ut li artal. Nujob’resinb’il chik li jul chi ha’.
Laj Elias kitijok chiru li Qaawa’ re xk’utb’al lix wankilal li tz’aqal Dios. Kit’ane’ xxamlel li Qaawa’ ut kixk’at li mayej, li si’, li pek, ut li ha’. Li tenamit ke’xk’e reetal naq lix Dios laj Elias, a’an li tz’aqal Dios. Laj Elias kixtz’aama naq taaraqe’q li chaqi-eel, toja’ naq li Qaawa’ kixtaqla li hab’.