“Li profeet aj Jonas,” Eb’ li Esilal sa’ li Najter Chaq’rab’ (2021)
“Li profeet aj Jonas,” Eb’ li Esilal sa’ li Najter Chaq’rab’
Jonas 1–4
Li profeet aj Jonas
Xtzolb’al xpaab’ankil li ruxtaan li Qaawa’
Laj Jonas, a’an chaq profeet. Li Qaawa’ kixye re naq tixye reheb’ li kristiaan aj Ninive naq taasachmanq xtenamiteb’ wi ink’a’ te’xjal xk’a’uxl.
A’b’an li tenamit aj Ninive xik’ ke’rileb’ laj Israelita. Laj Jonas ink’a’ kiraj jultikank aatin chiruheb’. Jo’kan naq ki’ok sa’ jukub’ re xik chi najt rik’in li tenamit Ninive.
Naq wan sa’ li jukub’ laj Jonas, kitikla jun nimla kaq-sut-iq’. K’a’jo’ naq ke’xuwak li winq li wankeb’ sa’ li jukub’. Ke’xpatz’ re laj Jonas naq tixtz’aama chiru li Qaawa’ naq tixkoleb’.
Laj Jonas kixnaw naq li Qaawa’ kixtaqla li kaq-sut-iq’ xb’aan naq a’an yoo chi eelelik chiru xtaqlahom li Qaawa’. Laj Jonas kiraj xkolb’aleb’ li wankeb’ sa’ li jukub’. Kixye reheb’ naq wi te’xkut laj Jonas sa’ li palaw, taach’anaaq li kaq-sut-iq’.
Eb’ li winq ink’a’ ke’raj xkutb’al laj Jonas sa’ li palaw. Ke’xyal wulak sa’ li ch’och’, a’b’an q’axal kaw li kaq-sut-iq’. Toj reetal naq ke’xkut laj Jonas sa’ li palaw.
Kich’ana li kaq-sut-iq’. Toja’ naq kinuq’e’ laj Jonas xb’aan jun nimla kar.
Chiru oxib’ li kutan ut q’ojyin laj Jonas kikana sa’ xsa’ li nimla kar. Chiru li hoonal a’an, laj Jonas kitijok ut kixjal xk’a’uxl. Kiraj xb’aanunkil li k’a’ru us ut ab’ink chiru li Qaawa’. Li Qaawa’ kirab’i lix tij laj Jonas, ut kixtaqla li kar chixxa’awankil laj Jonas chiru li ch’och’.
Li Qaawa’ kixye wi’chik re laj Jonas naq taajultikanq aatin chiruheb’ li tenamit sa’ Ninive. Ki’ab’in laj Jonas. Xko’o aran Ninive ut kixye reheb’ li tenamit naq te’xjal xk’a’uxl malaj li Qaawa’ tixsach xtenamiteb’. Li rey ut eb’ li kristiaan ke’xjal xk’a’uxl. Li Qaawa’ kixkuyeb’ xmaak ut ink’a’ kixsach li tenamit Ninive.
A’b’an laj Jonas kiraho’ xch’ool naq kixk’e reetal naq moko sachb’ileb’ ta li kristiaan. Kixk’oxla naq moko xk’ulubeb’ ta naq te’k’uye’q xmaak.
Re xk’eeb’al xna’leb’ laj Jonas, li Qaawa’ kiraw jun li toon che’ re xk’eeb’al xmuheb’aal laj Jonas chiru li saq’e. Toja’ naq kikam li che’, ut laj Jonas kiraho’ xch’ool chirix.
Li Qaawa’ yoo chixk’utb’al chiru laj Jonas jun na’leb’ chirix li ralal xk’ajol. Laj Jonas kixtzol naq tento taaraho’q xch’ool naq eb’ li kristiaan ink’a’ neke’xjal xk’a’uxl ut naq taasaho’q xch’ool naq neke’xb’aanu.