“Laj Abraham ut laj Isaak,” Eb’ li Esilal sa’ li Najter Chaq’rab’ (2022)
“Laj Abraham ut laj Isaak,” Eb’ li Esilal sa’ li Najter Chaq’rab’
Genesis 17; 21–22
Laj Abraham ut laj Isaak
Jun yuwa’b’ej, jun alalb’ej, ut jun mayej
Kiyo’la li ralal laj Abraham ut li xSara, jo’ kixyeechi’i li Qaawa’. Laj Isaak ke’xk’ab’a’i.
Ke’xra laj Isaak. Ke’xk’ut chiru naq tixsik’ ru li us ut naq tixpaab’ li Qaawa’.
Li Qaawa’ kixyeechi’i re laj Abraham ut li xSara naq rik’in laj Isaak lix junkab’aleb’ taak’ihanq ut taarosob’tesi chixjunil li ruchich’och’. A’b’an, sa’ jun li kutan li Qaawa’ kixye re laj Abraham naq tixk’am laj Isaak toj sa’ li Tzuul Moria ut naq tixq’axtesi laj Isaak jo’ mayej.
Naq yookeb’ chi b’eek toj sa’ li tzuul, laj Isaak kixpatz’ b’ar wan li karneer li te’xmayeja. Laj Abraham kixye naq li Dios taatawoq re.
Sa’ xb’een li Tzuul Moria, laj Abraham kixyiib’ jun li artal ut kixk’e li si’ sa’ xb’een.
Jo’ kixtaqla li Qaawa’, laj Abraham kixpatz’ re laj Isaak naq tixyokob’ rib’ chiru li artal. Laj Isaak kixkanab’ rib’ sa’ ruq’ laj Abraham, jo’ chanru naq li Kolonel Jesukristo naxkanab’ rib’ chiru lix Yuwa’.
Naq ok re laj Abraham chixmayejankil laj Isaak, kirame’ xb’aan jun x’anjel li Qaawa’. Laj Abraham kixk’ut xpaab’aal chirix li Qaawa’. Laj Abraham kixnaw naq junelik tixtaaqe li Qaawa’.
Laj Abraham kixk’e reetal jun karneer t’ilt’o chaq lix xukub’ sa’ li k’ix. A’ li Dios li kik’ehok re li karneer choq’ re li mayejak.
Laj Abraham ut laj Isaak ke’xtzol naq li qaChoxahil Yuwa’ tixq’axtesi li Jesukristo, li Ralal jo’ mayej. Li Qaawa’ Jesukristo kixnaw naq laj Abraham wan xpaab’aal xb’aan naq ki’ab’in chiru. Laj Abraham kixpaab’ lix yeechi’ihom li Qaawa’ naq sa’ junaq kutan taak’ihanaq lix junkab’al jo’ chanru xk’ihal li chahim sa’ choxa.