“Lix musiq’anb’il matk’ laj Jose,” Eb’ li Esilal sa’ li Najter Chaq’rab’ (2022)
“Lix musiq’anb’il matk’ laj Jose,” Eb’ li Esilal sa’ li Najter Chaq’rab’
Lix musiq’anb’il matk’ laj Jose
Lix yalb’al jun junkab’al chixraab’al rib’ chirib’il rib’
Li xRakel ut laj Jakob ke’tijok chiru naab’al chihab’ re naq te’xk’ul junaq ralal. Li Qaawa’ kixsume xtijeb’ naq kiyo’la laj Jose. Laj Jose a’an li alalb’ej mas nawulak chiru laj Jakob, ut a’an kixk’e jun chaab’il b’aatal re laj Jose. Li lajeeb’ chi ras laj Jose ke’sowenak.
Naq wuqlaju chihab’ wan re laj Jose, kimusiq’aak rik’in jun matk’ b’ar wi’ yoo chixxokb’al li trigo sa’ li awimq rochb’eeneb’ li ras. Xaqxo kikana li b’aak’ chi trigo re laj Jose. A’ut eb’ li b’aak’ chi trigo reheb’ li ras ke’xhupub’ rib’ chiru li re laj Jose. Naq laj Jose kixseraq’i lix matk’ reheb’ li ras, ke’josq’o’ rik’in.
Moqon, laj Jose kiwan jun chik lix musiq’anb’il matk’. Sa’ li matk’ a’in, li saq’e, li po, ut junlaju chi chahim ke’xhupub’ rib’ chiru. Laj Jose kixseraq’i lix matk’ re lix junkab’al. Chanchan naq li matk’ a’in kiraj xyeeb’al naq laj Jose taajolominq sa’ xb’een li junkab’al. Jwal ke’josq’o’ li ras laj Jose. Eb’ lix matk’ ink’a’ ke’wulak chiruheb’.
Sa’ jun kutan eb’ li ras laj Jose wankeb’ chirix kab’l, yookeb’ chixch’olaninkileb’ li karneer. Laj Jakob kixtaqla laj Jose chirilb’aleb’.
Junjunqeb’ li ras laj Jose ke’raj xkamsinkil. Ke’xmaq lix b’aatal laj Jose ut ke’xkut laj Jose sa’ jun li jul.
Naq wan laj Jose sa’ li jul, eb’ li ras ke’xk’e reetaleb’ laj b’ehenel li yookeb’ chi xik sa’ Egipto. Eb’ li ras ke’xk’ayi laj Jose choq’ loq’b’il moos reheb’ laj b’ehenel chiru jun may chi tumin plaat.
Eb’ li ras laj Jose ke’xk’e xkik’el jun li chib’aat chiru lix b’aatal. Xkoheb’ rik’in laj Jakob, lix yuwa’eb’, ut ke’xk’ut li b’aatal chiru. Ke’tik’ti’ik chiru laj Jakob ut kixye re naq eb’ li k’iche’ xul ke’xkamsi laj Jose.
Laj Jakob kiyaab’ak xb’aan naq kixk’oxla naq kamenaq laj Jose.
A’b’an toj yo’yo laj Jose. Najt kiwan sa’ li tenamit Egipto, loq’b’il moos a’an.