“Laj Moises sa’ xb’een li tzuul Sinai,” Eb’ li Esilal sa’ li Najter Chaq’rab’ (2022)
“Laj Moises sa’ xb’een li tzuul Sinai,” Eb’ li Esilal sa’ li Najter Chaq’rab’
Exodo 19–20; 24; 31–34; Deuteronomio 4–7
Laj Moises sa’ xb’een li tzuul Sinai
Xtenq’ankileb’ li tenamit re naq taajultiko’q li Qaawa’ reheb’
Laj Moises ut eb’ laj Israelita ke’b’eek chiru li yamyookil ch’och’. Ke’wulak chiru jun nimla tzuul, Sinai xk’ab’a’.
Laj Moises kitaqe’ sa’ xb’een li tzuul re raatinankil li Qaawa’. Li Qaawa’ kixye re laj Moises naq kiraj aatinak rik’ineb’ laj Israelita.
Eb’ laj Israelita ke’nach’o rik’in roq li tzuul Sinai, ut li Qaawa’ kixsuti rix li tzuul rik’in jun choql. Li Qaawa’ wan sa’ xyi li choql. Ki’aatinak rik’ineb’ laj Israelita ut kixk’eheb’ xtaqlahom. Kichiiq’an li tzuul naq yoo chi aatinak.
Exodo 19:16–19; 20:1–17; Deuteronomio 4:12–13, 33; 5:4–5
Ke’xuwak laj Israelita. Ke’xpatz’ re laj Moises naq taaraatina li Qaawa’ re naq laj Moises truuq tixye reheb’ k’a’ru naraj li Qaawa’.
Laj Moises, rochb’een laj Aaron ut 70 chi xb’eenil aj Israelita, ke’taqe’ sa’ li tzuul re xk’ulb’al xkomon chik li raatin li Qaawa’. Li Qaawa’ kixk’ut rib’ chiruheb’.
Toja’ naq li Qaawa’ kixye re laj Moises naq tixkanab’eb’ li xb’eenil ut naq taataqe’q chik sa’ li tzuul. Laj Moises ki’ab’in chiru. Li Qaawa’ kiroksi li ru’uj li ruq’ re xtz’iib’ankil lix chaq’rab’ ut lix taqlahom chiruheb’ li perpookil pek. Chiru 40 kutan, li Qaawa’ kixk’ut naab’al li na’leb’ chiru laj Moises.
Naq wan laj Moises sa’ li tzuul Sinai, eb’ laj Israelita ke’titz’. Ke’xye re laj Aaron naq tixyiib’eb’ li pak’b’il dios re te’xloq’oniheb’ jo’ chanru ke’xb’aanu sa’ Egipto. Laj Aaron kixch’utub’ chixjunileb’ lix oor ut kixyiib’ jun wakax oor.
Eb’ laj Israelita ke’xloq’oni li wakax oor ut ke’xq’axtesi mayej chiru. Ke’xye naq a’an li wakax oor, maawa’ li Qaawa’, li kikolok reheb’ chiru Egipto.
Li Qaawa’ kixnaw naq eb’ laj Israelita yookeb’ chixloq’oninkil jun pak’b’il dios ut naq yoo chi sachk a’an sa’ xch’ooleb’. Kixtaqla laj Moises chi sutq’iik rik’ineb’ ut chixyeeb’al reheb’ naq te’xjal xk’a’uxl.
Laj Moises kikub’e chaq sa’ li tzuul Sinai ut kiril naq eb’ laj Israelita yookeb’ chixloq’oninkil li wakax oor. Jwal kijosq’o’. Moko kawresinb’ileb’ ta li kristiaan chixpaab’ankil li chaq’rab’ ut li taqlahom li kixtz’iib’a li Qaawa’. Laj Moises kixjoreb’ li perpookil pek ut kixsach li wakax oor. Kixtenq’aheb’ laj Israelita chixjalb’aleb’ xk’a’uxl ut chixjultikankil lix tz’aqal Dios.
Laj Moises kixtz’aama chiru li Qaawa’ naq tixkuy xmaakeb’ laj Israelita ut naq tixk’e wi’chik lix yeechi’ihom reheb’. Laj Moises kixye naq a’an tixjolomiheb’ ut tixtzoleb’.
Li Qaawa’ kixpatz’ re laj Moises naq tixyiib’ wi’chik li perpookil pek ut naq taataqe’q wi’chik sa’ li tzuul Sinai. Li Qaawa’ ki’ok wi’chik sa’ aatin rik’ineb’ laj Israelita, ut kixk’e reheb’ li Lajeeb’ chi Taqlahom.