“Li profeet aj Elias,” Eb’ li Esilal sa’ li Najter Chaq’rab’ (2022)
“Li profeet aj Elias,” Eb’ li Esilal sa’ li Najter Chaq’rab’
1 Reyes 16–18
Li profeet aj Elias
Lix paab’aal jun li na’b’ej ut lix sachb’a-ch’oolej li Qaawa’
Maak’a’ li hab’ sa’ li awa’b’ejihom re Israel, ut oso’k re li ha’. Li rey aj Ajab ut li xJesabel xik’ ke’rileb’ lix profeet li Qaawa’. Ke’xkamsi ajwi’ junjunq reheb’. Li rey ut li rixaqil ke’xtz’aama chiruheb’ li pak’b’il dios naq taachalq li hab’. A’b’an li profeet aj Elias kixye reheb’ naq li Qaawa’ ink’a’ tixtaqla li hab’ chiru k’iila chihab’.
Ke’josq’o’ li rey ut li rixaqil rik’in laj Elias. Li Qaawa’ kixye re laj Elias naq tixmuq rib’, xb’aan naq neke’raj xkamsinkil.
Li Qaawa’ kixb’eresi laj Elias sa’ roq jun li ha’, ut kixtaqlaheb’ li xik’anel xul chixk’amb’al chaq xtzakemq. A’ut xb’aan naq maak’a’ li hab’, kichaqik roq li ha’, ut maak’a’ chik xha’ laj Elias.
Li Qaawa’ kixb’eresi laj Elias toj rik’in jun ixq sa’ jun najtil tenamit. Laj Elias kixpatz’ ruk’a’ ut xwa. A’b’an, li k’a’ru wan re ka’ajwi’ natz’aqlok choq’ re a’an ut choq’ re lix yum yal chiru jun kutan chik.
Laj Elias kixnaw naq oso’k re xtzakemq li ixq. A’an kixyeechi’i re naq wi tixch’olani, li Qaawa’ tixk’e xtzakemq li ixq ut lix junkab’al toj reetal naq taachalq wi’chik li hab’.
Li ixq kixk’uub’ li wa choq’ re laj Elias. Toja’ naq kik’ihan lix aseeyt ut lix k’aj. Tz’aqal li wa choq’ re laj Elias ut lix junkab’al li ixq chiru k’iila kutan.
Moqon kiyajer ut kikam lix yum li ixq. A’an kixpatz’ re laj Elias k’a’ut naq li Qaawa’ kixb’aanu a’in.
Kiwan li tijonelil rik’in laj Elias. A’an kirosob’tesi lix yum li ixq ut kixpatz’ re li Qaawa’ naq tixk’e wi’chik xyu’am. Li ch’ina al ki’ok chi musiq’ak wi’chik, ut li ixq kixnaw naq laj Elias, a’an xprofeet li Qaawa’.