“Laj Job,” Eb’ li Esilal sa’ li Najter Chaq’rab’ (2021)
“Laj Job,” Eb’ li Esilal sa’ li Najter Chaq’rab’
Job 1–3; 19; 38–42
Laj Job
Xpaab’ankil lix rahom li Qaawa’
Chaab’il xch’ool laj Job, naxra li Qaawa’ ut naxpaab’ lix taqlahom. K’iiheb’ lix xul ut nim xb’ihomal laj Job, li rixaqil, ut lix kok’al lajeeb’eb’.
Li Qaawa’ kixkanab’ naq taayale’q rix xpaab’aal laj Job. Laj Job kixnumsi li ninqi ch’a’ajkilal.
Sa’ jun li kutan, ke’maq’e’ naab’al reheb’ lix xul laj Job. Moqon ke’k’at li ochoch sa’ xch’och’ laj Job, ut ke’kam chixjunileb’ lix moos ut lix xul. Toja’ naq jun kaq-sut-iq’ kixt’an li rochoch li ralal laj Job. Ke’kam chixjunileb’ lix kok’al laj Job chi sa’. Maak’a’ chik wan re laj Job ut li rixaqil, ka’ajwi’ xkawilal li roq ruq’.
Ra xch’ool laj Job ut li rixaqil. Kisach chixjunil chiruheb’, jo’eb’ ajwi’ lix kok’al. A’b’an toj wan xpaab’aal laj Job chirix li Qaawa’. Laj Job ink’a’ kixjit li Qaawa’ sa’ chixjunil li xk’ul.
Toja’ naq kiyajer laj Job. Xsiipo’ xtib’el ut q’axal ra wan. Laj Job ut li rixaqil ke’xpatz’ k’a’ut naq neke’xk’ul chixjunil li rahilal a’an.
Li Qaawa’ ki’aatinak rik’in laj Job ut kixk’ut chiru li ruchich’och’, eb’ li chahim, ut chixjunil li k’a’ru wan xyu’am. Li Qaawa’ kixk’e xna’leb’ laj Job. Chixjunil yo’ob’tesinb’il chaq re xtenq’ankileb’ li ralal xk’ajol li qaChoxahil Yuwa’ chi tzolok chirix li Jesukristo, li Ralal, ut chixtaaqenkil.
Laj Job kixjal xk’a’uxl ut kixpatz’ naq li Qaawa’ tixkuy xmaak. Kixye naq tixpaab’ li Qaawa’. Li Qaawa’ kixnaw naq narahe’ xb’aan laj Job. Kixk’irtesi laj Job ut kirosob’tesi rik’in xkomoneb’ chik lix kok’al ut kixk’ihob’resi lix b’ihomal.