“Laj David ut laj Goliat,” Eb’ li Esilal sa’ li Najter Chaq’rab’ (2022)
“Laj David ut laj Goliat,” Eb’ li Esilal sa’ li Najter Chaq’rab’
1 Samuel 17
Laj David ut laj Goliat
Xk’ulb’al jun nimla ch’a’ajkilal
Eb’ laj Filisteo yookeb’ chixpleetinkileb’ laj Israelita. Rajlal eq’la jun nimla winq aj Filistea, a’an aj Goliat xk’ab’a’, kixjap re chixyeeb’al reheb’ laj Israelita naq te’chalq chixpleetinkil. Jwal nim li roq laj Goliat chiru yalaq chik ani, ut jwal josq’. Jwal kaw lix kolb’a-ib’ aq’, kiwan xyok’leb’ ch’iich’, xjuch’juukil che’, ut xramleb’. Maajun kiraj pleetik rik’in.
Laj David, a’an jun saaj aj ilol karneer li kixpaab’ li Qaawa’. Eb’ li ras, a’aneb’ aj pleet sa’ li teep aj pleet aj Israelita. Sa’ jun li kutan, laj David kixk’am li tzakemq reheb’ li ras. Naq kiwulak sa’ xna’aj li teep aj pleet, kirab’i laj Goliat chixjapb’al re.
Laj David kixpatz’ reheb’ laj pleet k’a’ut naq maa’ani naxkol rix Israel. Ke’josq’o’ li ras ut ke’xye re naq taaxik chirilb’aleb’ li karneer. A’b’an laj David kixnaw naq li Qaawa’ tixk’ol rix Israel.
Li rey aj Sawlo kixnaw naq wan xpaab’aal laj David, jo’kan naq kixpatz’ naq taachalq rik’in. Laj David kixye re laj Sawlo naq moko naxxuwa ta xpleetinkil laj Goliat. Laj David kixch’olob’ naq jun sut naq yoo chirilb’aleb’ lix karneer, kixkamsi jun li kaqkojl ut jun li oso. Li Qaawa’ kixkol rix sa’ li hoonal a’an, ut laj David kixnaw naq li Qaawa’ tixkol rix wi’chik.
Laj Sawlo kixk’e lix kolb’a-ib’ aq’ re laj David. Mas nim chirix, jo’kan naq laj David moko kiroksi ta chik. Kixsik’ ru pleetik chi maak’a’ xkolb’a-ib’ aq’.
Laj David kixxok oob’ li kok’ pek ut kixk’eheb’ sa’ xb’oolx. Kixchap lix uul ut lix xuq’, xko’o chi pleetik rik’in laj Goliat.
Naq laj Goliat kiril laj David, a’an kixjap re ut kixse’e. Kixye naq jun saaj aj ilol karneer maajo’q’e taanumtaaq sa’ xb’een. Laj David kichaq’ok ut kixye naq wan xpaab’aal naq li Qaawa’ tixkol rix! Laj David kixye naq taanumtaaq sa’ xb’een laj Goliat re xk’utb’al lix nimal ru li Qaawa’.
Laj David kinach’o sa’ junpaat rik’in laj Goliat. Kixkut jun li pek rik’in lix uul. Kixket laj Goliat sa’ xpekem, ut li nimla winq kit’ane’ chi ch’och’. Li Qaawa’ kixtenq’a laj David chi numtaak sa’ xb’een laj Goliat us ta maak’a’ lix yok’leb’aal chi moko lix kolb’a-ib’ aq’.
Naq eb’ laj Filisteo ke’ril naq kamenaq laj Goliat, ke’eelelik xb’aan xxiweb’. Eb’ laj Israelita ke’numtaak sa’ li pleet. Laj David kixpaab’ li Qaawa’, ut li Qaawa’ kixkol rix Israel.