“Laj Jakob ut lix junkab’al,” Eb’ li Esilal sa’ li Najter Chaq’rab’ (2022)
“Laj Jakob ut lix junkab’al,” Eb’ li Esilal sa’ li Najter Chaq’rab’
Genesis 27–33
Laj Jakob ut lix junkab’al
Li Qaawa’ naxb’aanu li naxyeechi’i
Laj Jakob ki’el chaq sa’ rochoch re eelelik chiru laj Esau, li ras, li kijosq’o’ rik’in. Lix yuwa’ laj Jakob kirosb’tesi re tixtaw ut taasumlaaq rik’in jun ixq li kixra li Qaawa’ ut kixpaab’ lix taqlahom.
Naq yoo chi b’eek laj Jakob, li Qaawa’ kirula’ani sa’ k’utb’esinb’il matk’. Kixyeechi’i naq junelik taawanq rik’in laj Jakob. Laj Jakob kixyeechi’i naq tixk’e lix lajetq raqal chixjunil li tixk’ul re li Qaawa’.
Li Qaawaʼ kixyeechiʼi re laj Jakob naq teʼwanq naabʼal li ralal xkʼajol. Rik’ineb’ lix kok’al laj Jakob, teʼosobʼtesiiq li junkabʼal re li ruchichʼochʼ chixnawb’al ru li Kolonel. Lix junkab’al laj Jakob sa’ roso’jikeb’ li kutan, a’an lix junkab’al laj Israel nayehe’ re.
Genesis 28:3–4, 14; 1 Nefi 10:14
Laj Jakob kib’eek toj sa’ li ch’och’ Haran. Aran ki’ok chixraab’al jun ixq tiik xch’ool, xRakel xk’ab’a’.
Laj Jakob kixk’ulub’a trab’ajik chiru wuqub’ chihab’ chiru laj Laban, lix yuwa’ xRakel, wi laj Laban tixk’e xRakel choq’ rixaqil. Laj Laban kiwan sa’ aatin. Laj Jakob kitrab’ajik chiru wuqub’ chihab’.
A’b’anan, laj Laban kiraj naq xb’een taasumlaaq xLea, lix rab’in li asb’ej. Sa’ li sumlajik, laj Laban kixb’alaq’i laj Jakob re naq taasumlaaq rik’in xLea sa’ xna’aj xRakel. A’b’an laj Jakob toj naxra xRakel. Kixye naq chiru wuqub’ chik chihab’ taatrab’ajiq wi truuq taasumlaaq ajwi’ rik’in xRakel. Laj Laban kiwan sa’ aatin, ut ki’ok chi k’iik xjunkab’al laj Jakob.
Genesis 29:28–35; 30:3–13, 17–24; Jakob 2:27–30
Jwal kub’enaq kitoje’ laj Jakob xb’aan laj Laban. A’b’an li Qaawa’ kirosob’tesi laj Jakob rik’in k’iila xul, ut kixye re laj Jakob naq taasutq’iiq sa’ rochoch.
Genesis 30:31, 43; 31:1–7, 17–18
Naq yoo chaq chi sutq’iik, laj Jakob kirab’i naq chal re laj Esau rochb’een 400 chi winq re xk’ulb’al.
Sa’ xch’ool laj Jakob naq maare toj yoo xjosq’il laj Esau rik’in. Laj Jakob ki’ok xk’a’uxl chirix lix junkab’al, jo’kan naq kixk’ameb’ sa’ jun na’ajej re xkolb’aleb’ rix ut ki’ok chi tijok.
Laj Jakob kitijok chiru chixjunil li q’ojyin toj sa’ eq’la. Li Qaawa’ kirula’ani laj Jakob ut kirosob’tesi. Li Qaawa’ kixye re laj Jakob naq taa’ok choq’ jolominel sa’ xb’een naab’al li kristiaan. Li Qaawa’ kixk’e Israel choq’ xk’ab’a’ laj Jakob.
Moko najt ta chirix a’an laj Esau ut eb’ li rochb’een ke’xtaw laj Jakob ut lix junkab’al. Ink’a’ chik yoo xjosq’il laj Esau rik’in laj Jakob. A’an kixk’ul laj Jakob ut kixq’alu. K’a’jo’ xsahil xch’ool chirilb’al laj Jakob ut chixnawb’al ru xjunkab’al. Laj Jakob kisaho’ ajwi’ xch’ool chirilb’al laj Esau.
Li Qaawa’ kixb’aanu li kixyeechi’i re laj Jakob chiru chixjunil xyu’am. Laj Jakob kisutq’i sa’ rochoch rik’in xjunkab’al ut kikana aran. Chalen chaq a’an, laj Israel kik’ab’a’iik laj Jakob, ut lix junkab’al, a’aneb’ aj Israelita. Toj kixpaab’eb’ li taqlahom ut kixloq’oni li Qaawa’.