“Laj Noe ut lix junkab’al,” Eb’ li Esilal sa’ li Najter Chaq’rab’ (2022)
“Laj Noe ut lix junkab’al,” Eb’ li Esilal sa’ li Najter Chaq’rab’
Genesis 6–9; Moises 8
Laj Noe ut lix junkab’al
Li jukub’ kab’l, li b’uut’iha’, ut lix yeechi’ihom li Qaawa’
Laj Noe ut lix junkab’al ke’ab’in chiru li Qaawa’. Aj maakeb’ chixjunileb’ chik. Li Qaawa’ kixye re laj Noe naq chalk re jun b’uut’iha’ li tixnujob’resi li ruchich’och’ wi li kristiaan ink’a’ te’xjal xk’a’uxl.
Genesis 6:5–13; Moises 8:13–17
Laj Noe kixk’ut chiruheb’ li kristiaan naq li Qaawa’ naxraheb’ ut naraj naq te’xjal xk’a’uxl ut te’xpaab’ li Jesukristo. Ink’a’ ke’raj ab’ink.
Kiraho’ xch’ool laj Noe naq li kristiaan ink’a’ te’xjal xk’a’uxl. Li Qaawa’ kixye re laj Noe naq tixyiib’ jun nimla jukub’ kab’l. Li jukub’ kab’l tixkol rix lix junkab’al laj Noe chiru li b’uut’iha’.
Lix junkab’al laj Noe ke’xk’am li tzakemq chi sa’ li jukub’ kab’l. Li Qaawa’ kixtaqlaheb’ li xul sa’ ka’kab’il rik’in laj Noe. Eb’ li xul ke’ok sa’ li jukub’ kab’l, ut wuqub’ kutan chirix a’an, kichal li hab’.
Jo’ kixye li Qaawa’, yoo li hab’ chiru 40 kutan ut 40 q’ojyin. Li b’uut’iha’ kixnujob’resi li ruchich’och’.
Lix junkab’al laj Noe ut eb’ li xul sa’ li jukub’ kab’l ke’kole’ rix chiru li ha’.
Naq kiraqe’ li b’uut’iha’, li jukub’ kab’l kikana sa’ ch’och’. Laj Noe ut lix junkab’al ke’xyiib’ jun li artal re xloq’oninkil li Qaawa’ ut xb’antioxinkil re naq kixkoleb’ rix. Li Qaawa’ kixyeechi’i naq maajo’q’e chik tixnujob’resi li ruchich’och’ rik’in b’uut’iha’. Kixkʼe jun li kaqla saʼ choxa choq’ reetalil lix yeechi’ihom.