“Eb’ li rahilal sa’ Egipto,” Eb’ li Esilal sa’ li Najter Chaq’rab’ (2022)
“Eb’ li rahilal sa’ Egipto,” Eb’ li Esilal sa’ li Najter Chaq’rab’
Exodo 4–5; 7–12
Eb’ li rahilal sa’ Egipto
Li kixsik’ ru laj Farahon re xwech’b’al rix li Qaawa’
Laj Moises kixpaab’ li Qaawa’ ut kisutq’i aran Egipto. Laj Moises ut laj Aaron, li ras, ke’wulak rik’in laj Farahon ut ke’xpatz’ re naq taarach’ab’eb’ laj Israelita chi elk chaq aran Egipto. Kijosq’o’ laj Farahon ut kixye naq moko tixb’aanu ta. Kixmineb’ ru laj Israelita chi k’anjelak chi kaw.
Xmaak naq laj Farahon ink’a’ ki’ab’in chiru li Qaawa’, ke’majewaak laj Egipto rik’in ninqi rahilal. Xb’een, ke’kik’o’ ru chixjunileb’ li nima’ sa’ Egipto. Laj Moises kixpatz’ re laj Farahon naq taarach’ab’eb’ laj Israelita, a’b’an ink’a’ kiraj.
Chi jo’kan, li Qaawa’ kixtaqlaheb’ k’iila amoch sa’ Egipto. Ke’tam li amoch. Laj Farahon kixye naq taarach’ab’eb’ laj Israelita wi te’isiiq li amoch. Li Qaawa’ kirisiheb’ li amoch, a’b’an laj Farahon moko kirach’ab’eb’ ta laj Israelita. Toja’ naq li Qaawa’ kixtaqlaheb’ li suq ut li raxyaat.
Moqon, chixjunileb’ lix xuleb’ laj Egipto ke’kam, a’b’an maajun reheb’ lix xuleb’ laj Israelita kikam. Toja’ naq ke’rahob’tesiik laj Egipto rik’in sankil xox chiru xtib’eleb’.
Jun nimla kaq-sut-iq’ re kawil saqb’ach ut xam kiwulak Egipto. K’a’jo’ xnimal li xuwajel sachok.
A’b’an laj Farahon toj ink’a’ kirach’ab’eb’ laj Israelita. Toja’ naq li Qaawa’ kixtaqlaheb’ laj saak, ut ke’xk’ux chixjunil li tzakemaq sa’ li tenamit.
Toja’ naq kiwan li aak’ab’ chiru oxib’ kutan. Chiruheb’ li ninqi rahilal, laj Farahon kixye naq taarach’ab’eb’ raj laj Isrealita wi ta te’isiiq li ninqi rahilal, a’b’an yal tik’ti’ kixye.
Chirix beleeb’ li ninqi rahilal, laj Farahon toj maji’ narach’ab’eb’ laj Israelita. Li Qaawa’ kixye re laj Moises naq chal re jun chik nimla rahilal jwal xuwajel. Li Qaawa’ kixb’eresiheb’ ut kixkoleb’ rix laj Israelita naq yookeb’ chiroyb’eninkil li ach’ab’aak.