“Li rey aj David,” Eb’ li Esilal sa’ li Najter Chaq’rab’ (2022)
“Li rey aj David,” Eb’ li Esilal sa’ li Najter Chaq’rab’
1 Samuel 18–19; 31; 2 Samuel 1; 5; 11–12
Li rey aj David
Eb’ lix ch’a’ajkilal jun li rey
Li rey aj Sawlo, lix rey li tenamit Israel, kisach xch’ool naq laj David kinumta sa’ xb’een laj Goliat. Laj Sawlo kixk’ojob’ laj David choq’ aj taqlanel sa’ xb’eeneb’ lix teep aj pleet.
Laj David naxra li Qaawa’ ut junelik naraj xb’aanunkil li k’a’ru us. Eb’ laj Israel ke’xra laj David.
Laj Sawlo ki’ok chixsowenkil laj David, ut kixyal xkamsinkil. A’b’an laj David kixtaaqe li Qaawa’, ut li Qaawa’ kixkol rix chiru laj Sawlo.
K’iheb’ li pleet ke’wan wi’ laj Israelita. Sa’ jun li kutan, laj Sawlo ut eb’ li ralal ke’kamsiik sa’ li pleet. Laj David kixraheb’ ut kiraho’ xch’ool naq kirab’i resil lix kamikeb’. Eb’ laj Israelita ke’raj ru jun ak’ rey. Li Qaawa’ kixsik’ ru laj David choq’ rey. Sa xch’ooleb’ li tenamit.
1 Samuel 31:2–6; 2 Samuel 1:11–12; 5:1–5
Li Qaawa’ kirosob’tesi li rey aj David ut kixb’eresi. Chi tenq’anb’il xb’aan li Qaawa’, lix teep aj pleet aj David kinumta sa’ xb’eeneb’ li xik’ ke’ilok reheb’.
Sa’ jun kutan, naq laj David tento raj xko’o sa’ li pleetik, kikana sa’ rochoch. Kiril jun ixq jwal ch’ina-us. A’an xBetsabe xk’ab’a’, ut laj David kiraj sumlaak rik’in. A’b’an ak sumsu rik’in laj Urias, jun aj pleet sa’ xteep aj pleet aj David.
Laj David kiraj sumlaak rik’in xBetsabe, jo’kan naq kixtaqla laj Urias, lix b’eelom, sa’ jun li pleet re naq taakamsiiq.
Ka’ch’in chik chirix a’an, kiyehe’ re laj David naq kamenaq chik laj Urias. Laj David kixtaqlaheb’ lix moos chixk’amb’al xBetsabe sa’ rochoch, ut kisumla rik’in.
A’b’an kijosq’o’ li Qaawa’ xb’aan li kixb’aanu laj David. Li Qaawa’ kixtaqla laj Natan, jun li profeet, re xyeeb’al re laj David naq q’axal nim lix maak. Kiraho’ xch’ool laj David xb’aan li k’a’ru kixb’aanu re laj Urias ut xBetsabe. Kitijok ut kixkuy xsa’ re naq taakuye’q xmaak xb’aan li Qaawa’.