Seksen 105
Revelesen we Lod i bin givim tru long Profet Josef Smit, long Fising Reva, Misuri, long 22 Jun 1834. Anda long lidasip blong Profet, olgeta Sent blong Ohaeo mo ol nara eria, oli wokbaot i go long Misuri olsem wan grup, we afta, oli save long hem olsem Saeon Kamp. Stamba tingting blong olgeta i blong wokbaot wetem ol Sent blong Misuri we oli ronemaot olgeta oli gobak long Jakson Kaonti. Ol man Misuri we oli bin givim hadtaem long olgeta Sent oli bin fraet se Saeon Kamp bae i kam agensem olgeta, nao kwiktaem oli atakem samfala Sent we oli bin stap long Klei Kaonti, Misuri. Afta we gavna blong Misuri i karemaot promes blong hem blong sapotem olgeta Sent, Josef Smit i kasem revelesen ia.
1–5, Saeon bae i stanap i folem selestial loa; 6–13, Taem blong fasin blong putumbak Saeon i sevet blong wan smol taem; 14–19, Lod bae i faet long ol faet blong Saeon; 20–26, Olgeta Sent oli mas waes mo oli no mas tokflas abaot ol bigfala wok, taem oli kam tugeta wanples; 27–30, Oli mas pemaot ol graon long Jakson mo long ol kaonti we oli stap long saedsaed mo raon; 31–34, Ol elda oli mas kasem endaomen blong olgeta insaed long haos blong Lod long Ketlan; 35–37, Olgeta sent we Lod i singaotem mo jusum olgeta, bae oli kam tabu; 38–41, Olgeta Sent bae oli mas leftemap wan flag blong pis i go long wol.
1 I tru, mi talem long yufala we yufala i kam tugeta wanples blong yufala i lanem tingting blong mi long saed blong fasin blong putumbak ol pipol blong mi we oli gat hadtaem.
2 Luk, mi talem long yufala, sapos i no from ol fasin blong ol pipol blong mi blong brekem loa, mo mi tokbaot jos be i no wanwan man o woman, maet mi putumbak olgeta finis naoia.
3 Be luk, oli no bin lanem blong stap obei long ol samting we mi bin askem long han blong olgeta, be oli fulap long evri kaen nogud fasin, mo oli no serem samting blong olgeta, olsem we ol sent oli mekem, i go long olgeta we oli pua mo olgeta we oli stap long nid long medel blong olgeta;
4 Mo oli no wan folem fasin blong kam wan we loa blong selestial kingdom i askem;
5 Mo Saeon bae i no save stanap sapos hem i no folem ol prinsipol blong loa blong selestial kingdom; sapos no, bae mi no save tekem Saeon i blong mi.
6 Mo i nid blong ol pipol blong mi oli mas kasem panismen kasem taem we oli lanem fasin blong stap obei, sapos i gat nid, tru long ol samting we oli gat hadtaem long hem.
7 Mi no toktok long saed blong olgeta we mi jusum blong oli lidim ol pipol blong mi, we oli ol fas elda blong jos blong mi, from i no evriwan we oli rong long sin ia;
8 Be mi toktok long saed blong ol jos blong mi we oli stap long narafala ples—i gat plante we bae oli talem se: “?God blong olgeta i stap wea? Luk, bambae hem i mekem olgeta oli fri long trabol, sapos no bambae yumi no go long Saeon, mo bae yumi holemtaet mane blong yumi.”
9 From hemia, from fasin blong ol pipol blong mi blong brekem loa, hem i stret long mi, se ol elda blong mi oli mas wet blong smol taem blong putumbak Saeon—
10 Blong olgetawan oli rere, mo blong oli tijim ol pipol blong mi i stret moa, mo oli gotru long ol samting, mo save samting i stret moa long saed blong diuti blong olgeta, mo ol samting we mi askem long han blong olgeta.
11 Mo hemia i no save kam blong hapen kasem taem we ol elda blong mi oli kasem paoa we i kam long heven.
12 From luk, mi bin rere long wan bigfala endaomen mo blesing blong mi kapsaetem long olgeta, folem hamas we oli stap fetful mo stap gohed wetem fasin blong putum tingting i stap daon long fored blong mi.
13 From hemia, hem i stret long mi, se ol elda blong mi oli mas wet blong smol taem, blong putumbak Saeon.
14 From luk, mi no askem long han blong olgeta blong oli faet long ol faet blong Saeon; from we, olsem we mi bin talem long wan oda fastaem finis, mo bae mi mekem i hapen—bae mi faet long ol faet blong yufala.
15 Luk, man ia we i prapa spolem gud ol samting, mi sendem hem i kam blong prapa spolem gud ol samting, mi sendem hem i kam blong prapa spolem gud ol enemi blong mi; mo long samfala yia afta nomo, bae i no gat wan i stap blong mekem ples we mi givim i doti, mo blong talem nogud nem blong mi long ol graon we mi bin konsekretem blong ol sent blong mi oli kam tugeta wanples.
16 Luk, mi bin givim oda long wokman blong mi, Josef Smit Junia, blong talem long manpaoa blong haos blong mi, we oli ol man blong faet blong mi, ol yangfala man blong mi, mo olgeta tu we oli no olfala tumas, blong oli kam tugeta wanples blong mi putumbak ol pipol blong mi, mo brekemdaon ol taoa blong ol enemi blong mi, mo ronemaot ol gadman blong olgeta oli go olbaot.
17 Be manpaoa blong haos blong mi i no bin lisin gud long ol toktok blong mi.
18 Be folem hamas we i gat olgeta we oli bin lisin gud long ol toktok blong mi, mi bin rere long wan blesing mo long wan endaomen blong olgeta, sapos oli gohed blong stap fetful.
19 Mi bin harem ol prea blong olgeta, mo bae mi akseptem ofring blong olgeta; mo hem i stret long mi, se bae mi tekem olgeta i go longwe olsem ia blong testem fet blong olgeta.
20 Mo naoia, i tru mi talem long yufala, mi givim yufala wan komanmen, se hamas we oli bin kam long ples ia, we oli save stap long eria raonabaot, bae oli mas stap ia;
21 Mo olgeta we oli no save stap, we oli gat ol famli long Is, bae oli stap blong smol taem, folem wanem we wokman blong mi, Josef, bae i talem long olgeta;
22 From we bae mi talemaot long hem long saed blong mata ia, mo evri kaen samting we bae hem i talem long olgeta, bae i hapen.
23 Mo evri pipol blong mi we oli stap long ol eria raonabaot oli mas stap fetful evriwan, mo oli mas stap prea, mo mas stap putum tingting blong olgeta i stap daon long fored blong mi, mo oli no mas talemaot ol samting ia we mi bin talemaot long olgeta, kasem taem we mi talem se hem i waes blong oli save talemaot.
24 No tokbaot ol jajmen, mo tu, no tokflas abaot fet, mo ol bigfala wok, be lukluk gud blong kam tugeta wanples, kam plante long wan eria olsem we yufala i save mekem, olsem we i stret wetem ol filing blong ol pipol;
25 Mo luk, bae mi mekem se long ae blong olgeta, oli laekem yufala mo gat gladhat long yufala, blong yufala i stap long pis mo stap sef, taem yufala i stap talem long ol pipol ia: “Givim jajmen mo jastis long mifala folem loa, mo mekem i stret long mifala from ol rong we oli bin mekem long mifala.”
26 Naoia, luk, mi talem long yufala, ol fren blong mi, long wei ia bae yufala i faenem se long ae blong ol pipol ia, bae oli laekem yufala, kasem taem we ami blong Isrel i kam bigwan evriwan.
27 Mo bae mi mekem hat blong ol pipol oli sofsof, olsem we mi bin mekem wetem hat blong Fero, wanwan taem, kasem taem we wokman blong mi, Josef Smit Junia, mo ol elda blong mi we mi bin jusum olgeta, oli gat taem blong kam karem i kam wanples manpaoa blong haos blong mi,
28 Mo blong sendem ol waes man, blong mekem i hapen wanem nao we mi bin givim oda from long saed blong pemaot evri graon, long Jakson kaonti, we oli save pem, mo long ol kaonti we oli stap raonabaot.
29 From hem i tingting blong mi se bae oli pemaot ol graon ia; mo afta we oli pemaot olgeta graon ia, blong ol sent blong mi oli tekem folem ol loa blong konsekresen we mi bin givim.
30 Mo afta we oli pemaot ol graon ia, bae mi no holem wan rong agensem ol ami blong Isrel from bae oli tekem ol graon blong olgeta, from we oli bin pem finis wetem mane blong olgeta, mo bae oli brekemdaon ol taoa blong ol enemi blong mi we oli stap long ol graon ia, mo ronemaot ol gadman blong olgeta, mo mekem ol enemi blong mi oli pembak mi, i go kasem nambatri mo nambafo jeneresen blong olgeta ia we oli no laekem mi nating.
31 Be fastaem, ami blong mi i mas kam bigwan evriwan, mo i mas kam tabu long fored blong mi, blong hem i kam blong saen olsem san, mo i kam klia olsem mun, mo blong ol bana blong ami ia oli mekem evri nesen i fraet;
32 Blong mekem se ol kingdom blong wol ia bae oli mas luksave mo talemaot se i tru, se kingdom blong Saeon i kingdom blong God blong yumi mo Kraes blong hem; taswe, bae yumi mas stap anda long rul blong ol loa blong Saeon.
33 I tru, mi talem long yufala, long mi, i nid blong ol fas elda blong jos blong mi oli mas kasem endaomen blong olgeta we i kam long heven, insaed long haos blong mi ia we mi bin givim oda blong oli bildim long nem blong mi long graon blong Ketlan.
34 Mo yufala i mas mekemsua se ol komanmen ia we mi bin givim long saed blong Saeon mo loa blong hem, bae oli mas mekem folem mo mekem i hapen, hemia afta we mi pemaot Saeon.
35 I bin gat wan taem blong singaotem man, be taem i kam we i taem blong jusum man; mo bae oli mas jusum olgeta we oli klin inaf.
36 Mo bae mi soemaot olgeta we mi jusum long wokman blong mi, tru long voes blong Spirit; mo bae mi mekem olgeta oli kam tabu;
37 Mo folem hamas we oli folem ol komanmen we oli kasem, bae oli gat paoa afta long plante dei, blong mekem evri samting long saed blong Saeon.
38 Mo bakegen, mi talem long yufala, yufala i askem pis, i no long ol pipol ia nomo we oli bin mekem nogud long yufala, be tu, long evri pipol;
39 Mo yufala i leftemap wan flag blong pis, mo mekem wan ofisol toktok blong pis i go long evri en blong wol;
40 Mo folem wanem we voes blong Spirit we i stap insaed long yufala i talem, yufala i toktok blong askem pis long olgeta we oli bin mekem nogud long yufala, mo evri samting bae i wok tugeta blong gud blong yufala.
41 From hemia, yufala i mas fetful; mo luk, mo luk gud, mi mi stap wetem yufala kasem en. I olsem. Amen.