Seksen 65
Revelesen long saed blong prea we Lod i bin givim, tru long Profet Josef Smit, long Haeram, Ohaeo, long 30 Oktoba 1831.
1–2, Lod i givim wetem tras, ol ki blong kingdom blong God long man we i stap long wol, mo wok blong gospel bambae i win; 3–6, Kingdom blong heven blong Mileniom bae i kam mo joenem kingdom blong God long wol.
1 Lisin gud, mo luk, i gat wan voes olsem wan we oli sendem long heven i kam daon, we i strong mo i gat paoa, we i stap go fored long ol en blong wol, yes, we voes blong hem i go long ol man—Yufala i mas mekem rere rod blong Lod, mekem ol rod blong hem oli stret gud.
2 Ol ki blong kingdom blong God, Lod i givim wetem tras long man we i stap long wol, mo stat long ples ia, bambae gospel bae i rol i go long evri ples, kasem taem hem i fulumap ful wol, olsem wan ston we i kamaot hemwan long bigfala hil we i stap rol i go, kasem taem hem i gro, i fulumap ful wol.
3 Yes, wan voes we i talemaot laod—Yufala i mas mekem rere rod blong Lod, yufala i rere long dei blong kaekae blong Smol Sipsip, yufala i rere from Man we Bae I Mared.
4 Prea long Lod, singaotem tabu nem blong hem, mekem man i save ol merikel wok blong hem long medel blong ol pipol.
5 Prea long Lod, se bae kingdom blong hem bae i go evri ples long wol, blong ol man we oli stap laef long hem oli save kasem kingdom ia, mo oli mekem olgeta oli rere from ol dei we oli stap kam, we Pikinini blong Man bae i aot long heven i kam daon, wetem klos blong glori blong hem we i saen gud, blong mitim kingdom blong God we i stanap long wol ia.
6 Taswe, bae kingdom blong God bae i go evri ples, blong mekem se kingdom blong heven i kam, blong Yu, O God, i save gat glori long heven mo tu, long wol, blong yu save winim ol enemi blong yu; from ona, paoa mo glori ia, oli blong yu, blong oltaem mo oltaem. Amen.