Daniel
Hem i stamba man long buk blong Daniel long OlTesteman; hem i wan profet blong God mo wan man we i gat bigfala fet.
Oli no save wan samting long saed blong papa mo mama blong hem, nomata i luk se hem i kamaot long laen blong wan king (Dan 1:3). Oli bin holemtaet hem i slef long Babilon, mo long tetaem ia, hem i kasem nem ia Beltesasa (Dan 1:6â7). Daniel mo trifala nara prisena oli no wantem blong kakae long kaekae blong King from sam risen long saed blong relijin (Dan 1:8â16).
Daniel i gat gud nem long fored blong Nebukadnesa mo Darias tru long paoa blong hem blong save talem mining blong ol drim (Dan 2; 4; 6). Mo tu, hem i ridim mo talem mining blong ol raeting long wol blong haos blong king (Dan 5). Ol enemi blong hem oli mekem plan agensem hem, mo oli bin sakem hem i go long hol blong ol laeon, be Lod i bin lukaotgud long laef blong hem (Dan 6).
Buk blong Daniel
Buk ia i gat tufala pat: ol japta 1â6 oli ol stori we oli tokbaot Daniel mo ol trifala fren blong hem; ol japta 7â12, oli ol visen blong profesi we Daniel i bin luk. Buk ia i stap tijim olsem wanem i impoten blong stap tru long God mo i soemaot se Lod i stap blesem olgeta we oli stap fetful.
Wan bigfala impoten pat blong buk ia, hem i taem hem i talem mining blong drim blong King Nebukadnesa. Long drim ia, kingdom blong God long ol las dei, oli soemaot olsem wan ston we i no gat han i katemaot hem long bigfala hil. Ston ia bae i rol i gogo kasem taem i fulap ful wol (Dan 2; luk tu long D&K 65:2).