Kapitulli 18
Alma i Riu Pendohet
Alma dhe mbreti Mosia u shqetësuan ngaqë jobesimtarët po i bënin të vuanin anëtarët e Kishës për shkak të besimit të tyre.
Alma kishte një bir që quhej Alma. Alma i Riu nuk besonte në mësimet e atit të tij dhe u bë njeri i lig.
Alma i Riu dhe katër bijtë e mbretit Mosia luftuan kundër Kishës. Ata bindën shumë njerëz të largoheshin nga Kisha dhe të bëheshin të ligj.
Alma u lut që biri i tij ta mësonte të vërtetën dhe të pendohej.
Alma i Riu dhe bijtë e mbretit Mosia i vazhduan përpjekjet për të shkatërruar Kishën.
Një ditë, një engjëll iu shfaq atyre. Engjëlli foli me një zë të fortë që tundi tokën.
Pesë djemtë e rinj u frikësuan kaq shumë sa ranë përdhe. Në fillim ata nuk mund ta kuptonin çfarë po u thoshte engjëlli.
Engjëlli kishte ardhur si përgjigje ndaj lutjeve të anëtarëve të Kishës. Engjëlli e pyeti Alma të Riun përse ai po luftonte kundër Kishës.
Toka u drodh kur engjëlli i tha Alma të Riut që të ndërpriste përpjekjet për shkatërrimin e Kishës.
Alma i Riu dhe bijtë e Mosias ranë përdhe përsëri. Ata kishin parë një engjëll dhe ata e dinin se fuqia e Perëndisë kishte tundur tokën.
Alma i Riu u habit kaq shumë saqë nuk mundi të fliste. Ai u bë kaq i dobët saqë nuk mund të lëvizte madje as duart e tij.
Bijtë e Mosias e çuan Alma të Riun tek ati i tij dhe ia thanë gjithçka që u kishte ndodhur.
Alma ishte i lumtur. Ai e dinte se Perëndia u ishte përgjigjur lutjeve të tij.
Alma mblodhi shumë njerëz për të parë se çfarë kishte bërë Zoti për birin e tij dhe për bijtë e Mosias.
Alma, së bashku me udhëheqësit e tjerë të Kishës, agjëruan, u lutën dhe i kërkuan Perëndisë ta ndihmonte Alma të Riun të bëhej i fortë përsëri.
Pas dy ditësh dhe dy netësh, Alma i Riu qe në gjendje të fliste dhe të lëvizte.
Ai i tha popullit se ishte penduar për mëkatet e tij dhe se Perëndia e kishte falur atë.
Ai u mësoi se çdo njeri duhet të bëhet i drejtë me qëllim që të hyjë në mbretërinë e Perëndisë. Ai gjithashtu tregoi për dhembjet e mëdha që kishte pasur për shkak të mëkateve të tij.
Alma i Riu ishte i lumtur sepse ishte penduar dhe Perëndia e kishte falur atë. Ai e dinte se Perëndia e donte.
Alma i Riu dhe bijtë e mbretit Mosia filluan të japin mësim të vërtetën në të gjithë tokën, duke i treguar çdo njeriu se çfarë kishin parë dhe dëgjuar.
Ata u përpoqën t’i ndreqnin gabimet që kishin bërë. Ata ua shpjeguan njerëzve shkrimet e shenjta dhe u dhanë mësim rreth Jezu Krishtit.
Perëndia e bekoi Alma të Riun dhe bijtë e Mosias ndërsa jepnin mësim për ungjillin. Shumë njerëz i dëgjuan dhe i besuan ata.