Kapitulli 40
Samuel Lamaniti Flet rreth Jezu Krishtit
Samueli, një profet lamanit, shkoi në Zarahemla për t’u predikuar nefitëve të ligj. Ai u tha atyre të pendoheshin.
Nefitët e nxorën Samuelin jashtë qytetit dhe ai u nis të shkonte përsëri në vendin e tij.
Por Zoti i tha Samuelit të kthehej në Zarahemla dhe t’i thoshte popullit gjërat që Zoti do të vendoste në zemrën e tij.
Nefitët nuk e lanë Samuelin të futej përsëri në qytet, kështu që ai u ngjit në majë të murit të qytetit dhe predikoi që aty.
Ai profetizoi se nefitët do të shkatërroheshin për 400 vjet, në qoftë se njerëzit nuk do të pendoheshin dhe nuk do të kishin besim në Jezu Krisht.
Samueli u tha nefitëve se Jezu Krishti do të lindte pas pesë vjetësh dhe se Ai do t’i shpëtonte të gjithë ata që besonin në Të.
Samueli u tregoi atyre rreth shenjave të lindjes së Jezusit. Një yll i ri do të shfaqej, dhe natën përpara lindjes së Jezusit nuk do të kishte errësirë.
Pastaj Samueli u tregoi atyre shenjat e vdekjes së Jezusit. Do të kishte tri ditë errësire të plotë – dielli, hëna dhe yjet nuk do të ndritnin.
Do të kishte gjithashtu vetëtima, bubullima dhe tërmete. Malet do të copëtoheshin dhe shumë qytete do të shkatërroheshin.
Disa nefitë i besuan Samuelit dhe u penduan për mëkatet e tyre. Ata shkuan të gjenin Nefin, një nefit të drejtë i cili mund t’i pagëzonte ata.
Pjesa tjetër e nefitëve nuk i besoi Samuelit. Ata i hodhën gurë dhe shigjeta atij. Por Zoti e mbrojti atë dhe asnjë nga gurët dhe shigjetat nuk e preku.
Kur njerëzit panë se nuk mund ta qëllonin, shumë të tjerë i besuan atij dhe shkuan te Nefi për t’u pagëzuar.
Nefi gjithashtu i mësoi njerëzit rreth Jezusit. Ai donte që ata të besonin te Jezusi, të pendoheshin dhe të pagëzoheshin.
Shumica e nefitëve, sidoqoftë, nuk i besuan Samuelit. Ata u përpoqën ta zinin rob.
Samueli u hodh poshtë nga muri dhe vrapoi për në vendin e tij.
Samueli filloi t’i mësonte lamanitët. Për të nuk u dëgjua më asnjëherë mes nefitëve.