Kapitulli 5
Udhëtimi në Vendin e Shkretë
Zoti donte që bijtë e Lehit të kishin gra, të cilat do t’ua mësonin fëmijëve të tyre ungjillin. Ai i tha Lehit t’i dërgonte fëmijët e tij përsëri në Jerusalem për të marrë familjen e Ishmaelit.
Nefi dhe vëllezërit e tij u kthyen në Jerusalem. Ata i thanë Ishmaelit se çfarë donte Zoti që të bënte ai. Ishmaeli u besoi atyre dhe ai e familja e tij shkuan me bijtë e Lehit.
Kur ata po udhëtonin në vendin e shkretë, Lamani e Lemueli dhe disa nga familja e Ishmaelit, u zemëruan. Ata dëshironin të ktheheshin në Jerusalem.
Nefi ua kujtoi Lamanit dhe Lemuelit gjithçka që Zoti kishte bërë për ta. Ai u tha atyre të kishin më shumë besim. Ata ishin të zemëruar me Nefin por nuk u kthyen në Jerusalem.
Nefi, vëllezërit e tij dhe Zorami, më vonë u martuan me bijat e Ishmaelit.
Zoti i tha Lehit që ta vazhdonte udhëtimin e tij. Mëngjesin tjetër Lehi gjeti një sferë prej tunxhi, e quajtur Liahona, jashtë çadrës së tij. Ajo tregonte rrugën nga duhej të shkonin nëpër vendin e shkretë.
Familja e Lehit grumbulloi ushqim e fara dhe mblodhën çadrat e tyre. Ata udhëtuan nëpër vendin e shkretë për shumë ditë, duke ndjekur drejtimin e Liahonës.
Nefi dhe vëllezërit e tij përdorën harqet dhe shigjetat për të gjuajtur për ushqim gjatë udhëtimit.
Harku i çeliktë i Nefit u thye dhe harqet e vëllezërve të tij e humbën forcën e tyre. Vëllezërit nuk mund të vrisnin ndonjë kafshë, prandaj të gjithë ishin të uritur. Lamani dhe Lemueli ishin të zemëruar.
Nefi bëri një hark prej druri dhe pyeti atin e tij se ku të shkonte për të gjuajtur. Lehi mori drejtimin nga Liahona. Nefi ndoqi drejtimin dhe gjeti disa kafshë.
Liahona funksiononte vetëm kur familja e Lehit ishte besnike, e zellshme dhe e bindur.
Nefi u kthye me kafshët që kishte gjetur. Të gjithë u lumturuan që morën ushqim. Ata kërkuan falje që qenë të zemëruar dhe e falënderuan Perëndinë që i bekoi ata.
Udhëtimi nuk ishte i lehtë. Shpesh familja e Lehit qe e lodhur, e uritur dhe e etur. Ishmaeli vdiq dhe bijat e tij u dëshpëruan. Ato u ankuan kundër Lehit.
Lamani dhe Lemueli u ankuan gjithashtu. Ata nuk besuan që Zoti kishte folur me Nefin. Ata dëshironin t’i vrisnin Lehin e Nefin dhe të ktheheshin në Jerusalem.
Zëri i Zotit i foli Lamanit dhe Lemuelit. Ai u tha atyre të mos zemëroheshin me Lehin dhe Nefin. Lamani dhe Lemueli u penduan.
Familja e Lehit e vazhdoi udhëtimin e saj të vështirë. Perëndia i ndihmoi dhe i forcoi ata. Fëmijë u lindën. Lehi dhe Saria patën dhe dy djem të tjerë, të quajtur Jakob dhe Jozef.
Pasi udhëtuan në vendin e shkretë për tetë vjet, pjesëtarët e familjes së Lehit mbërritën në breg të detit. Atje ata gjetën fruta dhe mjaltë. Ata e quajtën vendin Begati.