Tz’aqal xtzolomeb’ li Kolonel

Sa’ lix Hu laj Hageo, sa’ li Najter Chaq’rab’, muqmu b’ayaq, laj Hageo naxye resil jun ch’uut chi tenamit li ke’raj raj ru lix na’leb’ li Elder Holland. Ke’sach rik’in naq ink’a’ ke’xk’e li Kristo jo’ xb’eenil sa’ xyu’ameb’ ut sa’ xk’anjeleb’. Laj Hageo naxk’ut jun na’leb’ jwal aajel ru naq naxch’iilaheb’ li kristiaan xb’aan naq neke’kana sa’ lix chaab’il ochoch ruuchil xkab’lankil lix santil ochoch li Qaawa’:

“Ma xq’ehil tab’i’ choq’ eere wank sa’ chaab’il ochoch naq toj po’lem lin santil ochoch?

“Kama’in b’i’ kixye chaq li Jehova reheb’ li teepal: tz’ilomaq rix chi us b’ar yookex chi xik.

“K’a’jo’ li awimq xeraw, ut ka’ch’in ajwi’ nekexok; xextzekank, a’b’an ink’a’ nak’ojlaak lee ch’ool; xex’uk’ak, a’b’an ink’a’ nanume’k lee chaqi’eel; xelan eerib’ chi us, ut ink’a’ nekextiqwo’k; ut li tojb’il moos yal sa’ q’ichil koxtal naxk’e li xtojb’al.

“Laa’in li nimajwal Dios, ut nawaj naq teek’oxla chi us k’a’ru yookex chixb’aanunkil.”¹

Eb’ li na’leb’ a’in neke’xch’olob’ chi chaab’il chirix li maakʼaʼebʼ xnaʼlebʼ ut neke’xnima ru li k’a’aq re ru li mak’a’eb’ xjunelikil loq’al sa’ xb’een li k’a’aq re ru re li Dios

Sa’ jun li ch’utam re li loq’laj wa’ak kinwan wi’ chaq toje’, jun li kik’anjelak chaq sa’ jun li mision kixwotz resil jun li yuwa’b’ej li kixye reheb’ lix kok’al chi k’osb’il ru: “Na’ajman naq taqakanab’ b’ayaq li Wi-Fi ut taqak’e qach’ool chirix laj Nefi!”

Xb’aan naq kinwan chaq oob’ chihab’ aran sa’ Africa Occidental, kiwileb’ naab’al li kristiaan li neke’xk’e li evangelio sa’ xb’een na’ajej chi moko ch’a’aj ta ut chi anchaleb’ xch’ool. Jun reheb’ a’an, a’an lix k’ab’a’ jun li yiib’ob’aal yaant re li b’eleb’aal ch’iich aran Ghana. Laj eechal re kixk’e choq’ xk’ab’a’: “Tiikob’resinb’il jo’ chanru nakawaj.”

Naru naqeek’a li sahil ch’oolejil li nakana junelik² naq li qaKolonel ut lix evangelio neke’wan jo’ li roqechal xsutam li qayu’am. A’b’anan, moko ch’a’aj ta naq li oqechal a’an naru nawulak, jo’eb’ li k’a’ru re li ruchich’och’, b’ar wi’ li evangelio nakanaak yal jo’ jun na’leb’, malaj jo’ ka’ajwi’ li xik sa’ li iglees chiru wiib’ hoor sa’ li domingo. Wi jo’kan a’an, chanchan ajwi’ naq yooko chixk’eeb’al li qatojb’al sa’ jun “q’ichil koxtal.”

Laj Hageo naxye qe naq k’eek’ooq raj qach’ool—jo’ chanru naqaye aran Australia, chi wank jo’ “fair dinkum” chirix xyu’aminkil li evangelio. Eb’ li kristian a’aneb’ “fair dinkum” naq neke’xye naq a’aneb’ chi tz’aqal li neke’xye naq a’aneb’.

Xintzol b’ayaq chirix li wank jo’ “fair dinkum” ut xk’eeb’al inch’ool naq yookin chaq chi b’atz’unk li rugby. Xintzol naq wi ninb’atz’unk rik’in chixjunil lin metz’ew, wi nink’e chixjunil lin wankilal, nanumta xsahil inch’ool naq ninb’atz’unk.

Jalam-uuch

li Elder Vinson rik’in li rech aj b’atz’unel rugby

Li hoonal mas xwulak chiwu re b’atz’unk rugby a’an li chihab’ naq xinraqe’ chi tzolok sa’ li secundaria. Li ch’uut aj b’atz’unel li kinwan wi’ chaq jwal seeb’eb’ ut neke’xk’e xch’ool. Sa’ li chihab’ a’an kookana sa’ xb’een na’ajej. A’b’anan sa’ jun kutan toob’atz’unq raj rik’in jun ch’uut moko nawb’ileb’ ta ru, ut chirix naq toob’atz’unq, chiqajunilo kiqab’oqeb’ junjunq li saaj ixq re xik chi xajok sa’ li ninq’e nab’aanuman rajlal chihab’ sa’ li universidad. Xink’oxla naq xb’aan naq moko kawaq ta li b’atz’unk, tinkol wib’ re naq ink’a’ tintoch’e’q ut chi jo’kan tinyal xsahil li xajok chi us. Sa’ li b’atz’unk a’an ink’a’ kiqak’e qach’ool chi b’atz’unk jo’ chanru na’ajman xb’aanunkil, ut kootz’eqok. Ut sa’ xb’een a’an kipeje’ lix tz’uumal li we ut k’a’jo’ naq kisipo’, ut chi jo’kan moko chaab’il ta li wilb’al choq’ re li elk rik’in jun li saaj ixq. Maare tento naq kintzol junaq na’leb’.

Jun innumsihom jalan, kik’ulman sa’ jun chik li b’atz’unk b’ar wi’ kink’e lin ch’ool chi b’atz’unk. Chiru jun hoonal, kin’aalinak chi anchal inch’ool b’ar wi’ wan chaq li nab’atz’un sa’ junpak’al naq kiweek’a jun rahilal sa’ li xnaq’ wu. Xb’aan naq lin yuwa’ kixk’ut chiwu naq maajun wa tink’utb’esi chiruheb’ li neke’b’atz’un junpak’al naq toch’b’ilin, moko kinkanab’ ta li b’atz’unk. Sa’ li q’ojyin a’an, naq kinyal wa’ak, kink’e reetal naq ink’a’ nikinru chi hach’ok. Eq’la sa’ li kutan jun chik, xkohin sa’ li b’anleb’aal, b’ar wi’ naq jun li rayos X kixk’ut naq toqol xb’aqel li we. Chiru waqib’ xamaan kitz’ape lix tz’uumal we rik’in k’aam ch’iich’.

Rik’in li jaljookil ru aatin a’in naq kisipo’ lix tz’uumal we ut naq kitoqe’ lix b’aqel li we kintzol junjunq li na’leb’. Us ta nachal sa’ lin k’a’uxl naq ink’a’ kinru chixk’uxb’al li chaab’il tzakemq chiru li waqib’ xamaan b’ar wi ka’ajwi li tzakemq puk’b’il kinru chiruk’b’al, moko ninjal ta ink’a’uxl chirix naq kitoqe’ lix b’aqel li we xb’aan naq aran kink’e lin ch’ool chi b’atz’unk. A’b’an, naraho’ lin ch’ool chirix naq kisipo’ lix tz’uumal we xb’aan naq a’an naraj naxye naq ink’a’ kink’e lin ch’ool chi b’atz’unk.

Li xk’eeb’al qach’ool chixb’aanunkil k’a’ruhaq moko naraj ta naxye naq junelik taqak’ul li osob’tesihom malaj naq junelik too’elq chi uub’ej. Naraj b’an naxye naq taawanq xsahil qach’ool. Li sahil ch’oolejil moko yal junpaat ta nanume’, chi moko a’an ta li sahil ch’oolejil yal re wiib’ oxib’ kutan. Li sahil ch’oolejil nakana ut wan xwankil sa’ xk’ab’a’ xyalb’al qaq’e re took’ulub’aaq xb’aan li Qaawa’.³

Jun reetalil li k’ulub’aak a’an, a’an li esil chirix laj Oliver Granger. Jo’ kixseraq’i li Awa’b’ej Boyd K. Packer: “Naq eb’ laj santil paab’anel ke’isiik chaq sa’ li tenamit Kirtland, … laj Oliver kikana re tixk’ayi lix ch’ocheb’ a’ yaal chi jo’nimal xtz’aq. Moko wan ta xch’ooleb’ naq taaruuq chixb’aanunkil. Relik chi yaal, moko kiru ta chixb’aanunkil!”⁴ Li Xb’eenil Awa’b’ejil kixk’e jun k’anjel re jwal ch’a’aj xb’aanunkil, ut maare ink’a’ naru xb’aanunkil. A’b’an li Qaawa’ kixwaklesi xch’ool xb’aan naq kixyal xq’e chixb’aanunkil rik’ineb’ li aatin a’in:

“Najultikoʼ we lin moos aj Oliver Granger; kʼehomaq reetal, chi yaal ninye re naq taawanq lix kʼabʼaʼ chi jultikʼanbʼil xloqʼal chiru li junjunq tasal tenamit, chi junelik qʼe kutan, chan li Qaawaʼ.

“Joʼkan ut, chixyal ru chi anchal xchʼool re xtojbʼal rix li Xbʼeenil Awaʼbʼejil re lin Iglees, chan li Qaawaʼ; ut naq natʼaneʼ taawakliiq wiʼchik, xbʼaan naq lix mayej qʼaxal loqʼaq wiʼchik choqʼ we chiru lix kʼiijik, chan li Qaawaʼ.”⁵

A’in naru naxk’ut chiqu naq moko a’an ta naq noko’elk chi uub’ej, a’an b’an li qamayej ut li xyalb’al qaq’e, li k’a’ru naril li Qaawa’.

Jun chik eetalil chirix jun tz’aqal xtzolom li Jesukristo a’an jun li raarookil qamiiw aran Costa de Marfil, sa’ Africa Occidental. Li chaab’il ut tiikil xch’ool komon ixq a’in kixnumsi xninqal rahilal sa’ lix ch’ool, ut sa’ ajwi’ lix junxaqalil, rik’in lix b’eelom chiru naab’al chihab’, toj reetal naq ke’xjach rib’. A’an maajun wa kiwiib’an xch’ool chirix lix paab’aal ut lix chaab’ilal xch’ool, a’b’an xb’aan lix lab’al lix b’eelom, kireek’a xchamal xtoch’olal chiru naab’al li hoonal. A’an naxch’olob’ li k’a’ru kik’ulman:

“Us ta xinye naq ink’a’ tinkuy xmaak, junelik kinwar rik’in lin toch’olal; kinnumsiheb’ li kutan rik’in li toch’olal a’an. Chanchan jun li k’atal sa’ li waam. Naab’al sut kintijok chiru li Qaawa’ re naq taarisi, a’b’an k’a’jo’ lin rahilal, ut xaqxo chi tiik lin paab’aal chirix naq tinnumsi chixjunil lin yu’am rik’in a’an. Jwal ra wi’chik li naweek’a chiru li kiweek’a naq kikam lin na’ naq toj saajin chaq; jwal ra wi’chik chiru naq kikam lin yuwa’ ut ajwi’ li walal. Chanchan naq naxheleb’ rib’ ut naxram ru li waam, ut naxk’e chiweek’a naq wulaj kab’ej tinkamq ajwi’.

“Wan ajwi’ naq ninpatz’ wib’ k’a’ raj ru tixb’aanu li Kolonel wi ta wan sa’ lin na’aj, ut jo’kan naq kinye: “Mas naab’al a’in at Qaawa’.”

“Toja’ naq sa’ jun kutan kinsik’ sa’ li waam li rahilal nachal xb’aan chixjunil a’in, tz’aqal sa’ xchamal li waam kinsik’. Ink’a’ kintaw sa’ junaq chik na’ajej. Sa’ junpaat kintz’il rix sa’ lin k’a’uxl chixjunil lix yaalal naq ra naweek’a, a’b’an maak’a’ li ra kiweek’a. Kiwoyb’eni chixjunil li kutan ma taaweek’a li ra sa’ li waam, a’b’an ink’a’ kiweek’a. Toj’ naq kinwiq’ib’ wib’ ut kinb’antioxi re li Dios xb’aan naq kixb’aanu naq lix mayej aj tojol-ix re li Qaawa’ kik’anjelak sa’ inb’een.”⁶

Li komon ixq a’in anajwan k’a’jo’ xsahil xch’ool xb’aan naq tz’apb’il sa’ junajil rik’in jun winq chaab’il ut tiik chi paab’ank li naxra chi anchal xch’ool.

Jo’kan ut, chan raj ru li qana’leb’ chirix a’in wi laa’o tz’aqal xtzolom li Kristo? Ut chan ru xloq’al li evangelio choq’ qe naq “naqatz’il rix chi us b’ar yooko chi xik,” jo’ chanru kixye chaq laj Hageo?

Jwal nawulak chiwu lix na’leb’ lix yuwa’ li rey aj Lamoni. Maare jultik eere li josq’il kireek’a sa’ xtiklajik naq kiril li ralal rochb’een laj Ammon, jun aj Nefita– jun komon re li tenamit xik’ neke’rileb’ laj Lamanita. Kirisi lix yok’leb’ ch’iich’ re taapletiiq rik’in laj Ammon ut sa’ junpaat kireek’a lix yok’leb’ ch’iich’ laj Ammon sa’ lix ja’aj. Anajwan li rey, xbʼaan xxuwankil naq taasachq lix yuʼam, kixye: wi taakol inyuʼam laaʼin tinkʼe aawe yalaq kʼaʼru taapatzʼ, toj xyijach lin awaʼbʼejihom.”⁷

K’ehomaq reetal li k’a’ru kixyeechi’i– lix yijach lix awa’b’ejihom choq’ ruuchil lix yu’am.

A’b’an moqon, naq kixtaw ru li evangelio kixjal lix yeechi’ihom. “Li rey kixye: kʼaʼru tinbʼaanu re tinkʼul li junelik yuʼam aʼin li kat-aatinak wiʼ? Relik chi yaal, kʼaʼru tinbʼaanu re taaruuq tinyoʼlaaq rikʼin li Dios, chi michʼbʼil chaq saʼ inchʼool li musiqʼej aj maak aʼin, ut tinkʼul lix Musiqʼ aʼan, re naq taaruuq tinnujaq rikʼin sahil chʼoolejil, re naq inkʼaʼ tintzʼeqeʼq saʼ rosoʼjik li kutan? Kʼehomaq reetal, chan, laaʼin tinqʼaxtesi chixjunil li kʼaʼru we, relik chi yaal, tinkanabʼ lin awaʼbʼejihom, re tinruuq chixkʼulbʼal li nimla sahil chʼoolejil aʼin.”⁸

Anajwan, ak kawresinb’il chik chixtz’eqtaanankil chixjunil lix awa’b’ejihom, xb’aan naq li evangelio nanumta xtz’aq chiru chixjunil li wank re! A’an jun aj “fair dinkum” chirix li evangelio.

Jo’kan naq, li patz’om choq’ qe sa’ junjunqal a’an a’in: Ma laa’o ajwi’ aj “fair dinkum” chirix li evangelio? Xb’aan naq wi nokokana sa’ xyiitoq, moko a’an ta wank jo’ aj fair dinkum! Ut naqanaw naq li Dios ink’a’ naxk’e xloq’aleb’ li yal luuluukeb’.⁹

Moko wan ta li b’ihomal, lix numsinkil qahoonal, li xnimal qu chiruheb’ li komon, li b’atz’unk sa’ li internet, li jalan jalanq b’atz’unk, malaj xnawb’al ru anihaq jwal nawb’il ru, ut maak’a’ sa’ xb’een li ruchich’och’ jwal nim chik xloq’al chiru li junelik yu’am. Jo’kan naq li na’leb’ naxk’e li Qaawa’ re li junjunq chi kristiaan a’an a’in: “tz’ilomaq rix chi us b’ar yookex chi xik.”

Eb’ li week’ahom neke’ch’ola ru chi us rik’ineb’ li raatin laj Nefi: “Ninnima inloqʼal rikʼin li kʼaʼru saqen ru; ninnima inloqʼal rikʼin li yaal; ninnima inloqʼal rikʼin lin Jesus, xbʼaan naq aʼan xtoj rix li waam chiru li xbʼalbʼa.”¹⁰

Ma tz’aqal laa’o aj taaqenel re li kixk’e chixjunil choq’ qe? A’an aj Tojol qix ut laj Aatinanel chiqix chiru li Yuwa’b’ej. Li kiwan chi junajwa xk’ulb’al sa’ xb’een li mayej aj tojol-ix ut naq anajwan wan sa lix rahom, li ruxtaan, ut li rajom naq taawanq xsahil qach’ool chi maak’a’ roso’jik? Nintz’ama reheb’ chixjunileb’ li te’rab’i ut te’ril ru li aatin a’in: B’aanuhomaq usilal, meeb’ay xteneb’ankil eerib’ chi tz’aqal toj reetal naq teeraj raj xb’aanunkil sa’ junaq li hoonal moko tz’aqal yaal ta. Chexwanq jo’ aj “fair dinkum” anajwan ut eek’ahomaq li sahil ch’oolejil! Sa’ xk’ab’a’ li Jesukristo, amen.