Xtawb’al li sahil ch’oolejil sa’ xwotzb’al li evangelio

Jun xb’icheb’ li kok’al li jwal nawulak chiwu natikla rik’in li aatin a’in:

Ch’ina-us li kok’ aatin a’an ut chaq’al ru li naxch’olob’ chirix li nokopaab’an wi’!

Jo’ komon sa’ Lix Iglees li Jesukristo rehebʼ laj Santil Paabʼanel saʼ Rosoʼjikebʼ li Kutan, naqanaw aniho. Naqanaw naq li “Dios a’an xYuwa’ li qamusiq’. Laa’o … li ralal xk’ajol, ut a’an nokoxra. Naq maji’aq nokok’ulun sa’ ruchich’och’ wanko chaq rik’in sa’ choxa.”

Naqanaw ru lix k’uub’anb’il na’leb’ li Dios. Koowan chaq rik’in naq a’an kixk’ut chaq. “Chixjunil li rajom” li qaYuwa’—“lix kʼanjel ut lix loqʼal—a’an xkʼeebʼal chiqayal chiqajunjunqal chixjunileb’ li rosob’tesihom. A’an … kixk’uub’ chaq jun k’uub’anb’il na’leb’ tz’aqal re ru re xtz’aqob’resinkil ru li rajom. Laa’o xqataw ru ut xqak’ulub’a li k’uub’anb’il na’leb’ a’in ... re sahil ch’oolejil, ... tojb’al-ix, ut ... kolb’a-ib’ ” naq toj maji’ nokok’ulun chaq sa’ ruchich’och’.

“Li Jesukrito a’an li wan sa’ xyi lix kʼuubʼanbʼil naʼlebʼ li Dios. Rik’in lix tojb’al rix li maak, li Jesukristo kixtz’aqob’resi ru li rajom lix Yuwa’ ut kixb’aanu naq chiqajunilo tooruuq chixyalb’al xsahilal li kole’k chiru li kamk ut li taqenaqil loq’al. Laj Satanas, malaj laj tza, a’an aj xik’ ilonel chirix xk’anjel Li Dios” ut jo’kan chaq chalen chaq xtiklajik.

“Li xtaql ch’oolej, malaj li wankilal re sik’ok-u, a’an jun xnimla maatan li Dios kixk’e chaq reheb’ li ralal xk’ajol. ... Tento taqasik’ ma taqataaqe li Jesukristo malaj laj Satanas.”²

A’ineb’ kok’ yaalalil li naru taqawotz rik’ineb’ li qas qiitz’in.

Inyehaq resil naq lin na’ kixwotzeb’ li kok’ yaalalil jo’ a’in rik’in naq wan xch’ool chi seraq’ik ut kixk’e reetal naq wan xhoonal chixwotzb’aleb’.

Naab’al chihab’ chaq, lin na’ kiwulak chaq chirula’aninkil li was aran Argentina. Lin na’ ink’a’ nawulak chiru taqe’k sa’ so’sol ch’iich’, jo’kan naq kixpatz’ re jun reheb’ li walal naq tixk’e rosob’tesinkil re naq k’ojob’anb’ilaq xch’ool ut kolb’ilaq rix. A’an kireek’a sa’ raam naq taarosob’tesi ajwi’ lix na’chin re taak’ame’q xb’e ut taab’eresiiq xb’aan li Santil Musiq’ej re naq tixkawob’resiheb’ ut tixtoch’eb’ xch’ool li k’iila kristiaan neke’rataw xtzolb’al li evangelio.

Jalam-uuch

li junkab’al Pol

Sa’ li aeropuerto aran Lago Salado, lin na’ ut li was ke’xnaw ru jun li ch’ina xqa’al aj wuqub’ chihab’ li yoo chi sutq’iik sa’ rochoch rik’in xjunkab’al chirix naq xe’wulak chaq chi b’atz’unk sa’ kehil tenamit. Lix na’ xyuwa’ ke’xk’e reetal naq ak xnume’ hoonal chi seraq’ik rik’in lin na’ ut li was, ut ke’xsik’ ru okenk sa’ li seraq’. Ke’xye xk’ab’a’ jo’ laj Eduardo, xMaria Susana, ut xGiada Pol. Wan jun chaab’il chapom ut junajil rik’in li ch’ina junkab’al a’an.

Li wiib’ chi junkab’al ke’saho’ xch’ool naq yookeb’ chi viajik sa’ komonil sa’ li hoonal a’an aran Buenos Aires, Argentina. Ut naq yookeb’ chi seraq’ik, lin na’ kixk’e reetal naq toj sa’ li hoonal a’an, a’aneb’ maajun wa rab’ihomeb’ chaq chirix xk’ojlajik wi’chik lix Iglees li Jesukristo.

Jun reheb’ li xb’een xpatz’om li xSusan a’an a’in, “Ma naru taaye we b’ayaq chirix li yiib’anb’il jalam-uuch oor ru li wan sa’ xb’een li ch’ina-usil kab’l nekexk’uulan wi’ najter k’a’aq re ru?”

Lin na’ kixch’olob’ naq li ch’ina-usil kab’l a’an maawa’ re k’uulank najter k’a’aq re ru, a’an b’an xsantil ochoch li Qaawa’ b’ar wi’ noko’ok sa’ sumwank rik’in li Dios re naq sa’ jun kutan tooruuq chi sutq’iik wi’chik rik’in. Li xSusana kixye re lin na’ naq rub’elaj naq naviajik aran Lago Salado, kitijok chaq re xpatz’b’al naq taakawresiiq lix musiq’.

Chiru li viajik, lin na’ kixch’olob’ xnawom xch’ool chirix li evangelio rik’in kok’ aatin a’b’an kaweb’ ru, ut kixb’oq xSusana re tixsik’eb’ li misioneer sa’ lix tenamit. Li xSusana kixpatz’ re lin na’, “Chan raj ru tintaweb’?”

Ut lin na’ kixchaq’b’e, “Moko ch’a’aj ta xtawb’aleb’; wiib’aqeb’ chi saaj winq saqeb’ xkamiis ut wankeb’ xkorb’aat, malaj wiib’aqeb’ chi saaj ixq chaab’ileb’ li raq’, ut wan jun eetalil chiruheb’ xch’ool rik’in xk’ab’a’eb’ ut naxye ajwi’ “Lix Iglees li Jesukristo reheb’ laj Santil Paab’anel sa’ Roso’jikeb’ li Kutan.” ”

Eb’ li junkab’al ke’xwotzatq x’ajl re xb’oqb’aleb’ rib’ sa’ celular ut ke’xchaq’rab’i rib’ aran Buenos Aires. Li xSusana, anajwan chaab’il wamiiw, naab’al sut xyehom we naq jwal ra kireek’a naq kixkanab’ lin na’ aran sa’ li aeropuerto. Kixye, “Laa na’ jwal nalemtz’un. Ink’a’ naru xch’olob’ankil, a’b’anan lix saqenkil ink’a’ raj nawaj xkanab’ankil chi ixb’ej.”

Naq ke’sutq’i sa’ xtenamiteb’, lix Susana ut lix ko’ xGiada, xkoheb’ re xwotzb’al li xe’xk’ul chaq rik’in xna’ li xSusana, li nach’ wan rochoch rik’ineb’. Naq wankeb’ sa’ b’e, li xSusana kirileb’ wiib’ chi saaj winq li yookeb’ chi xik chiru li b’e ut tiqb’ileb’ rix jo’ chanru xyehe’ chaq re xb’aan lin na’. Kixxaqab’ xb’eleb’aal ch’iich’ sa’ xyi li b’e, ki’el chi sa’, ut kixpatz’ re li wiib’ chi ch’ajom: “Ma komonex laa’ex sa’ Lix Iglees li Jesukristo?”

“Hehe’,” chankeb’ re.

“Ma laa’ex misioneer?” chan.

Sa’ wiib’al ke’chaq’ok, “Hehe’, laa’o!”

Toja’ naq kixye reheb’, “Taqenqex sa’ inb’eleb’aal ch’iich’; tento texxik sa’ wochoch re tine’xtzol.”

Jalam-uuch

li junkab’al Pol

Wiib’ po chik chirix a’an, xMaria Susana kikub’e xha’. Lix ko’, xGiada, kikub’e ajwi’ xha’ naq kixket b’eleeb’ chihab’. Toj yooko chixyalb’al qaq’e rik’in laj Eduardo, li naqara us ta ink’a’ naqanaw k’a’ru taak’ulmanq.

Chirix chik a’an, xSusana x’oken choq’ jun reheb’ li misioneer q’axal chaab’il li nawb’il ru inb’aan. A’an chanchaneb’ li ralal laj Mosiah, naq yoo chaq chixk’amb’aleb’ naab’al chi aamej rik’in li Kristo.

Sa’ jun li qaseraq’, kinpatz’ re. “K’a’ru li muqmu aab’aan? Chan ru naq nakawotz li evangelio rik’ineb’ li komon?”

Kixye we, “Moko ch’a’aj ta. Rajlal kutan naq nin’el chaq sa’ wochoch, ninpatz’ re lin Choxahil Yuwa sa’ lin tij naq tinixb’eresi rik’in junaq li aajelaq ru choq’ re li evangelio sa’ xyu’am. Wan naq nink’am wik’in junaq lix Hu laj Mormon re xwotzb’al rik’ineb’ malaj kok’ hu neke’roksi li misioneer—ut naq ninyoob’ aatinak rik’in junaq, ka’ajwi’ ninpatz’ re ma rab’ihom resil li Iglees.”

Li xSusana kixye ajwi’, “Rajlal yal ninse’ek naq yookin chiroyb’eninkil li tren. Sa’ jun kutan jun li winq kinril ut kixye we, “K’a’ut nakatse’ek?” Maak’a’ sa’ ink’a’uxl naq kixpatz’ we a’an.

“Kinsume, “Ninse’ek xb’aan naq sa lin ch’ool!”

“Toja’ naq kixye, “K’a’ru li jwal sa wi’ aach’ool?”

“Kinsume, “Laa’in komonin sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, ut a’an li nasaho’ wi’ inch’ool. Ma aawab’ihom chirix a’an?” ”

Naq kixye naq ink’a’ rab’ihom, a’an kixsi jun ch’ina hu re ut kixb’oq re naq taawulaq sa’ li domingo chal re sa’ li iglees. Sa’ li domingo a’an, a’an ajwi’ kik’uluk re sa’ rokeb’aal li iglees.

Li Awa’b’ej Dallin H. Oaks kixk’ut:

“Wankeb’ oxib’ li k’anjel naru tixb’aanu chixjunileb’ li komon re tenq’ank sa’ xwotzb’al li evangelio. …

“Xb’een, naru tootijoq re xk’ulb’al qajom chi tenq’ank sa’ li aajel ru k’anjel re li kolb’a-ib’. …

“Xkab’, naru too’ab’inq chiruheb’ li chaq’rab’. … Eb’ li komon tiikeb’ chi paab’ank junelik taawanq rik’ineb’ lix Musiq’ li Kolonel ... re xb’eresinkileb’ naq neke’xsik’ chi tz’aqonk sa’ li xnimal ru k’anjel re xwotzb’al lix evangelio li Jesukristo k’ojob’anb’il wi’chik.

“Rox, naru tootijoq re taak’ehe’q qana’leb’ chirix li k’a’ru naru naqab’aanu laa’o qajunes qib’ re xwotzb’al li evangelio rik’in li jun ch’ol chik. … ut tijok rik’in xk’eek’ookilal qach’ool sa’ xk’anjelankil li musiq’anb’il na’leb’ taqak’ul.”³

Ex winq ut ixq, kok’al, ut saaj, ma naru toowanq jo’ li wamiiw xSusana ut taqawotz li evangelio rik’ineb’ li qas qiitz’in? Ma naru taqab’oq junaq li qamiiw li moko okenaq ta sa’ li qapaab’aal re taaxik chiqix sa’ li iglees sa’ domingo? Ma naru taqawotz junaq lix Hu laj Mormon rik’in junaq qech kab’al malaj qamiiw? Ma naru raj taqatenq’aheb’ jalan chik chi kristiaan re xtawb’aleb’ lix xe’toonil sa’ li FamilySearch malaj xwotzb’al rik’ineb’ li qas qiitz’in li xqatzol chaq chiru li xamaan sa’ rilb’al ru Kim, Taaqehin? Ma naru toowanq jo’ li qaKolonel Jesukristo ut taqawotz rik’ineb’ li qas qiitz’in li naxk’am chaq xsahil qach’ool sa’ qayu’am laa’o? Lix sumenkil chixjunileb’ li patz’om a’in, a’an naq naru! Naru naqab’aanu!

Sa’eb’ li loq’laj hu naqil ru naq “eb’ li komon sa’ Lix Iglees li Jesukristo taqlanb’ileb’ “re kʼanjelak saʼ li rawimq choqʼ re lix kolbʼalebʼ li raamebʼ li winq” (Tzol’leb’ ut Sumwank 138:56). Li k’anjel a’in re kolb’a-ib’ a’an li k’anjel re jultikank aatin xb’aaneb’ li komon, xtenq’ankileb’ li ak’ komon, xtenq’ankileb’ chi sutq’iik li ink’a’ mas neke’wulak, li k’anjel sa’ li santil ochoch ut re li resilal li junkab’al, ut li xk’utb’al li evangelio.”⁴

Ex wamiiw, li Qaawa’ naraj naq taqach’utub’ Israel. Sa’ li Tzol’leb’ ut Sumwank a’an naxye, “Chi moko chexkʼoxlaq chi rubʼelaj chirix kʼaʼru teeye; chekʼuula bʼan rajlal saʼ lee kʼaʼuxl li aatin re li yuʼamej, ut taakʼeemanq eere saʼ li hoonal ajwiʼ aʼan li jun raqal li taabʼismanq re li junjunq chi winq.”⁵

Jo’kan ajwi’, xyeechi’ihom qe:

“Ut wi taaʼuxq naq texkʼanjelaq chixjunil lee kutan saʼ xyaabʼasinkil li jalbʼa-kʼaʼuxlej chiru li tenamit aʼin, ut teekʼam chaq yal ta jun chi aamej wikʼin, kʼaʼjoʼaq xnimal xsahil eechʼool rochbʼeen aʼan saʼ li rawaʼbʼejihom lin Yuwaʼ!

“Ut anajwan, wi nimaq xsahil eechʼool rikʼin jun chi aamej li teekʼam chaq wikʼin saʼ li rawaʼbʼejihom lin Yuwaʼ, kʼaʼjoʼaq xnimal xsahil eechʼool wi teekʼam chaq kʼiila aamej wikʼin!”⁶

Li b’ich re li Tzoleb’aal reheb’ li Kok’al li xintikib’ wi’ naraqe’ rik’in li nimla yaal a’in:

Ninch’olob’ xyaalal naq li aatin a’an yaal ut naq wan jun qaYuwa’ aj rahonel sa’ choxa li yoo chiqoyb’eninkil re toonach’oq rik’in re taarosob’tesi qayu’am ut lix yu’ameb’ li wankeb’ sa’ qasutam. Chiwanq taxaq li qatawom re xk’amb’aleb’ li qas qiitz’in rik’in li Kristo, a’an lin tz’aam sa’ xk’ab’a’ li Jesukristo, amen.