Tawb’il xb’aan xwankilal lix Hu laj Mormon

Naq ninwula’ani chaq eb’ li jalb’il xch’ool sa’ rochocheb’, jun reheb’ li patz’om nawulak chiwu xb’aanunkil reheb’ a’an chan ru naq ke’xnaw ru li Iglees ut chan ru naq ke’xkub’si xha. Maak’a’ naxye wi’ sa’ li hoonal a’an yoo chi wulak sa’ li Iglees malaj ink’a’ chik nawulak chiru naab’al chihab’. Lix sumenkil junelik juntaq’eet: rik’in jun sahil se’ ut jun ilob’aal nalemtz’un neke’ok chixyeeb’al resil chan ru naq ke’tawe’. Relik chi yaal, naqataw ru naq li esil chirix li jalajik ch’oolej a’an ajwi’ junelik li esil chan ru kootawe’.

Li Jesukristo a’an ajwi’ li Qaawa’ reheb’ li k’a’aq re ru neke’sach. A’an naxraheb’ li k’a’aq re ru sachb’ileb’. Jo’kan naq a’an kixk’ut li oxib’ jaljookil ru aatin li naqataw sa’ li ch’ol 15 re laj Lukas: eb’ li jaljookil ru aatin re li karneer sachenaq, re li tumin sachenaq ut, sa’ xraqik, li yuwa’b’ej li kixkuy xmaak li ralal. Sa’ li junjunq seraq’ a’in maak’a’ naxye k’a’ut naq ke’sachman. Maak’a’ naxye ma ke’xk’e reetal naq sachenaqeb’. Wan jun xnimal ru eek’ahom re sahil ch’oolejil li naxyaab’asi, “Chisaho’q sa’ qach’ool wochb’eenex, xb’aan naq xintaw lin karneer li xsachk chiwu.”¹ Sa’ xraqik, maak’a’ sachenaq choq’ re a’an.²

Nawaj xwotzb’al eere sa’ li ewu a’in li k’a’ru jwal loq’ choq’ we—li esil chirix chan ru naq kintawe’ laa’in.

Naq yookin chaq chi wulak sa’ 15 chihab’, kinb’oqe’ xb’aan li wikan laj Manuel Bustos chi wank jarub’aq kutan rik’in ut lix junkab’al arin sa’ li Estados Unidos. A’an a’in jun xnimal ru hoonal kixk’e rib’ chiwu re naq tinruuq chixtzolb’al li ingles. Li wikan ak okenaq chik sa’ li paab’aal a’in junxil chiru naab’al chihab’, ut wan rik’in jun xnimal ru musiq’ej re xpuktesinkil li aatin. Maare jo’kan naq lin na’, laa’in moko xinnaw ta, ki’aatinak rik’in a’an ut kixye re naq us naq tinxik rik’ineb’ a’b’an wan jun na’leb’: naq ink’a’ tixyal xq’e chinq’unb’esinkil naq tin’ok jo’ komon sa’ lix Iglees. Laa’o wan qapaab’aal sa’ li Catolico chiru naab’al tasal tenamit, ut maak’a’ rajom naq taqajal a’an. Li wikan wan xch’ool naq chi jo’kan taakanaaq, ut kixtz’aqob’resi li raatin ut q’axal wi’chik naq ink’a’ naxsume we k’a’ruhaq inpatz’om chirix li Iglees.

A’b’anan, li k’a’ru ink’a’ neke’ru chixmuqb’al chiwu li wikan ut lix chaab’il ixaqil a’an aniheb’ a’an.³

Ke’xk’e we jun li warib’aal sa’ jun na’ajej b’ar wi’ wan naab’al li hu. Kiwil naq sa’ lix nimal ru xna’aj li hu’ wankeb’ maare wiib’ cient reetalil lix Hu laj Mormon sa’ naab’al aatinob’aal; wan tana’ jun may sa’ li aatinob’al español.

Sa’ jun kutan, rik’in wajom chi nawok, kinchap jun lix Hu laj Mormon sa’ español.

Jalam-uuch

lix Hu laj Mormon sa’ español

A’an jun li q’un b’ayaq li rix, saqirax lix b’onol, wan li reetalil li anjel Moroni sa’ li rix. Naq kinte, sa’ lix b’eenil perel tz’iib’anb’il jun li yeechi’ihom: “Ut naq teekʼul li kʼaʼaq re ru aʼin, nawaj relajinkil cheru naq chepatzʼ re li Dios, li Junelik Yuwaʼbʼej, saʼ lix kʼabʼaʼ li Kristo, ma inkʼaʼ yaal li kʼaʼaq re ru aʼin; ut wi texpatzʼoq rikʼin xʼanchalil eechʼool, chi tiik eerajom, chi wank eepaabʼaal chirix li Kristo, aʼan tixkʼutbʼesi cheru li yaal chirix, rikʼin lix wankil li Santil Musiqʼej.”

Sa’ xraqik tiqb’il ru li aatin: “Ut rikʼin lix wankil li Santil Musiqʼej naru teenaw li yaal chirix chixjunil li kʼaʼaq re ru.”⁴

K’a’jo’ xch’a’ajkilal xch’olob’ankil chan ru kinixtoch’ li raqal a’an sa’ lin k’a’uxl ut lin ch’ool. Rik’in x’anchalil inch’ool ninye eere naq moko yookin ta chixsik’b’al “li yaal.” Laa’in ka’ajwi’ jun saaj winq, sa inch’ool rik’in lin yu’am, yookin chixyalb’al xsahilal li k’a’ru ak’ nawil.

A’b’anan, rik’in li yeechi’ihom a’an sa’ lin k’a’uxl, kin’ok chirilb’al ru li hu sa’ muqmu. Naq yookin chixtzolb’al, kintaw ru naq wi relik chi yaal nawaj xnawb’al li k’a’ru wan chi sa’, tento naq tin’ok chi tijok;. Ut chiqajunilo naqanaw chi tz’aqal yaal li k’a’ru nak’ulman naq naqak’e qach’ool moko ka’aj ta wi’ chirilb’al ru, jo’kan b’an ajwi’, tijok chirix lix Hu laj Mormon. Us b’i’, a’an kink’ul laa’in. A’an a’in q’axal wi’chik chaab’il ut ka’ajwi’ jun sutaq choq’ we—yaal, tz’aqal re ru juntaq’eet jo’ neke’xnumsi naab’aleb’ chi komon sa’ xsutam li ruchich’och’. Xinwulak chixnawb’al xb’aan lix wankilal li Santil Musiq’ej naq Lix Hu laj Mormon a’an yaal.

Jo’kan naq xkohin rik’in li wikan re xch’olob’ankil chiru li k’a’ru kik’ulman ut naq ak kawresinb’ilin chik re naq taakub’eeq inha’. Li wikan kisach tz’aqal xch’ool. Ki’ok sa’ lix b’eleb’aal ch’iich’, ut xko’o toj sa’ li aeropuerto ut kisutq’i chaq rik’in lin b’oleet re li avion re q’ajk sa’ ochoch, rik’in jun li ch’ina hu choq’ re lin na’ b’ar wi’ kixtz’iib’a, “Laa’in maak’a’ xinb’aanu chirix a’an!”

Maare anchal yaal li k’a’ru naxye. Laa’in kintawe’ chi tz’aqal xb’aan lix wankilal Lix Hu laj Mormon.

Maare naab’aleb’ tawb’ileb’ xb’aaneb’ li qachaab’il misioneer sa’ xsutam li ruchich’och’, chixjunileb’ jo’ sachb’a-ch’oolej. Malaj tawb’ileb’ xb’aaneb’ ramiiw k’eeb’ileb’ chi na’no xb’aan li Dios sa’ lix b’eheb’. Jo’kan ajwi’ maare ke’tawman xb’aan anihaq sa’ li tasal tenamit a’in malaj xb’aan junaq lix xe’toonileb’.⁵ A’ yaal chan ru kik’ulman, re xik chi uub’ej sa’ jun tz’aqal jalajik ch’oolej, chixjunileb’ tento wanqeb’ xch’ool re te’tawe’q xb’aan lix wankilal li yaal li wankeb’ sa’ lix Hu laj Mormon. Jo’kan ajwi’, tento naq tz’aqal te’xteneb’ rib’ chi yaal rik’in li Dios naq te’xyal xq’e chixpaab’ankileb’ lix taqlahom.

Naq xinsutq’i chaq sa’ Buenos Aires, lin na’ kixk’e reetal naq relik chi yaal nawaj xkub’sinkil inha’. Xb’aan naq laa’in po’resinb’il b’ayaq inmusiq’, rik’in chaab’il na’leb’ank ki’ok chintenq’ankil. Ut chi ink’a’ kixnaw, ki’ok chixb’aanukil wik’in li tz’ilok-ix re li kub’iha’. Nink’oxla naq li tz’ilok-ix a’an jwal nim chik xchamal chiru jo’ chanru neke’xb’aanu li misioneer. A’an kixye we, “Wi taawaj xkub’sinkil laa ha’, laa’in tatintenq’a. A’b’an xb’een wa tinb’aanu wiib’ oxib’aq li patz’om ut nawaj naq taak’oxla chi us ut tinaasume chi anchal aach’ool. Ma taateneb’ aawib’ chi wulak sa’ li Iglees chixjunileb’ li domingo?”

Kinye re,“Hehe’, laa’in tinb’aanu a’an.”

“Ma nakanaw jarub’ hoor nab’ay li junjunq chi ch’utam?”

“Hehe’, ninnaw” kinchaq’ok re.

A’an kixye wi’chik, “Us b’i’, wi taakub’eeq aaha’, laa’in yooqin chawilb’al ma yooqat chi wulak.” Chirix a’an kixpatz’ we ma yaal naq wan inch’ool naq maajun sut twuk’ li uk’a’ nakaltesin ut li mayib’k.

Kinsume, “Hehe’, laa’in tintz’aqob’resi ru a’an ajwi’.”

Ut a’an kixye wi’chik, “Wi taakub’eeq aaha’, laa’in tink’aak’ale naq jo’kan taa’uxmanq.” Ut chi jo’kan kixb’aanu rik’in li junjunq chi taqlahom.

Li wikan kixb’oq chaq lin na’ re xyeeb’al re naq maak’a’aq lix k’a’uxl, xb’aan naq moqon taanume’q chiwu a’an. Chirix xnumik kaahib’ chihab’, naq xink’ul lin b’oqb’al re tinxik chi k’anjelak sa’ li Mision Uruguay Montevideo, lin na’ kixb’oq li wikan re xpatz’b’al re jo’q’e tz’aqal taanume’q li wajom. Chi yaal naq chirix naq kikub’e inha’, lin na’ a’an jun na’b’ej jwal sa chik xch’ool.

Kinwulak chixnawb’al naq lix Hu laj Mormon a’an aajel ru sa’ lix b’ehil li jalajik ch’oolej naq naqanumsi sa’ junjunqal li yeechi’ihom naq “jun li winq q’axal wi’chik taaruuq chixjilosinkil rib’ rik’in li Dios rik’in xpaab’ankil li na’leb’ wan chi sa’, chiru k’a’ruhaq chik chi hu.”⁶

Laj Nefi kixch’olob’ chi jo’ka’in li tz’aqal rajom Lix Hu laj Mormon:

“Xbʼaan naq nokokʼanjelak chi yalbʼil qaqʼe chi tzʼiibʼak, re xqʼunbʼesinkilebʼ xchʼool li qalal qakʼajol, joʼkebʼ ajwiʼ li qas qiitzʼin, naq teʼxpaabʼ li Kristo, ut teʼxkʼam wiʼchik ribʼ saʼ usilal rikʼin li Dios. …

“Jo’kan b’i’ nokoʼaatinak chirix li Kristo, nasahoʼ saʼ qachʼool rikʼin li Kristo, nokojultikan chirix li Kristo, naqaye profeetil aatin chirix li Kristo, … re naq ebʼ li qalal qakʼajol teʼruuq chixnawbʼal bʼar taaruuq teʼiloq re teʼisiiq lix maakebʼ.”⁷

Sa’ chixjunil lix Hu laj Mormon wan reetalil li santil rajom.

Xb’aan a’an naq, anihaq aj ilol hu li tixteneb’ rib’ chi tzolok chi anchal xch’ool, rik’in tijok, moko ka’aj ta wi’ taatzoloq chirix li Kristo, taa’ok aj b’an wi’ chi tzolok rik’in li Kristo—q’axal wi’chik wi naxsik’ ru xyalb’al rix “lix chaab’ilal li raatin”⁸ ut ink’a’ naxtz’eqtaana sa’ junpaat xb’aan xmaak’a’il xpaab’aal⁹ li wan xxe’il chiru li neke’xye anihaqeb’ chirix li k’a’aq re ru li maajun sut ke’ril ru sa’ junaq li hu.

Li Awa’b’ej Russell M. Nelson xk’oxla sa’ xch’ool: “Naq nink’oxlak chirix lix Hu laj Mormon, nink’oxlak chirix li aatin wankilal. Eb’ li yaalalil sa’ lix Hu laj Mormon wankeb’ lix wankilal re k’irtesink, waklesink ch’oolej, k’ojob’ank wi’chik, tenq’ank, k’awob’resink, k’ojob’ank ch’oolej ut re naq taawanq xsahil xch’ool li qaam.”¹⁰

Lin b’oqom sa’ li ewu a’in choq’ qe chiqajunjunqal, maak’a’ naxye jarub’ chihab’ li qawanjik sa’ li Iglees, a’an naq taqakanab’ naq lix wankilaleb’ li yaalalil sa’ lix Hu laj Mormon toohe’xtaw ut toohe’xq’alu jun sut wi’chik ut rajlal kutan naq yooqo chixsik’b’al chi anchal qach’ool li k’utb’esinb’il na’leb’ choq’ qe. Ut tixb’aanu, wi laa’o naqakanab’ chixb’aanunkil.

Ninch’olob’ xyaalal chi anchal inch’ool naq sa’ lix Hu laj Mormon wan lix tz’aqalil lix evangelio li Jesukristo, ut naq li Santil Musiq’ej tixxaqab’ xyaalal k’iila sut re anihaq li tixsik’ xnawom chi anchal xch’ool re xkolb’al li raam.¹¹ Sa’ xk’ab’a’ li Jesukristo, amen.