Musiq’ejil seeb’al

Naq nekeroksi lix taql eech’ool re xtawb’al lee hoonal rajlal kutan re xjilosinkil eerib’ rik’in lix yaab’ xkux li Dios, rik’in tz’aqal lix Hu laj Mormon, timil timil teek’e reetal naq lix yaab’ xkux saqen chik choq’ eere ut ak nekenaw chik ru.

Junpak’al chik, li k’a’ru naxsachb’esi qach’ool ut li choqink li nanumta sa’ li ruchich’och’, sa’ li qochoch ut saheb’ li qayu’am, naru neke’xch’a’ajkila chiqu rab’inkil lix yaab’ xkux. Li k’a’ru naxsachb’esi qach’ool naru naxnujob’resi qak’a’uxl ut li qach’ool toj reetal naq maak’a’ xna’aj xq’unal xyaab’ xkux li Santil Musiq’ej.

Li Profeet aj Jose Smith kixk’ut naq lix k’ihal sut, li Dios naxk’utb’esi rib’ “chiru junaq winq, sa junjunqal, sa’ lix warib’aal; malaj sa’ junaq na’ajej maa’ani chik wank aran malaj sa’ junaq ch’och’ ut junelik maak’a li choqink ut ink’a’ ajwi’ nanumta li choqink.”³

Laj Satanas naraj qanajtob’resinkil chiru xyaab’ xkux li Dios rik’in qisinkil sa’eb’ li ch’anch’ookil na’ajej. Wi li Dios na’aatinak rik’in jun li ch’ina xyaab’ kuxej q’un na’aatinak, laa’ex ut laa’in tento naq taqajilosi qib’ chixk’atq re rab’inkil. K’oxlahomaq li k’a’ru raj taak’ulmanq wi taqak’e raj qach’ool chi wank chi chapcho rik’in li choxa jo’ chanchan naq naqachap qib’ rik’in li Wi-Fi! Sik’omaq jun hoonal ut jun na’ajej re rab’inkil lix yaab’ xkux li Dios rajlal kutan. Ut wanqex chixb’aanunkil a’an chi tz’aqal re ru, xb’aan naq naab’al taa’uxmanq xb’aan a’an!

Naq nekek’ul li esil ut chirix a’an neke’b’aanu rik’in ajom, wan jun xk’anjel li Qaawa’ choq’ eere. Naq mas wi’chik nekexk’anjelak, k’a’jo’ wi’chik neke’taw ru lix yaab’ xkux li Musiq’ej. Rajlal wi’chik teek’e reetal lix b’eresihom li Dios ut naq a’an wan “xch’ool … chixk’utb’esinkil li rajom ut lix taql xch’ool.”⁴ Wi nekeb’ay eerib’ naru nasach sa’ lee ch’ool lee reek’ahom malaj li hoonal re xtenq’ankil anihaq sa’ xk’ab’a’ li Dios.

Li tij li naxk’e xch’ool chixsumenkil li qaChoxahil Yuwa’ a’an li naqatz’aama re naq tooxb’eresi rik’in junaq li naraj ru qatenq’. Li Awa’b’ej Henry B. Eyring kixk’ut chiqu xsik’b’al li k’utb’esinb’il na’leb’ rik’in xpatz’b’al re li Dios ani tooruuq chixtenq’ankil sa’ xk’ab’a’. “Wi nekeroksiheb’ li patz’om jo’ a’an, li Santil Musiq’ej taachalq ut teereek’a kok’ toch’e’k chirix li k’a’aq re ru li te’xruhanq chixb’aanunkil choq’ reheb’ li kristiaan. Naq nekexxik ut nekeb’aanu li k’a’aq re ru a’an, wankex sa’ lix k’anjel li Qaawa’, ut naq wankex sa’ lix k’anjel li Qaawa’, nawan lee k’ulub’ chixk’ulb’al li maatan re li Santil Musiq’ej.”⁵

Naru nekextijok ut nekepatz’ re li Qaawa’ naq te’xtz’aqonq chi k’anjelak sa’ lix k’anjel. Naq teeb’aanu, a’an naru roksinkil lee seeb’al li ak wan eerik’in re xb’aanunkil lix nimal ru xk’anjel.

Jalam-uuch

laj Fritz Lundgren, lix yuwa’chin li Hermana Craig

Lin mama’, laj Fritz Hjalmar Lundgren, kichal chaq aran Suecia naq toj wan re b’elelaju chihab’. Kiwulak sa’ America xjunes, rik’in jun ajwi xk’amb’al li raq’ ut waqib’ chihab’ lix tzolb’al. Moko naxnaw ta aatinak sa’ ingles, xko’o aran Oregon, b’ar wi’ kik’anjelak jo’ aj si’inel ut rik’in li wi’xa’an ut lin na’, ki’ok sa’ li Iglees. Maajun sut kixb’eresi jun li teep, a’b’an jo’ jun aj ula’aninel tiik chi paab’ank, kixk’ameb’ numenaq meero cient chi junkab’al sa’ li iglees. Chan ru naq kixb’aanu?

Chirix lix kamik lin mama’, yookin chaq chi ilok sa’ jun li kaax b’ar wi’ wankeb’ li hu ut xintaw jun li tz’iib’anb’il esil xb’aan jun winq li kisutq’i chaq sa’ li iglees xb’aan lix rahom lin mama’. Li tz’iib’anb’il esil naxye, “Laa’in nink’oxla naq lix muqb’il na’leb’ li Hermano Fritz a’an naq junelik wank sa’ lix k’anjel li qaChoxahil Yuwa’.”

Li tz’iib’anb’il esil, a’an re li Hermano Wayne Simonis. Lin mama’ narula’ani chaq ut kiwulak chixnawb’aleb’ ru li junjunq komon re lix junkab’al. Chiru xnumik li hoonal, lin mama’ kixye reheb’ naq na’ajmank ruheb’ ut kixb’oqeb’ chi wulak sa’ li iglees. A’b’an sa’ li domingo a’an, li Hermano Simonis ki’ajk rik’in jun ch’a’ajkilal—maji’ naxchoy xtz’apb’al xb’een li rochoch ut neke’royb’eni nak taat’ane’q li hab’ sa’ li xamaan a’an. Kixk’e xch’ool naq taaxik sa’ li iglees, tixk’e xsahil xch’ool lin mama’, ut chirix a’an taasutq’iiq sa’ li rochoch re xchoyb’al lix b’een li rochoch. Lix junkab’al te’ruuq chi wulak sa’ li ch’utam re li loq’laj wa’ak wi mak’a’aq a’an.

Lix k’uub’anb’il na’leb’ yoo chi xik chi us, toj reetal naq, wan chaq sa’ xb’een li rochoch, kirab’i naq wan ani yoo chaq chi taqe’k sa’ li eeb’. A’an kixye: “Naq kintaqsi li wilob’aal, … kiwil li Hermano Fritz xaqxo toj sa’ xb’een li eeb’. A’an ka’ajwi’ xinixse’e. Sa’ xtiklajik, kichal inxutaan ut chanchanin jun li ch’ina al naq kitawman naq ink’a’ xko’o chi tzolok. Moqon … kichal injosq’il. A’b’an li Hermano Fritz ka’ajwi’ kirisi lix chakeet ut kixt’uyub’ sa’ li eeb’. Naq kixb’as li ruq’ lix saqi kamiis, kinril ut kixye we, “Hermano Simonis, ma wan jun chik laa tenleb’? Jwal aajel tana’ ru li k’anjel a’in malaj ink’a’ raj xakanab’ laa junkab’al, ut wi jwal aajel ru, laa’in nawaj aatenq’ankil.” Naq kin’ilok sa’ lix naq’ ru ka’ajwi kiwil chaab’ilal ut xrahom aj Kristiano. Ki’el lin josq’il. … Sa’ li domingo a’an kinkanab’ lin k’anjeleb’aal ut kintaaqe lin chaab’il amiiw, kinkub’e chaq sa’ li eeb’ ut koosutq’i sa’ li kapiiy.”

Lin mama’ kiwan chaq sa’ lix k’anjel li Qaawa’ ut naxnaw naq tento xsik’b’aleb’ li sachenaq karneer. Jo’eb’ li kaahib’ chi winq ke’xtaqsi li ramiiw sik sa’ xb’een li kab’l ut chirix a’an ke’xkub’si re naq li Jesukristo tixk’irtesi,⁶ lix k’anjel lin mama’ kik’ame’ ajwi’ sa’ xb’een li kab’l. Li Qaawa’ naxtaqla li k’utb’esinb’il na’leb’ choq’ reheb’ li neke’xk’e xch’ool chixtenq’ankileb’ li ras riitz’in.

Toje’, kiwil ru resil jun chik xnimal ru misioneer sa’eb’ li loq’laj hu li wan chaq sa’ lix k’anjel li Qaawa’. Laj Aaron kik’utuk chaq chiru lix reyeb’ aj Lamanita li kixpatz’ rib’ k’a’ut naq laj Ammon, li riitz’in laj Aaron, moko kiwulak ta chixtzolb’al. “Ut laj Aaron kixye re li rey: Kʼe reetal, lix Musiqʼ li Qaawaʼ kixbʼoq saʼ jalan chik bʼe.⁷

Li Musiq’ej kiraatina li waam: chiqajunqal wan jun k’anjel taqab’aanu, ut wan naq li Musiq’ej naru tooxb’oq “sa’ jalan chik b’e.” Wan naab’al chan ru naru xkab’lankil lix awa’b’ejihom li Dios jo’ xtzolom li Jesukristo li neke’xb’aanu ut neke’xpaab’ lix sumwank. Jo’ xtzolom tiik chixpaab’ankil a’an, naru nekek’ul eemusiq’ankil ut k’utb’esinb’il na’leb’ choq’ eere li wan rilom rik’ineb’ lix taqlahom ut li yiib’anb’il choq’ eere. Laa’ex wan lee k’anjel ut lee teneb’ankil k’a’ajwi’ choq’ eere sa’ lee yu’am ut teek’ul lee b’eresinkil re naq te’xruuq chixb’aanunkil.

Laj Nefi, li ras laj Jared, ut jo’kan ajwi’ laj Moises, tento naq ke’xnumsi lix nimal ru ha’—ut chixjunjunqaleb’ ke’xb’aanu sa’ jalanil na’leb’. Laj Nefi kixpech’ “li che’ chi chanchan li k’anjel ink’a’ nawb’il ru.”⁸ Li ras laj Jared kixyiib’eb’ li jukub’ “tz’aptz’o ru chanchan jun sek’.”⁹ Ut laj Moises “kinume’k sa’ xyi li palaw chi chaqi ru xb’eheb’.”¹⁰

Sa’ junjunqal ke’xk’ul lix b’eresihom yiib’anb’il choq’ reheb’ ut sa’ junjunqal ke’xk’ojob’ xch’ooleb’ ut ke’xb’aanu. Li Qaawa’ naxnaw aniheb’ neke’paabank, ut jo’ kixye laj Nefi, “tixk’uub’ jun li b’e choq’ qe re naq taqab’aanu li k’a’ru nokoxtaqla wi’.”¹¹ K’eehomaq reetal naq laj Nefi naxye, “junli b’e”—moko “lib’e ta.”

Ma ink’a’ naqak’e reetal malaj naqatz’eqtaana lix taqlahom li Qaawa’ xb’aan naq a’an kixk’uub’ jalan chik b’e chiru li yooko chiroyb’eninkil?

Lin mama’ kik’ame’ sa’ jun jalanil na’ajej—tiqto rik’in xchakeet, sa’ xb’een jun ochoch, sa’ li domingo. K’ojk’ooq eech’ool chiru li Dios naq a’an texxb’eresi, us ta li b’e chanchan naq jalan ru chiru li nekeroyb’eni malaj jalan chiruheb’ li re lee ras eeriitz’in.

Eb’ laj Santil Paab’anel sa’ Roso’jikeb’ li Kutan neke’tawman chi naab’al paay ru ut xninqaleb’, a’b’an “chixjunileb’ juntaq’eeteb’ chiru li Dios”—us ta “q’eq ut saq, moos ut ach’ab’anb’il, winq ut ixq,” ani ink’a’ sumsu ut li ani sumsu, saaj ut tix, komon sa’ qapaab’aal chiru chixjunil yu’am malaj tojo’ kub’enaq xha.¹² Maak’a’ naxye aniheb’ malaj ani aj-ik’in yookeb’ chixyalb’al ru, b’oqb’ileb’ chixjunileb’ chi wank sa’ lix meex li Qaawa’.¹³

Naq lix sik’b’al ut xb’aanunkil li rajom li Yuwa’b’ej taakanaaq jo’ eetalil re laa yu’am rajlal kutan, relik chi yaal taak’ame’q aab’e chi jalaak ut chixjalb’al aak’a’uxl.

Li ak’ k’uub’anb’il na’leb’ re li Iglees choq’ reheb’ li kok’al ut eb’ laj saaj wan xxe’ chirix xtzolb’al xsik’b’al li k’utb’esinb’il na’leb’, xtawb’al li k’a’ru naraj li Qaawa’ naq taqab’aanu, ut chirix a’an xb’aanunkil jo’ chanru lix b’eresihom a’an. Chiqajunqal, maak’a’ naraj naxye jarub’ chihab’ wan qe malaj chan ru qawanjik, naru naqayal qaq’e chi sik’ok, chi k’uluk, ut chi b’aanunk. Jo’ chanru teetaaqe li k’utb’il na’leb’ maak’a roso’jik k’eeb’il choq’ re li qakutan, texjiloq chixk’atq li Jesukristo, lix rahom, lix saqen, lix b’eresihom, lix tuqtuukilal, ut lix wankilal re k’irtesink ut re ach’ab’ank. Ut taanumtaaq lee musiq’ejil seeb’al re naq texwulaq chi wank jo’ xk’anjeleb’aal re taa’uxmanq lix nimla k’anjel. Sa’ xk’ab’a’ li Jesukristo, amen.