Li wiib’ xninqal ru taqlahom

Tintikib’ rik’in li k’a’ru kixye li Jesus naq a’aneb’ li wiib’ xninqal ru taqlahom.

“Taara li Qaawa’ laa Dios chi anchal laa ch’ool, chi anchal laa waam ut chi anchal laa k’a’uxl.

“Aʼan li xbʼeen ut xnimal ru chaqʼrabʼ.

“Li xkabʼ chanchan ajwiʼ aʼan: Taara laa was aawiitzʼin joʼ naq nakara aawibʼ laaʼat.”⁴

A’in naraj naxye naq taqlanb’ilo chixraab’al chixjunileb’, xb’aan naq lix jaljookil ru aatin li Jesus chirix laj Samaria aj uxtaan naxk’ut naq qas qiitz’in qib’ chiqajunilo.⁵ A’b’anan, sa’ x’anchalil qach’ool chixpaab’ankil li xkab’ chaq’rab’ a’in, aajel ru naq ink’a’ taasachq sa’ qach’ool xpaab’ankil li xb’een, a’an naq taqara li Dios chi anchal qach’ool, li qaam, ut li qak’a’uxl. Naqak’ut li rahok a’in rik’in “xpaab’ankileb’ lix taqlahom.”⁶ Li Dios naxteneb’ sa’ qab’een ab’ink chiruheb’ lix taqlahom, xb’aan naq ka’ajwi’ rik’in ab’ink chiru, ut rik’in xjalb’al qak’a’uxl, tooruuq chi sutq’iik chi wank rik’in a’an, ut toowulaq chi tz’aqal qe qu jo’ a’an.

Naq x’aatinak rik’ineb’ li saaj re li Iglees toje’, li Awa’b’ej Russell M. Nelson x’aatinak chirix chan ru naq “lix rahom li Dios wan chi laq’lo rik’ineb’ lix chaq’rab’.”⁷ Li chaq’rab’ li q’axal aajel ru choq’ reheb’ li neke’reek’a ratawom choq’ re rech winqilal malaj rech ixqilal, a’an lix chaq’rab’ li Dios chirix li sumlaak, ut li chaq’rab’ re li saq ru ch’oolej. Xkab’ichaleb’ li chaq’rab’ a’in aajeleb’ ru sa’ lix k’uub’anb’il na’leb’ li qaChoxahil Yuwa’ re xkolb’aleb’ li ralal xk’ajol. Jo’ kixk’ut li Awa’b’ej Nelson, “Eb’ lix chaq’rab’ li Dios k’eeb’ileb’ xb’aan xnimal lix rahom choq’ qe, ut xb’aan naq naraj naq taqak’ul jo’ nimal li naru chiqu.”⁸

Li Awa’b’ej Nelson kixk’ut, “Sa’ k’iila ch’och’ ... ak k’ulub’anb’il chiru chaq’rab’ lix sumlajik wiib’ chi winq malaj wiib’ chi ixq. Jo’ komon sa’ li Iglees, naqa’oxloq’iheb’ lix chaq’rab’il li tenamit ... , sa’ li wankeb’ wi’ li chaq’rab’ chirix li sumlaak. A’b’anan, yaal ajwi’ naq sa’ xtiklajik li sumlaak kik’ojob’aman xb’aan li Dios! Ut toj sa’ li kutan a’in, a’an raatin li Dios naq li sumlaak naraj naxye xsumlajik li winq rik’in li ixq. Li Dios moko xjal ta k’a’ru xyaalalil li sumlaak jo’ kixye a’an.”

Li Awa’b’ej Nelson kixye ajwi’: “Li Dios ink’a’ ajwi’ xjal lix chaq’rab’ re li saq ru ch’oolej. Moko jalb’il ta li k’a’ru teneb’anb’il re ok sa’ li santil ochoch.”⁹

Li Awa’b’ej Nelson xjultika qe naq “li qataqlankil jo’ apostol a’an naq ka’ajwi’ li yaal taqak’ut. Li qataqlankil a’an ink’a’ naxk’e [xwankileb’ li apostol] chixjalb’al lix chaq’rab’ li Dios.”¹⁰ Chi jo’kan, ex inkomon ixq, eb’ laj jolominel sa’ li Iglees junelik tento sa’ xb’eeneb’ xk’utb’al lix aajelil ru li sumlaak wan wi’ jun winq rik’in jun ixq, ut li chaq’rab’ re li saq ru ch’oolej li na’ochb’eenink re.

Lix k’anjel lix Iglees li Jesukristo reheb’ laj Santil Paab’anel sa’ Roso’jikeb’ li Kutan a’an xkawresinkileb’ li ralal xk’ajol li Dios choq’ re li choxahil awa’b’ejihom, ut li loq’alil q’axal nim li wan aran, a’an li taqenaqil loq’al, malaj li junelik yu’am. Li taqenaqil usilal a’an ka’ajwi’ natawman rik’in li sumlaak choq’ re li junelik q’e kutan.¹¹ Sa’ li junelik yu’am natawman li wankilal re alank, li ka’ajwi’ na’ux naq wan li winq rochb’een li ixq¹²—ut yeeb’il resil sa’eb li k’utb’esinb’il na’leb’ re li kutan a’in jo’ “xkanajikeb’ li iyajilb’ej chi junelik q’e kutan.”¹³

Sa’ li raatin choq’ reheb’ li saaj maji’ neke’sumla, li Awa’b’ej Nelson xk’ut, “Rik’in xpaab’ankileb’ lix chaq’rab’ li Dios, kolb’ilaq eerix naq yookex chi b’eek sa’ xjayal li taqenaqil loq’al”¹⁴—a’an ajwi’ li ok jo’ chanru li Dios, rik’in li taqenaqil yu’am ut choxahil wankilal li wan reheb’ li qaChoxahil Na’ qaYuwa’. A’in jun osob’tesink naqaj choq’ re chixjunileb’ li raab’ileb’ qab’aan. Sa’ xk’ab’a’ li qarahom, ink’a’ naru naqakanab’ naq li rahom a’an taanumtaaq sa’ xb’eeneb’ lix taqlahom, ut lix k’uub’anb’il na’leb’, ut lix k’anjel li Dios, li naqanaw naq tixk’am xnimal li sahil ch’oolejil sa’ xb’eeneb’ li ani raarookeb’ qab’aan.

A’ut wankeb’ naab’al li raarookeb’ qab’aan, ut naab’aleb’ ajwi’ li xe’k’uluk re li evangelio li k’ojob’anb’il wi’chik, li ink’a’ neke’xpaab’ malaj ink’a’ neke’raj xtaaqenkil lix chaq’rab’ li Dios chirix li sumlaak ut li chaq’rab’ re li saq ru ch’oolej. K’a’ru te’xk’ul eb’ a’an?

Li raatin li Dios naxk’ut naq chiqajunilo ralal xk’ajolo li Dios, ut naq a’an kooxyo’ob’tesi re taawanq xsahil qach’ool.¹⁵ Eb’ li k’utb’esinb’il na’leb’ sa’ li kutan a’in neke’xk’ut chiqu naq li Dios kixk’e jun k’uub’anb’il na’leb’ choq’ re li yu’am a’in sa’ li naru naqasik’ wi’ li rosob’tesihom li q’axal taqenaq, malaj ut naru naqasik’ ru jun b’e li naxk’am sa’ jun reheb’ lix awa’b’ejihom li kub’enaqeb’ wi’chik xloq’al.¹⁶ Sa’ xk’ab’a’ lix nimal xrahom li Dios choq’ re chixjunileb’ li ralal xk’ajol, eb’ li awa’b’ejihom a’an li kub’enaqeb’ xwankil, toj xchaq’aleb’ wi’chik ru chiru chixjunil li naru neke’xtaw ru li ani wankeb’ sa’ li yu’am a’in.¹⁷ A’an lix tojb’al rix li maak xb’aan li Jesukristo li naxk’e chi uxmank chixjunil a’in, xb’aan naq a’an “li naxnimob’resi xloq’al li Yuwa’b’ej, ut naxkol chixjunil lix yiib’ahom li ruq’.”¹⁸

Ak xin’aatinak chirix li xb’een chaq’rab’, a’ut k’a’ru tinye chirix li xkab’? Chan ru naqapaab’ li chaq’rab’ re xraab’aleb’ li qas qiitz’in? Laa’o naqayal qaq’e chixk’utb’al chiruheb’ li komon sa’ li Iglees naq eb’ li neke’taaqenk re li raatineb’ malaj lix b’aanuhomeb’ li neke’rahok rech winqilal malaj rech ixqilal, tento te’qak’ul rik’in li rahok li kixye li Kolonel naq taqak’ut chiru chixjunileb’ li qas qiitz’in. Naq kixaqab’aman naq li winq naru nasumla rik’in li winq ut li ixq rik’in li ixq sa’ li Estados Unidos, li Xb’eenil Awa’b’ejil ut lix Molameb’ li Kab’laju chi Apostol ke’xye: “Lix evangelio li Jesukristo naxk’ut chiqu naq chiqaraheb’ ut chaab’ilaq qach’ool rik’ineb’ chixjunil li kristiaan—us ta wan naq moko wanko ta sa’ aatin rik’ineb’. Naqaye naq eb’ li neke’taaqenk re lix chaq’rab’il li tenamit naq k’ulub’anb’il lix sumlajikeb’ wiib’ winq malaj wiib’ ixq, tento naq ink’a’ te’qaatina chi maak’a’ li oxloq’ink.”¹⁹

Jo’kan ajwi’, tento naq maajo’q’e taqarahob’tesiheb’ li ani ink’a’ neke’xwotz li qapaab’aal ut li qateneb’ankil.²⁰ Naraho’ qach’ool chirilb’al naq wankeb’ li kristiaan li ch’a’ajkilanb’ileb’ xb’aaneb’ li na’leb’ a’in, ut neke’reek’a naq ink’a’ k’ulb’ileb’ ut naq tz’eqtaananb’ileb’ xb’aaneb’ junjunq komon ut aj jolominel sa’eb’ li qajunkab’al, li qateep, ut li qa’oqech. Chiqajunilo tento taqayal qaq’e re naq aj rahonelaqo, ut naq chaab’ilaq li qaatin.

Ink’a’ naqataw ru k’a’ut naq jalan jalanq li ch’a’ajkilal nokonume’ wi’ sa’ li yu’am a’in. A’ut naqanaw naq li Dios tooxtenq’a chiqajunqal chi numtaak sa’ xb’eeneb’ li ch’a’ajkilal a’in wi naqasik’ lix tenq’ chi anchal li qach’ool. Chirix xk’ulb’al rahilal ut xjalb’al qak’a’uxl xb’aan xq’etb’aleb’ li chaq’rab’ li k’utb’ileb’ chiqu, chiqajunilo taqak’ul jun awa’b’ejihom re loq’alil. A’an li Qaawa’ li taab’aanunq re li raqb’a-aatin sa’ roso’jik, ut ka’ajwi’ a’an tz’aqal xnawom, xna’leb’, ut rusilal re raqok aatin sa’ qab’een chiqajunqal.

Ut anajwan aajel ru choq’ qe naq taqayal qaq’e chixpaab’ankil xkab’ichaleb’ li xninqal ru taqlahom. Re xb’aanunkil, tento toob’eeq chiru jun laatz’il b’e wan wi’ li chaq’rab’ chi junpak’al ut li rahok chi junpak’al chik—tento taqapaab’eb’ li taqlahom ut toob’eeq chiru xb’ehil li sumwank, ut tento ajwi’ taqaraheb’ li qas qiitz’in naq yooko chi b’eek chiru. Re b’eek chi jo’kan, tento taqasik’ lix musiq’ahom li Dios chirix k’a’ru taqaxaqab’ xwankil ut k’a’ru taqatz’eqtaana, ut chan ru toorahoq ut too’ab’inq rik’in oxloq’ink sa’ xb’aanunkil. Tento sa’ qab’een sa’ li qab’eenik a’in naq ink’a’ toomajelo’q sa’ xpaab’ankileb’ li taqlahom, a’ut naq taqak’ut ajwi’ tz’aqal li rahok ut li uxtaan. Tento ajwi’ sa’ qab’een naq aj uxtaanaqo rik’ineb’ li kok’al li neke’xye naq wankeb’ ratawom choq’ re rech winqilal ut rech ixqilal, a’ut naq ink’a’ taqaye sa’ junpaat naq ak reheb’ chi jo’kan, xb’aan naq lix k’ihaleb’ li kok’al najalman li eek’ahom a’in rik’ineb’ rik’in xnumik li hoonal.²¹ Sa’ li qab’eenik, naqatz’eqtaana li k’a’ru naxjalb’ehiheb’ li wankeb’ sa’ xb’ehil li sumwank, ut ink’a’ naqaxaqab’eb’ xwankil li ani naxjalb’ehiheb’ li kristiaan rik’in li Qaawa’. Sa’ chixjunil a’in, najultiko’ qe naq li Dios naxyeechi’i li yo’onink, ut sa’ roso’jik, li sahil ch’oolejil ut li osob’tesink choq’ reheb’ chixjunil li neke’paab’ank reheb’ lix taqlahom.

Eb’ li na’b’ej ut yuwa’b’ej, ut chiqajunilo, tento sa’ qab’een xk’utb’al xkab’ichaleb’ li xninqal ru taqlahom. Choq’ reheb’ li ixq re li Iglees, li Awa’b’ej Spencer W. Kimball ki’aatinak chirix li teneb’aak a’an sa’ li xnimal ru profeetil aatin a’in: “Naab’al re lix k’ijik li Iglees sa’ roso’jikeb’ li kutan taak’ulmanq xb’aan naq eb’ li chaab’il ixq re li ruchich’och’… te’jilosiiq naab’aleb’ rik’in li Iglees. A’in taak’ulmanq a’ yaal jo’ chanru naq eb’ li ixq re li Iglees yookeb’ chixk’utb’al li tiikil ch’oolej ut li chaab’il na’leb’ank sa’ xyu’ameb’, toj reetal naq taa’ilmanq naq jalaneb’ li ixq re li Iglees ... rik’in li ixq re li ruchich’och’ ”. ... Chi jo’kan, a’aqeb’ li chaab’il ixq sa’ li Iglees li k’a’jo’ naq te’tz’aqonq sa’ lix k’iijik li Iglees, sa’ rajlankileb’ jo’ ajwi’ sa’ xmusiq’ejil kawilaleb’, sa’ roso’jikeb’ li kutan.”²²

Sa’ aatinak chirix li profeetil aatin a’an, li Awa’b’ej Russell M. Nelson kixch’olob’ naq “li kutan kiril li Awa’b’ej Kimball a’an li kutan a’in. Laa’ex li ixq li kiril a’an.”²³ Laa’o li xoo’ab’ink re li profeetil aatin ka’k’aal chihab’ chaq ink’a’ kiqak’oxla naq sa’ xyanqeb’ li te’kole’q xb’aaneb’ li ixq a’in re li Iglees wankeb’ li ramiiweb’ ut li rech alaleb’ li wankeb’ rub’el xwankil li ruchich’och’il na’leb’ ut lix b’alaq’ laj tza. Lin tij ut li wosob’tesihom a’an naq texk’utuq ut texk’anjelaq re xtz’aqob’resinkil ru li profeetil aatin a’an, sa’ lix k’ab’a’ li Jesukristo, amen.