Minaab’alaq’i
Naq naqapaab’ lix taqlahom li Dios, junelik taak’ame’q qab’e sa’ li us ut ink’a’ toob’alaq’iiq.
Anajwan, tinye li na’leb’ choq’ eere chejunilex, a’b’an mas wi’chik choq’ eere li toj yookex chi ninqank—li wankex sa’ li Tzoleb’aal reheb’ li Kok’al, li saaj winq, ut li saaj ixq. Jwal raarookex xb’aan lix profeet li Qaawa’ anajwan, li Awa’b’ej Russell M. Nelson—toj reetal naq a’an xexraatina sa’ jun li puktesinb’il ch’utam choq’ reheb’ li saaj sa’ junio 2018, ut xk’ab’a’iik li ch’utam a’an “Xyo’onihom laj Israel”1 Kok’ aj sa’ li Awa’b’ej Nelson naxye eere li k’ab’a’ej a’an, “xyo’onihom laj Israel,” li tenamit li toj texninqanq jo’ lix Iglees li Jesukristo li k’ojob’anb’il wi’chik.
Ex saaj wamiiw, twaj tintikib’ li waatin rik’in xwotzb’al wiib’ li seraq’ chirix lin junkab’al.
Li 102a Dalmata
K’iila chihab’ chaq, xinq’aj sa’ wochoch chirix naq xintrab’ajik, ut xsach inch’ool naq xwil li saqi b’on yalaq b’ar—sa’ li tz’ak, sa’ li okeb’aal, ut chiru li qochoch. Naq xintz’il rix, xwil naq toj t’aqt’aq li b’on. Wan xnums li b’on li nawulak toj chirix li qochoch, ut xintaaqe. Aran xintaw li walal, li oob’ chihab’ wan re, wan lix b’onleb’ ut yoo chi aanilak chirix li qatz’i’. Li tz’i’ li q’eq’ rismal ak b’onb’il jun xyijach xtib’el chi saq!
“K’a’ru yookat?” Chankin re.
Xaqamil li walal, xinril laa’in, xril li tz’i’, ut xril li b’onleb’ li jwal t’aqt’aq sa’ li b’on, ut xye, “Yal nawaj naq li qatz’i’ chanchanaqeb’ li tz’i’ li tzipixeb’ rix sa’ li pelicula—101 Dalmatas.”
Laa’in xinra li qatz’i’. Tz’aqal re ru choq’ we, a’b’an jalan li xk’oxla chaq li qalal.
Li mis raqax li rix
Li xkab’ seraq’ naxye resil li qikan laj Grover. Wan rochoch toj sa’ jun li k’aleb’aal, najt chaq chirix li tenamit. Ak yoo chaq chi tixk laj Grover. Xqaj naq eb’ li qalal te’xnaw ru naq maji’ nakam. Jo’kan naq najt xoob’eek sa’ ch’iich’ toj sa’ lix ch’ina ochoch. Xoochunla sa’ komonil re naq laj Grover tixnaweb’ ru li qalal. Sa’ junpaat, wiib’eb’ li qalal, maare oob ut waqib’ chihab’ wankeb’ re, ak xe’raj b’atz’unk chirix kab’l.
Naq laj Grover xrab’i naq te’raj elk sa’ li ochoch, xxulq’i chirilb’aleb’. Li ch’ina al ink’a’ mas neke’xnaw li ru, ut jwal tiix li rilob’aal, jo’kan naq neke’xuwak b’ayaq. Xye reheb’, chi tiik xyaab’ xkux, “Cheril wan eerib’—wankeb’ aj paar aran.” Naq li wixaqil ut laa’in xqab’i a’an, ink’a’ yal b’ayaq nokoxuwak; maare tz’aqal te’xk’ul jun aj paar! Eb’ li qalal xkoheb’ chirix kab’l, ut laa’o xookana sa’ ula’.
Moqon, naq xoo’ok sa’ qach’iich’, xinye reheb’ li al, “Ma xeril junaq aj paar?” Chan jun li qalal, “Ink’a’, maajun aj paar xqil. A’b’anan xqil jun li ch’ina mis li raqax li rix!”
Laj b’alaq li jwal nim
Eb’ li seraq’ a’in chirixeb’ li kok’al nokohe’xk’e chi se’ek, a’b’an neke’xk’ut ajwi’ jun li na’leb’ jwal nim wi’chik.
Sa’ li xb’eenil seraq’, li qalal wan lix tz’i’ jwal chaab’il; a’b’anan, xchap naab’al li b’on ut rik’in jun lix b’onleb’ xyal xyiib’ankil ru li k’a’ru yal xyoob’ chaq sa’ xk’a’uxl.
Sa’ li xkab’il seraq’, li ch’ina al ink’a’ neke’xk’e reetal naq wan li k’a’ru xuwajel naq xe’ril jun aj paar. Chi maak’a’ xnawomeb’ chixtz’ilb’al rix k’a’ru li xe’xk’ul, xe’ok raj sa’ li k’a’ru ink’a’ raj us. Eb’ li seraq’ a’in neke’xk’ut naq naru taqak’oxla xyaalalil li k’a’aq re ru chi jalb’il. Moko nim ta li ch’a’ajkilal xe’k’ulman xb’aan.
A’b’anan, wankeb’ naab’al anajwan li neke’ok sa’ li ch’a’ajkilal jwal nim xb’aan. Wan naq ink’a’ neke’ril li k’a’aq re ru jo’ wankeb’ chi tz’aqal yaal, malaj ink’a’ nawulak chiruheb’ li yaal. Wankeb’ ajwi’ li k’anjel li yiib’anb’ileb’ ru re naq toohe’xjalb’ehi rik’in li yaal. Li b’alaq’ a’in naxq’ax chi us li ch’ina majelal sa’ li tz’ilok-ix, ut k’iila sut jwal nim li naxb’aanu—moko ka’ch’in ta.
Laj Satanas, lix yuwa’il li tik’ti’ ut laj b’alaq’ li jwal nim, taaraj naq taawiib’anq qach’ool chirix xyaalalil li k’a’aq re ru, malaj naq taqajal ru re naq taawulaq chiqu. “Naxb’aanu li pleetik rik’ineb’ laj santil paab’anel re li Dios”2 ut ak xnumsi k’illa mil chihab’ sa’ xkawresinkil rib’ chixk’eeb’aleb’ li ralal xk’ajol li Dios chixpaab’ankil naq us li ink’a’ us ut naq ink’a’ us li us.
Ak na’no ru laj Satanas jo’ li nokoxk’e chixpaab’ankil naq yal mis aj paar, malaj naq naru taajalmanq ru jun li q’eqi tz’i’ rik’in jun li dalmata, yal rik’in xk’eeb’al li b’on chiru!
Qilaq anajwan jun reetalil li na’leb’ a’in sa’ li loq’laj hu, naq lix profeet li Qaawa’ xril li na’leb’ ajwi’ a’in. “Laj Moises kixoke’ toj sa’ jun tzuul q’axal najt xteram, … kiril li Dios chi k’utk’u chiru rilob’aal, ut ki’aatinak rik’in.”3 Li Dios kixk’ut chiru laj Moises ani tz’aqal laj Moises. Us ta laj Moises wan jo’ winq li wan xmajelal, li Dios kixk’ut naq laj Moises kiwan “choq’ xjalam-uuch li Junaj Yo’lajenaq chiwu; ut li Junaj Yo’lajenaq chiwu … taawanq choq’ Kolonel.”4
Sa’ li nimla k’utb’esink a’in, laj Moises kiril li Dios, ut kixtaw ajwi’ ru jun na’leb’ chirix laj Moises: a’an jun li ralal li Dios.
Ab’ihomaq chi us k’a’ru kik’ulman sa’ xraqik li k’utb’esink a’in. Ut kik’ulman naq … kichal laj Satanas chiraalenkil, ut kixye: At Moises, ralalat li winq, loq’onihin!”5 Chi kaw xch’ool, laj Moises kixye: “Anihat laa’at? Xbʼaan naq kʼe reetal, laaʼin jun ralal li Dios, joʼ xjalam-uuch li Junaj Yoʼlajenaq chiru; ut bʼar wan laa loqʼal, re tatinloqʼoni laaʼat?”6
Sa’ jalan chik aatin, laj Moises kixye: “Ink’a’ naru tinaab’alaq’i, xb’aan naq ninnaw anihin. Kinyo’ob’tesiik jo’ chanru xjalam-uuch li Dios. Maak’a’ aawik’in lix saqenkil ut lix loq’alil. Jo’kan naq k’a’ut raj naq tatinloq’oni malaj tinaab’alaq’i?”
K’e chik reetal k’a’ru chik xye laj Moises. Xye, “Elen arin, Satanas; minaab’alaq’i.”7
Wan naab’al li na’leb’ taqatzol sa’ li aatin kixye laj Moises naq yoo chi aaleek xb’aan laj xik’ ilonel. Nekexinb’oq chi sumenk ajwi’ chi jo’kan naq nekereek’a xwankil li aaleek. K’e xtaqlankil laj xik’ ilonel rik’in xyeeb’al, “Ayu! Laa’at maak’a’ laa loq’al. Minaawaale ut minaab’alaq’i! Xb’aan naq ninnaw naq laa’in jun ralal li Dios. Ut junelik tinb’oq chaq lin Dios re tinxtenq’a.”
Laj Satanas b’an ink’a’ naxkanab’ lix k’anjel re qab’alaq’inkil ut qahob’b’al. Ink’a’ xkanab’ rik’in laj Moises, ut xraj naq laj Moises taasachq sa’ xch’ool ani laj Moises sa’ li junelik q’e kutan.
Jo’ chanru jun li josq’ aj kok’al, “laj Satanas kixjap re chi kaw xyaabʼ xkux, ut kixchoqʼi lix josqʼil saʼ xbʼeen li chʼochʼ, ut kitaqlan, ut kixye: Laaʼin li Junaj Yoʼlajenaq, loqʼonihin laaʼin.”8
Qab’ihaq wi’chik. Ma xawab’i k’a’ru kixye laj Satanas? “Laa’in li Junaq Yo’lajenaq. Loq’onihin laa’in!”
Li nimla aj b’alaq’ kixye: “Matk’oxlak, ink’a’ tatinrahob’tesi—moko aj paarin ta; yal ch’ina misin, raqax li wix.”
Toja’ naq laj Moises xb’oq chaq li Dios ut xk’ul xchoxahil metz’ew. Us ta laj Satanas kisiksotk ut xchiq’an li ch’och’, laj Moises ink’a’ kixpaab’. Kaw ut saqen ru lix yaab’ xkux. “Elen wik’in, Satanas,” chan, “xb’aan naq ka’ajwi’ li jun chi Dios a’in tinloq’oni, a’an li Dios re loq’alil.”9
Sa’ xraqik, “laj Satanas … ki’el chaq aran … chiru li rilob’aal laj Moises.”10
Chirix naq li Qaawa’ xchal ut xrosob’tesi laj Moises, li Qaawa’ xye:
“Osob’tesinb’ilat laa’at, Moises, … q’axal wi’chik taak’ehe’q aametz’ew chiruheb’ li k’iila ha’. …
“Ut il, laaʼin wankin aawikʼin, toj saʼ rosoʼjik ajwiʼ laa kutan.”11
Maak’a’ naxye b’ar wanko sa’ qayu’am, wan jun chaab’il eetalil choq’ qe naq laj Moises ink’a’ naxpaab’ laj Satanas. Nim xwankil li esilal a’in choq’ aawe aajunes—taanaw k’a’ru taab’aanu naq laj Satanas taaraj aab’alaq’inkil. Xb’aan naq laa’at, jo’ laj Moises, wan laa maatan re xk’ulb’al xtenq’ li choxa.
Li taqlahom ut li osob’tesink
Chan ru taak’ul li choxahil tenq’, jo’ xk’ul laj Moises, re naq ink’a’ tatb’alaq’iiq malaj tat-ok sa’ li aaleek? Jun li b’e choq’ re li choxahil tenq’ xch’olob’aman wi’chik sa’ qakutankil laa’o naq li Qaawa’ xye: “Jo’kan ut, laa’in li Qaawa’, xb’aan naq kinnaw li nimla rahilal li taachalq sa’ xb’eeneb’ li wankeb’ sa’ li ruchich’och’, kinb’oq chaq inmoos aj Jose Smith, alalb’ej, ut kiwaatina chalen chaq sa’ choxa, ut kink’e taqlahom re.”12 Chi k’osb’il ru li aatin, maare taqaye naq li Qaawa’, li naxnaw “li roso’jik chalen chaq sa’ lix tiklajik,”13 naxnaw xch’a’ajkilal li qakutankil laa’o. Jo’kan naq kixkawresi li b’e re naq ink’a’ taqapaab’ li aaleek, li k’iila sut nachal xb’aan tz’aqal xb’alaq’ laj tza ut li pleetik naxb’aanu.
Saqen ru li b’e. Rik’ineb’ lix moos, li Dios nokoraatina laa’o, li ralal xk’ajol, ut naxk’e li qataqlankil. Taaruuq taqajal b’ayaq li aatin li toja’ xinye, ut tixye “Laa’in, li Qaawa’, … kinb’oq chaq inmoos [li Awa’b’ej Russell M. Nelson], ut kiwaatina chalen chaq sa’ choxa, ut kink’e taqlahom re.” Ma ink’a’ chaq’al ru li na’leb’ a’an?
Ninch’olob’ chi tiik ink’a’uxl naq li Qaawa’ xraatina laj Jose Smith chi tz’aqal yaal, chalen chaq li Xb’een K’utb’esink. Naraatina ajwi’ li Awa’b’ej Nelson sa’ qakutankil anajwan. Ninch’olob’ xyaalal naq li Dios kiraatinaheb’ li profeet najter ut kixk’e reheb’ li taqlahom choq’ re xk’amb’aleb’ xb’e li ralal xk’ajol sa’ li sahil ch’oolejil arin ut sa’ li loq’alil toj chal re.
Li Dios toj naxk’e li taqlahom re li qayo’yookil profeet anajwan. Neke’tam reetalil a’in—jun k’anjel re xk’utb’al li evangelio sa’ ochochnal chi tenq’anb’il xb’aan li Iglees; xjalb’al ru li k’anjel re ula’anink rik’in li k’anjel re rilb’aleb’ li komon; xyiib’ankil ru li k’anjel sa’ santil ochoch; ut li ak’ k’anjel choq’ reheb’ li kok’al ut li saaj. Nasach inch’ool chirix lix chaab’ilal ut lix rahom jun li Choxahil Yuwa’b’ej ut li Ralal, li Jesukristo, li kixk’ojob’ wi’chik lix Iglees sa’ li ruchich’och’ ut xb’oq jun li profeet sa’ qakutankil. Lix k’ojlajik wi’chik lix evangelio li Jesukristo naxk’ul li xuwajel kutan rik’in lix tz’aqalil ru li kutan.
Li maa’usilal maajun wa kiwan choq’ sahil ch’oolejil
Li ab’ink chiru li taqlahom k’eeb’il re li qaprofeet nokoxtenq’a chixramb’al ru lix b’alaq’ laj tza, jo’ ajwi’ chixk’ulb’al lix sahil li qach’ool li junelik nakana. Ink’a’ ch’a’aj xtawb’al ru li b’e a’in: li tiikilal, malaj li ab’ink chiru li taqlahom, naxk’e li osob’tesink, ut li osob’tesink naxk’e lix sahil li qach’ool sa’ qayu’am.
A’b’anan, jo’ chanru naq laj Satanas kixyal xb’alaq’inkil laj Moises, naraj ajwi’ aab’alaq’inkil laa’at. Chalen chalen naxb’aanu rib’ jo’ li k’a’ru moko re ta. Junelik naxmuq ani tz’aqal a’an. Naxye naq li ab’ink chiru li taqlahom tixk’e xrahil laa yu’am ut naq tixmaq’ lix sahil aach’ool.
Ma nakanaw junaq li na’leb’ li naroksi choq’ re li b’alaq’ink? Jun reheb’ li na’leb’ a’an, a’an xmuqb’al li rahilal sa’ li droga ut li kalaak ut xyeeb’al naq jwal sa xb’aanunkil. Nokoxsub’ sa’ li k’iila na’leb’ ink’a’ us sa’ li redes sociales, jo’ xkaqalinkeb’ jalan, ut xyoob’ankil ru li b’alaq’il chaab’ilal sa’ qayu’am. Ut jo’kan ajwi’, naxk’ut chiqu xkomon chik li na’leb’ sa’ internet li yiib’anb’il ru re tooxrahob’tesi, jo’ li pornografia, lix hob’b’aleb’ jalan, malaj xyeeb’al li tik’ti’ re naq taawiib’anq li qach’ool ut tooxuwaq. Chi seeb’ xna’leb’ naxye sa’ hasb’, “Chinaataaqe, ut tento naq sahaq aach’ool.”
Li aatin tz’iib’anb’il k’iila cient chihab’ chaq xb’aan jun li profeet sa’ lix Hu laj Mormon toj wan xwankil: “Li maa’usilal maajun wa kiwan choq’ sahil ch’oolejil.”14 Chiqak’e reetal li b’alaq’ink xb’aan laj Satanas. Kawaqo raj ut chiqatz’il rix lix tik’ti’ ut lix k’anjel li ani naraj xsachb’al li qaam ut xmaq’b’al chiqu lix sahil li qach’ool sa’ li yu’am a’in ut li qaloq’alil toj chal re.
Ex was wiitz’in, toj tento toopaab’anq ut taqil qib’ chi us, xb’aan naq ka’ajwi’ chi jo’kan naru xtz’ilb’al rix li yaal ut rab’inkil xyaab’ xkux li Qaawa’ rik’ineb’ lix moos. “Xb’aan naq li Musiq’ej naxye li yaal ut ink’a’ natik’ti’ik. … Li naʼlebʼ aʼin kʼutbʼesinbʼil chiqu chi saqen ru, re xkolbʼal li qaam. Xbʼaan naq li Dios kixye ajwiʼ rehebʼ li profeet najter.”15 Laa’o lix santil paab’anel li Nimajwal Dios, lix yo’onihom laj Israel! Ma tooluktaaq? “Ma taalajq li qa’aab’aal? Ink’a’! … Xaqxo toowanq, tiik toopaab’anq, jo’ xmoos li Dios junelik toowanq.”16
Ninye innawom jo’ aj nawom re xyaalal lix Santil Dios laj Israel—a’an ajwi’ li Jesukristo. Ninch’olob’ xyaalal li rahok, li yaal, ut li sahil ch’oolejil li naqataw rik’in xb’aan lix mayej li maak’a’ roso’jik. Naq naqapaab’ lix taqlahom, junelik taak’ame’q qab’e sa’ li us ut ink’a’ toob’alaq’iiq. Sa’ li santil xkab’a’ laj Kolol qe li Jesukristo, amen.