Ana Tangira te Burabeti

Tabeua ririki n nako, e nakon te maungatabu n te aono i Hamburg, Germany Beretitenti Thomas S. Monson, ao bon karineakiu ni mwananga ma ngaia.

E titiraki Beretitenti Monson ni kakaea taekan te Tari Michael Panitsch, te beretitenti ngkoa n te titeiki ngaia temanna te bwaeoniia ae mwakuri korakora ibukin te Ekaretia i Germany. I tuangnga bwa te Tari Panitsch e rangi n aoraki, n te aro ae aki kona n ti wenewene man aki kona n roko ni kaea ara bootaki.

E titiraki Beretitenti Monson ngkana ti na kona ni karoko irouna.

I ataia bwa imwain te mwananga nako Hamburg, e a tia ni koreaki waen Beretitenti Monson ao e na aki kona n nakonako n akea te maraki. I kamataata bwa te Tari Panitsch e maeka n te kanimatao n ruu ao akea iai te kaintamwarake ae buti man te iti. Ti na riai n tamwarakei taian kaintamwarake ngkana ti na nakoina.

Ma e kairoro Beretitenti Monson. Ao ngaia are ti a mwananga.

I uringa aron te kangaanga ibukin Beretitenti Monson n tamwarakei taian kaintamwarake akekei. E kona n ti tamwarakei ti tabeua inanon teuana te tai imwain ae na manga riai n tei ni motirawa. E aki roko n te ngurengure naba teutana, ao e bon aki kan oki naba. Ibukina ngkai te auti aei e rietaata taubukina, kaintamwarake a tara n ae a nako n akea tokiia, ma Beretitenti Monson e kukurei n teimatoa ni waakirake ni karokoa ae ti a roko n ana ruu te Tari Panitsch n te kanimatao n ruu.

N rokora ikekei, ti a kukurei ni marooro. E kaitaua Beretitenti Monson ibukin maiuna n nanomatoa ni ibuobuoki ao e kaunga nanona ma te moangare. Imwain ae ti kitanna, e anganna te kakabwaia n te nakoanibonga ae moan te tamaroa.

E na kona n rineia Beretitenti Monson ni motirawa imarenan ara bootaki aika abwaabwaki taia. E na kona ni kan noori tabeua taabo aika tikiraoi noorakia iaon Hamburg. I aki toki ni iangoi aron tamaroaia ma ibuakon taabo ni kaneweaba n te kaawa ae bubura arei, temanna are e tangiria ni kan nooria riki bon kaain te Ekaretia ae mamaara man korakora aorakina.

E roko nako Hamburg Beretitenti Monson n anga te reirei ao ni kakabwaiaia aomata n te aba aei. Ma n te tai naba aei, e kamwataua raoi taraan temanna.

Ngke e taetae ibukin Iesu te Abotoro ae Betero, e anga te kamataata ae bebete n aron aei: “[Ngaia] e nakonako ni kakaraoa ae raoiroi” (Makuri 10:38). E kona naba aei n taekinaki ibukin temanna ae ti boutokaia bwa ana burabeti te Atua.