Aomata Aika Teimatoa N na Nakon te Tembora
Rongorongon ngkoa te utu, mwakuri n iraorao, ao te bwabetito ibukiia maate e kaungaiia kaain te Ekaretia aika a ikawai bwa a na karekei aia entaunmente n te tembora.
Iai miin Gary ao Jennifer Tucker. A uaia n tangira te utu ae akea tokina. Ma e a kaman bua ana kantaninga Jennifer. Te kawai ni kakoroa nanon te mii anne e na rinanon te tembora, te bwai ae tuai n tauraoi iai Gary.
Ao e karekea te kairi ma ieta n ana iango te bitiobi are e na kona ni buokiia tenaan Tuckers—n raonaki ma tabeman riki n te Three Forks Uoote, Bozeman Montana Titeiki—karekea te kantaninga ibukin te utu ae akea tokina. Tabeua te ririki n nako ao Bishop Aaron Baczuk e mena inanon aia bowi bitiobi ao aika tibwa rairaki n te titeiki. Te Itingaun n te Aono are ngaia ae tararua e titirakina te membwa ae boou, “Ko a tia n nakon te tembora ni karaoi bwabetito ibukiia maate?” E a tia.
E a tia n aki iangoia raoi Bitiobi Baczuk kairakiia aika ikawai aika tuai ni kabaeaki n te tembora. N te wiiki are imwiina e karaoa ana bontaeka ma te Billings Montana Tembora ibukiia aika ikawai n ana uoote bwa ana karaoa te bwabetito ibukiia maate. E nakoraoi te mwananga nakon te tembora, ao n te namwakaina are imwiina, unimwaane ao ibonga aika rietaata n te uoote a raoniia riki ikawai aika tuai ni kabaeaki nakon te tembora. “E kakoauaki bwa te atatai ae moan te tamaroa ibukiia, bootakin nanoia ao aia kantaninga ni kan karekea aia entaunmente,” e taku Bitiobi Baczuk.
Katauraoi
Ana katauraoia, kaain te ekaretia aika a ikawai bwa ana mwakuri ma te bitiobi bwa aonga ni kororaoi n rin n te tembora. Ao imwiina a karaoa te kiraati ibukin te katauraoi nakon te tembora. E rikirake nanoia n te kiraati imwiin are a karaoi bwabetito ibukiia maate. A kunea bwa tataekinan te tembora n te kiraati bon te bwai teuana, ma namakinan Tamnein te Uea inanon te tembora bon te bwai teuana.
“Karekean te kantaninga ni kaira temanna nakon te tembora are e tuai tauraoi ibukin berita riki tabeua ma e kona n teimatoa ni karekea namakinan karaoan otenanti bon te bwai ae kakawaki,” e taku Bitiobi Baczuk. “I taku bwa e nakoraoi ma te kantaninga are e kataia n taekinna n ana boki ibukin te katauraoi nakon te tembora: ‘Nakomai nakon te tembora!’”1
E taekinna te beretitenti n te koorum n unimwaane David Boyd n te Three Forks Uoote bwa te nakon te tembora ni karaoi bwabetito e kakoroa nanon te kouru: “A moanna ni kakoaua bwa a kona ni karekei oin aia entaunmente. Angiia a bon tuai n toua tanon te tembora ma imwaina, ngaia ae te mwananga n bwabetito irouia kairake e karekea aia tai kaain te ekaretia.”
A mwaiti n taai aika aki maan n nako ni kaungaia kaain te ekaretia n te uoote ni karaoi bwabetito ibukiia maate imwain karekean oin aia entaunmente. “Tiaki te titiraki raoi ibukin te kororaoi,” e taku Bitiobi Baczuk. “Bon te titiraki ibukin te katauraoi. Tabeman a kororaoi man tauraoi ni karaoi bwabetito ma aki tauraoi n aia iango ke n tamneia ni kawakin berita n te entaunmente.” Ibukiia mwaane, bon te tai ni katauraoi ni karekea te Nakoanibonga ae te Merekitereka.
Rongorongon ngkoa te utu e waakin mwakuri n te tembora. Kaain te uoote, n aron Larry ao Carolyn Isom, ae a mwakuri n te tienta ibukin rongorongoia utu ngkoa n te uoote ni katauraoi tebubua araia utu. Mwakuri aika tenua aikai—te kiraati ibukin te katauraoi nakon te tembora, rongorongoia ngkoa utu, ao te nebonebo n te tembora—a uaia ni mwakuri. Naake a karaoi mwakuri ibukin rongorongoia utu ngkoa a rangin n ingainga nanoia ni katauraoi aara ibukiia naake a nakon te tembora. Kaain te Ekaretia ake a nakon te tembora a ingainga nanoia ni kan karaoa te mwakuri n te tembora ibukiia aia bakatibu ao ibukiia kaain aia uoote. Ao katukan am iango n te tembora e kaungaia kaain te ekaretia n oki nakon te tembora.
Tabeua te ririki n nako, 22 kaain te Three Forks Uoote ae a tia ni karaoa te kiraati n te katauraoi nakon te tembora, ao 14 ma ibuakoia ae a tibwa roroko n te tembora ni karaoi bwabetito ibukiia maate. Ao, ni banen aia reirei, 13 maibuakoia ake 14 a karekea oin aia entaunmente. Tabeman ma ibuakoia a tuai n iein ke a tia ni mate buuia, ma tabeman, n aron Gary ao Jennifer Tucker, a kabaeaki bwa te utu.
Mwakuri n iraorao
E kaaina te Ekaretia Gary n 1992, tabeua te namwakaina imwain ae a mare ngaia ma Jennifer. E a bon kaman kaaina te ekaretia. Ma te mwakuri inanon taai aika mwaiti man reitaki ma te rao ae kairua e karekea te kangaanga iroun Gary bwa e na teimatoa n te Ekaretia, e ngae ngke iai ana ibuobuoki buuna. E taekinna bwa e kabanei ririki aika mwaiti ni kangkangta te bake man kabonganai taeka aika aki riai.’”
Ngke e bungiaki natia te aine, Cody, e kataia Titita Tucker ni karikirakea n te euangkerio man kairia nakon te taromauri, e ngae ngke te Tari Tucker e aki tangiri bokin te Ekaretia ni mweengana. E ngae ngke e kaungaia ana utu bwa a nakon te ekaretia, e aki nako iai. Ngke e a koro wanua ana ririki Cody, e bwabetitoaki irouia mitinare, tiaki iroun tamana. E taku te Tari Tucker, “I rangin ni kukurei bwa I a roko ikekei, ma anne bon te kabwarabure ae korakora—taraakina irarikin are irakina.”
N ririki ake imwiina, mwakuri n iraorao e buoka Gary n iri ana waaki ni kakukurei te Ekaretia. E na kaoia kaain te uoote Jennifer ke mitinare n amwarake ma ngaia, e ataia bwa e na karekea aia tai n taetae ma Gary. E rangin ni kakatonga nakoia kaain te ekaretia ao mitinare ngkai a tia n riki bwa taan kaungaa.
Dale Price, te katooto, e reireina tinan Jennifer ao e kina Gary ao Jennifer n te kawai anne. Ngke e kawaraki te Tari Price ma te Tari Tucker, aki maroroakina taekan te euangkerio n te moan tai. A taekina taekan te bwai ae mamate nanoia iai: te kati man. Ana utu Prices a uaia n tekateka ma ana utu te Tuckers n ana bootaki te uoote ni kakukurei, e uoti amwarake nakoia man te titoa n amwarake ngke te Tari Tucker e otinako man te mwakuri, man anganiia ana karewe te manibeeru are e karaoaki man oin aia manibeeru. Ana karewe te manibeeru bon kabiran kanaia kaain ana utu te Tuckers. Te bwai n tangira ane euarereke anne, n aron are e kabwarabwara te Tari Price, bwa e “na kanakoraoa te reitaki.”
Karaoan Bwaai Aika Uarereke ao Bwaai Aika Aki Kangaanga
Te reirei mairoun aia beretitenti n te titeiki e buokiia naba ana utu te Tuckers. E titirakiniia kaain te titeiki Beretitenti David Heap bwa ana karaoi “itiua bwaai aika uarereke man aki kangaanga”: (1) Wareki booki aika tabu iroum ni katoa bong; (2) wareki booki aika tabu ma kaain am utu nimaua te bong n te wiiki; (3) karaoa am tataro n te ingabong ao n te tairiki; (4) karaoa am bootaki n tataro ma am utu ni katoa ingabong ao n te tairiki; (5) nakon te taromauri in katoa Taabati ma am utu; (6) karaoa te bootaki n utu n te tairiki ni katoa tairikin te Moanibong; ao (7) nakon te tembora ni katoa namwakaina.
E noria Gary bwa a kona bwaai aikai ni buokia ni kaniia riki kaain ana utu—te bwai ae mamate nanona iai—ngaia ae a moanna ana utu Tuckers ni karaoa aia tataro n utu, kamwatebwai man booki aika tabu, ao bootaki n utu n te tairiki. A tia mwakuri aikai ni buoka Gary n ongo nakon ana kakao ana bitiobi bwa e na katauraoia bwa e na nakon te tembora.
N Tianuare 2006 ao a kaea te marooro n te tairiki ana utu Tuckers ni mweengan te bitiobi. E katikaki Gary iroun Bitiobi Baczuk nako rarikina man maroroakinna ma ngaia taekan te tembora. Ikekei naba, ao Gary e angan te bitiobi ana tiin n kangkangta te baake n te aro bwa e na riki bwa te bwai ni kabwakabwaka nakoina. E rang ni mwaiti ana titiraki ibukin te bitiobi ao n marooro ake imwiina. E kamatata te bitiobi maiuakinan berita ake e a tia ni karaoi Gary n tain te bwabetito bwa e aonga ni kororaoi ibukin te Tamnei.
A moana irakin te kiraati ana utu te Tuckers iaon te katauraoi nakon te tembora, ao e a moana nanakona Jennifer nakon te tembora ma ana uoote ni katoa namwakaina ni karaoa te bwabetito ibukiia maate. E mwakuri iaon kororaoina Gary n nako. Natiia te aine, Cody, ae 11 ngkanne ana ririki, e rangin n ingainga nanona ni kan nakon te tembora n te tai ae aki maan ni karaoi mwakuri ni bwabetito. N te tai are e a koro iai 12 ana ririki, ao e a kona Gary n nakon te tembora ma ngaia. Bon te moan tai irouia n nakon te tembora.
E taku Cody, “E rangin ni kamimi. E rangin n rau ikekei. E nako tamau, ngaia anne are e a karika te bwai ae korakora.” E taku Gary e namakina “te rau ae aki kakoauaaki, ao te moan tai n noora te kimwareirei ae aekan aei.”
N te Taabati are imwiina n tain te kiraati n te katauraoi nakon te tembora, e a bitaki Gary nakon te aomata temanna. “E a tia n nako te oota arei,” e taku Titita Elna Scoffield, are e a tia n reireina te kiraati inanon tabeua te ririki. E tiku imwiin te kiraati Gary n titiraki. E a tia n namakina te Tamnei n te tembora man tangiria ni manga oki—tiaki n ti karaoi mwakuri ni bwabetito ma ni karakea ana entaunmente mani kabaea ana utu nakoina.
Te namwakaina are imwiina ao a manga nakon te tembora ana utu Tuckers ma te bitiobi ma kaain ana uoote riki ake tabeman.
Tokanikai Iaon Taian Kataaki
N te wiiki are imwain ae a karekea aia entaunmente ao man kabaeaki te Tari ao Titita Tucker, a namakina te nano ni kaitara. E waaki nako Gary, ma bon iai naba ana raraoma ibukin kororaoina n rin n te tembora. Miia ibukin te utu ae akea tokina e a rangin ni kaan, ma e kuri ni kanganga te roko iai. E ataia ana utu Tuckers bwa a riai ni uaia n tataro n te tai ae ababaki riki, ni bubuti ibukin te korakora. “Tiaki toki ni karekea te namakin ae rau ao mangakakoauaana ae bwaai ni kabane a bane ni mena inanon bain te Uea,” e taku Titita Tucker. “Riki n te tai are ti a nakonako inanon te tembora, Tamneina n rau e mena irouia kaain ara utu ni kabane.”
Imwiin are a karekea aia entaunmente Gary ma Jennifer, a katorobubua n te ruu ni kabaebae ma natiia, Cody ao Garrett, ma kunnikaia ae mainaina. Ngke e noora tinana n tang Garrett ae onoua ana ririki, e teirake n nako ni kaoa te ran ni mata man tabana. Gary ao Cody a tang ibukin te kimwareirei naba. Ao te tia karaoa te kabaebae naba e rootaki.
A taekinna ana utu Tucker bwa ngkai a karekea te kimwareirei ae raka riki ao te reitaki ae tamaroa riki. E taekinna Gary, “Ti a kukurei riki. Ngai ma kaain abau ti a kaan riki, ao a noora anne aia ataei.” E namakinna Gary bwa ngaia te banna ni katooto ae tamaroa nakoia ana utu ake tiaki kaain te Ekaretia, ao te kantaninga bwa utu riki tabeua n ana uoote ana bon tangira naba te aeka ni kakabwaia are e a tia n anga te Uea nakoia ana utu te Tuckers rinanon te tembora.
Maing: tamnein te Billings Montana Temple iroun Steve Bunderson; tamnein te Billings Montana Temple baptistry iroun Norman Childs; atai: rawetamnei iroun Drake Busath, © Busath Photography
Kukurei n te Billings Montana Tembora n aia bong ni kabaeaki bon Gary, Jennifer, Cody, ao Garrett Tucker.
Kaain te Ekaretia n te Three Forks Uoote aki toki n ni mwananga uoua ma te iterana te aoa ni beku n te Billings Montana Tembora. Tabeman ake a roko bon ikawai aika karaoa te mwakuri ni bwabetito ibukiia maate ngke ngaia ao buuia a katauraoia ni karekei aia entaunmente mani kabaeaki.
Te tamnei ni mwamwannano iroun te Tuckers