Ana Bwabetito Tibu te Unaine

N Tuun 30, 2001, I karaoa te keke ibukin ana koro n ririki natiu te aine ngke e a ti tang naba te tarebon. Bon tariu are e mena i Brazil, bwa e kaongoai motirawan tibura te unaine man te maiu aei.

E kananokawaki te rongorongo, ma I bon aki nanokawaki. N arona, tibu te unaine ae moan te tatangiraki e a tia ni maiu ni kuri n roko ana ririki ae 102. I kukurei bwa e a inaomata man rorona ni kara, ao rabwatana ae mamate e a tia n nako nakon te aonaaba n tamnei.

Ngkanne I a tabe ni iangoa aron boraoin matena n aitara raoi ma ana reke ni bong natiu te aine, ao I bon mimi ngkana iai tabeua bwaai aika kakawaki inanon katiteboan taia. Ngke e a waaki nako te bong, I a kunea bwa tera raoi oina nakoiu: e na bon bebete uringan bwabetitou teuana te ririrki imwin buan tibu te unaine. I a anaa te mwioko aio, n atakina are N na riai n tataninga ni karokoa te tai are e koro ana reke ni bong natiu te aine n are imwina.

E waekoa n nako te ririki. E aki reke au tai n nakon te tembora iaon tain raoi kauringan maten tibu te unaine, ma e ngae n anne, ibukina bwa I mena I Portugal mani ira katauraoakin te Madrid Spain Temple. Ma ni kangangan te bong n nako n te tai anne I aki roko n te iangoa aron mwiokoau ni bwabetitoaki ibukin Tibu Josefina.

E aki reke ni karokoa Okitobwa 2002 are ti a kona n nako iai nakon te tembora. Kainabau ma ngai ti a uaia n nako ma natira te mwaane, Mathew, are e na nako naba ni karekea ana entaumente ni katauraoia ibukin ana mition. I rangi ni kukurei n nako nakon te tembora, ao I a iangoia ae N na riai namakina te bwai teuana ae e kakawaki ngkana I a bwabetitoaki n onea mwiin tibu te unaine.

Kainabau e karaoa te bwabetito, ma I aki namakina te bwai teuana. Natiu te mwaane e karaoa te kamatoa, ma bon akea, naba. Ingaingan nanou iaon aki namakinan te bwai teuana n roko, ma I bon ti kukurei bwa e a tia ni karaoaki te otenanti ibukin tibu te unaine.

Imwiin te entaumente, ti a manga nakon te ru ni kabaebae bwa e na kabaeaki tibu te unaine nakoia ana kaaro. Ngke ti katorobubua ni kaitara te bao ni karea ni karaoa te otenanti ao te tia kabaebae e a moana taetaena. I namakina ae e ruru rabwatau mai atuu ao n ruo rikaki rinanon rabwatau. E rangi ni kanganga aron kabwarabwarana, ma kabuebuen te tai anne, I boni koaua bwa Tibu Josefina e a kukurei ngkai e a kabaeaki nakoia ana kaaro