Tabekakirakeaia Tabemwaang ao Ngai

Bon te tai ni Katituaraoi n 1990. I a tiba tia n rinanon te buraure ae kanganga, ao ai tibwa au moan ririki n reirei taekan te tua n te tabo ae e aki rangi ni kiinaki irou. Natiu a na nako ni kawara ana auti tamaia ibukin te motirawa, ao ibukin ae ai tibwa te moan tai inanon maiu, N na tiku n ti ngai inanon te tai ni Katituaraoi.

N te moan tai I tangiria n namakina rawawatau ao bon te tai ae e riai ni karekea te tang ao n namakina te rawawata ibukiu. Ma ngkanne I a moanna ni iangoi taekan au kakabwaia ni kabane. Iai natiu uoman aika a tikiraoi te auti ae tamaroa ao te tai ni karekea te rabakau ao te euangkerio ibukin Iesu Kristo ni kaira maiu. I bon rangi ni koaua raoi bwa I a tia ni kakabwaiaki ni bwaai ni bane.

Ae e a kan rko tain te Katituaraoi, I a kunea ae te kurubu n ataein te reirei ibukin taekan te tua a tia ni bairea manangaia nakon ana tabo te mition ni moantaai ni buoka kataraoan te katairiki ibukin te Katituaraoi nakoia ake akea mwengaia. I a iangoia ae te ibuobuoki n te mition e rangi n tamaroa riki nakon te tiku n tekateka n te mwenga n namakina te botu ao te katinanikuaki, ngaia are I a iririia raoraou n reirei.

Tabeua te bong imwina I a kunea ae I a bairei buteta aika a kabuebue man tia ni kamantaki iaon aia raurau aomata aika baki ao aika a tia ni karekei taian kanganga inanon maiuia. Te rannimata are e koburake inanon matau n te tai anne tiaki ibukin te nanokawaki are I namakinna; ma bon, tenan rannimata ibukin te tangira nakoia natin te Atua ni kabane, n aki taraki aroia ake mena iai ngkai.

Te Katituaraoi e na bon aki kona n riki bwa te Katituaraoi ngkana akea te take are te kabanea ni bubura inanon te ai ni umum. Ma te 14 n rawawata (6-kg) n take are te kabanea ni bubura e na rangi ni mwaiti ibukiu, ngaia are I kaoiia raou n reirei tabeman ake a roko man aaba ake tabeua ao ake a raroa riki aia tabo bwa a na raonai. I tangiria n tibwaua te katei n Amerika n tain te katairiki n te Katituaraoi, ma I kaoiia bwa a na bon uotii uotaia. I tuangia n tatabemania nako bwa aia amwarake are a na uotia bon mamaten nanoia ni mwengaia. Ara katairiki ni Katituaraoi e riki bwa te kakukurei ao te amwarake ae ururingaki—te bunnimoa ae e niniraki ao a mwaiti riki.

E katanoata te Uea ae Beniamina “Nooria I taekin bwaai aikai bwa e aonga n reke iroumi te wanawana; bwa kam aonga n ataia bwa ngkana kam beku ibukiia raomi ao kam beku naba iroun Atuami” (Motiaea 2:17).

I reiakina te wanawana man te Bong ni Katituaraoi anne. I kunea te kimareirei man karaoan te mwakuri ni ibuobuoki ngkana e bebete nakon te tiku n te mweenga ao n namakina te nanokawaki ibukim. Te mwakuri ni ibuobuoki bon kingin te kukurei tiaki ti inanon taian motirawa, ma e bebete bwa ko na katuua taraan bwaai iaon ake a tia ni bua mani maiura, ma bon inanon naba taai aikai. N aki tabeakinna bwa aekakira arora, ti kona n teimatoa ni kunea temanna bwa e na buokira. Mani tabekirakeaia ao buokaia tarira ma mwaanera, ti bon tabekirakeira naba.