Reken Au Tai Ni Beku

Imwain ukin mataroan te Recife Brazil Temple ibukin te teuana riki te bong ni karaoi otenanti ni kamaiu, e a manga teirake María José de Araújo ae 70-ana ririki ni maiu ni katauraoia ibukin te mwakuri n anganano n te bong teuana.

Te nako n te tembora, e riai María ni mwananga n te maan ae teuana ma te iterana te awa iaon aua bwaati aika kakokoro man mweengana nako Cabo de Santo Agostinho, maiakin Recife, iaon mataniwin aban Brazil i meang mainiku. Ma imwain ae mwananga, ao e na katauraoa kanana ao bwaai riki tabeua ake e na kainnanoi ai tarina ae mataki are e tararuaia ni mweengana.

“María bon te banna ni katooto ae tamaroa ibukin buokaia tabeman,” e taku Cleto P. Oliveira, te tia tau mwiin bwain te tembora. “Man te tai are e moan katabuaki iai te tembora n Ritembwa 2000, ao e a tia n anga nanona bwa e na mwakuri iai ni katoa bong n ukin te tembora. E roko naba n taai ni motirawa.”

Man te aoa 7:00 a.m. nakon 3:00 p.m. ni katoa Kauabonga ni karokoa te Kaonobong, e mwakuri María n ana tabo ni kuuka te tembora, ni kaitiaki bwai n amwarake ao n kukan uaanikai. E na mwakuri nakon mwiin te tai, e taku, ma ibukin ae na toka n te bwati n okira mweengana, ao e riai n oki imwain ae roo.

Te Tari Oliveira e tuanga María bwa e aki kairoroaki bwa e na nakon te tembora ni katoa bong, ma e kakoaua bwa e na tangiriia uoman aomata bwa ana onea mwiina. “E ngare man taku bwa e a tia ni kabanea maiuna ibukin te Uea,” e taku.

Ibukin María, are e a tia ni beku n te tembora ni katoabong bon te tai ae moan te tamaroa.

“E a tia Tamau are i Karawa ni kakabwaiaai ma te marurung ae tamaroa, ao au kouru bwa n na roroko ni katoa bong ngkana e raoiroi marurungiu,” e taku. “I a tia ni karaoa te berita bwa n na kaoti au tarena ao au konabwai ni kabane ni beku ibukin te Uea. Ngke I roko ni mweengau imwiin au mwakuri n te tembora, I aki namakina te kua. E a tia te Uea ni kakabwaiai n te aro anne.”

Imwaina, ngke e mwakuri n te tienta n rongorongon te utu ngkoa n ana uoote inanon onoua te ririki, ao e ukoukoriia ana utu María. Ao ni katoa ingabong inanon Kaonobong aika mwaiti imwain ae nako ni mwakuri n te tabo ni kuuka n te tembora, ao e katiai aeka ni mwakuri n te tembora ibukin aua te roro n ana riki mairouia ana bakatiku ake aine. E katiai naba mwakuri ibukin aua te roro n ana riki mairouia ana bakatibu ake mwaane.

Ngke e moana ana ukeuke n rongorongoia ana utu ngkoa, e namakinna María bwa e kangaanga karaoana─riki ngkai e aki kona n atai araia uoman tibutoruna. Ma a kaokaki araia n te tairiki teuana nakoina n te mii. Ngke a moan reke irouna ao e bon aki kakoauai, ma ngke e ukoukori n ana riki tinana, e kunei araia ao e a kona ni karaoa katomaan ana riki are e a tia n aki kona ni karaoi. E kakoaua bwa e roko te mii bwa te kakabwaia n ana mwakuri korakora ibukin te Uea ma Natina.

“Te tembora bon maiu,” e taku María. “Aomata ake aki nakon te tembora a kabua te tai ae moan te tamaroa man kakabwaia. Man te beku n te tembora, ao ti kona n ata raoi iai nanona ao mwaakan te tembora.”