Kakabwaia man te Ibuobuoki

Marurungiu imwiin te korokoro ae e uarereke e bon aki rangi ni bebete n aron are I kantaningaia. Ma ngkai ngai te Beretitenti n aia Bootaki Aine, I namakinna bwa I bon riai n anga au ibuobuoki nakoia tabeman, ma tiaki are N na titiraki ibukina. Ni ingabongin te bong ae te Moanibong, tenua te bong imwiin au korokoro, N na riai ni kautiia ataei aika itiman man ni katauraoiia nakon te reirei I bon titirakinai ao man iangoia bwa tao N na taua natiu te aine are te kabanea ni ikawai n aki kanakoa man te mweenga bwa e na buokai n tara are te tei.

N rokon taian iango aikai n au kantaninga, akea bwa e a tang beron te mataroa. Au moan kauntira ao raoraou ae I rangi n tatangiria VickieWoodard, e a roko bwa e na ibuobuoki. E taekinna bwa e a roko bwa e na karaoa te burakibaan. Iai inanon baina te boora ni burawa ae e a tia ni kaboboaki ao e titiraki bwa e na reke ia te bwai ni buraki baan. A rangi ni mimi mani kukurei ataei.

Imwiin te kaingabong, e katauraoia mani n taraia bwa a nako n reirei ataei Vickie, ao e a kaitiaki, ao e uota nako are te tei nakon mweengana ni karokoa ana tai ni matu n te bwakantai. Rimwi riki, I a titirakinna bwa antai ngkanne ane e tararuaia natina ake a uarereke, e tuangai bwa buuna e anaa uoua te aoa n aki mwakuri bwa e aonga n roko ni buokai.

Ana mwakuri ni ibuobuoki Vickie ma kaainabana n te bong anne e anganai karekean korakorau ao ni buokai ni kamarurungai.

N te bong teuana ngke I bon mena ni mweengau n ti ngai ma natiu te mwaane ae te kabanea n uarereke, I marannako mai iaon kawain te kai n tamarake ao ni bobukitaua. Ao n tokina e a reke te maraki ni biroto ae e aki totoki inanon tabeua te bong, ngaia are I a nako ni kawara te taokita.

I bon bikoukou n te tai anne, ao taian tutuo a kaota are au beti e a moanna n rootaki. N rikina n te tai aio e tangira te motirawa raoi, ke e na kona ni bwaka te tei.

I rangi n raraoma bwa bukina ngkai iai natira teniman ao ti aki kona ni kabane mwane ibukin te buoka. Taari inanon au mwaanga n te Ekaretia, ngke, a kunea aron te kanganga ae I mena iai ao, n aki tuangaki, a roko ni buokai.A tibwauaia nakon tenua te kurubu bwa iai aika a na buokai n te ingabong, n te tawanou, ao n te tairiki.

A roko ni uati, ni katira, ni kuuka, ni kaitiaki, ao ni buokiia natiu ma aia bwai n reirei. Te taari temanna ae arana Rute, ae e bwabetitoaki nakon te Ekaretia inanon au tai ni wene n aoraki, e a riki bwa temanna ae ti rangi ni kina inanon mweengara. Bon te neeti Rute, e buokira n te tairiki ao ni ibuobuoki ni karaoi iiti nakon taia.

I aki tangiria ni kan titiraki ibukin bwaai nako, titita aikai a rangi ni ingainga nanoia ni buoka kainnanou ao n tararuai bwaai ni kabane. Ngkana iai riki buoka aika a na rangi ni kainnanoaki, temanna te taari e na bae n tiku irarikiu ao ni kakawarai. A karaoa aio inanon tenua te namakaina.

Taari aikai anganai te korakora, te tangira, ao te aki bwara n nano. A anga nako aia tai ao aia taarena. A karaoi anga nano ni mena ikai. A aki tangira boon mwiin aia mwakuri. A tatangira ao a ibuobuoki, ao a iriira bannan te Uea, are e reireiniira, “E koaua ae I a tuangkami, ba ngke kam karaoi baikai nakon temanna ae moan te mangori i buakoia tariu,ao kam karaoi naba nako Iu” (Mataio 25:40).

Ngke e mena kaainabau, Brandon, i Orlando, Florida, n ana mwakuri ae te tia bitineti, e uti n te bongina ma te kabuebue ae korakora ao te kangaanga ni ikeikena. E wetea te ka n aoraki bwa e na uotaki nakon te onaoraki, are e a karekea te rongorongo ikekei ae iai irouna te aoraki ae te niumoniia ae e kakaiaki.

Ibukina kai ngai ma Brandon iai natira mwaane aika rang ni uaerereke, I aki kona te mwananga n te tai ae waekoa man mweengara i Pennsylvania nako Florida. I taetae ma Brandon ni katoa bong, ma te kantaninga bwa e na waekoa ni marurung bwa e aonga ni kona ni manga okirira.

E ngae n anne, marurungin Brandon e tabe ni kekerikaki. Ngke e rangi ni kairoroai te neeti are n te onaoraki bwa N na roko n te tai ae rangi ni waekoa, I a bae ni iangoia bwa ai antai ae e nang tararuaia natira mwaane.

E kariaia tinau n anaa ana aoa ni motirawa man ana mwkuri ao n tuangai bwa e na kataia n roko inanon te tai ae waekoa, ma te kiba are E tangiria ni iria e a tia n nako imwaiin rokona. I weteia ao ni butiia raoraou tabeman ngkana a kona n ti taraiia natiu mwaane imwain rokon tinau. Raoraou temanna man te Bootaki n Aine, Jackie Olds, e taku bwa e kukurei n taraiia.

“Ti uoti aia kunnikai ma aia betake,” e taku, “ao N na katikuiia irarikiu inanon bong ake ko kainnanoia n nako iai.”

I a moanna n aki kariaia bwa bukina te taari aio, iai naba aika bon oin natina teniman, ao e rangi n tabetabe maiuna ma e bon kairoroai. Ngke I a kabwakaia natira mwaane irouna n te tai ae e aki maan rimwi riki,e karaua nanou man taku, “Tai raraoma irouiia. Tabe riki ni iangoa marurungin Brandon ao ni kaokia nakon mwengami. I a tia n tararuaiia ataei aika a uarereke mai mwaina.

I ataia ngkanne ae natira mwaane a na bon mweengaraoi, a na kukurei, ao ni bon tararuaki raoi, n aroia mai mwaina. I a kona ngkanne ni mena irarikin kaainabau, ae e bon rangi n aoraki kakaiaki n te tai are I roko iai n te onaoraki. Ma imwiin tabeua te bong, e a bon reke marurungina n okirikaki nakon mweengara.

I rangi ni kakatonga iroun raraou ae tamaroa are e tauraoi ni kaekai—n riaon are I kona n tangiria mairouna—ao ni ibuobuoki nakoira inanon te tai are ti rangi ni kainnano iai.

Te Taari Anderson, bon te marurung ni mwaane ae 35-ana ririki ni maiu ao te Beretitenti irouia Ataeinimwaane n te uoote, bon te mataniwi ae e ataeiae a bane ni bwabwaka nanoiia irouna, e a tia n oki ni mitinare, te tama nakoia niman ataei, te tia bwaibwai n te kambana teuana, ao e ataei n ana iango. Ma ngkai e a reke irouna te aoraki ae te kaentia n te rara. Imwiin karekean te rongorongo aio mairoun te bitiobi, Ryan Hill, te moan tia ibuobuoki n te kooram ni ibonga, e waekoa ni karoa te waaki, ni weteiia ibonga ake a kakaonimaki ao ake aki bati ni kakaonimaki inanon ana kooram.

“Ti na nakon te onaoraki n noora te Taari Anderson. Ti tangiringkami ni kabane. Kam kona n roko?” e kaokiokia inanon ana wewete nako.

“I aki koaua ngkana I kona n roko,” e kaeka temanna te ibonga. “Tao N na bae ni mwakuri.”

“Ngkanne ti na taningaiko ni karokoa ae ko oki ni mwakuri,” e kaeka Ryan. “Aio te bwaai ae ti riai ni bootaki ni karaoia.”

“Ngaia,” e taku kaain te kooram anne. “N na kataia n noria ni kaibibita au tei ma temanna.”

A bane ake 11 ibonga ni kawara te onaoraki. Naake aki bati ni kakaonimaki ao naake e aki kona ni bua aia taromauri n te Taabati a bane n roko ikekei Ni bootakiia ni kabane, a ngarengare ao a tang ao a tataro ao ni karaoi aia babaire ibukin taai aika a na roko. Inanon namakaina ake imwina, a bairei aia tai ni buoka te Taari Anderson ni bubui waena ngkana iai te kangaanga n aron butin te rara, ni ikairuamwi n anga rara rinanon te tai ae uoua te aoa bwa e aonga n ae e ti anganaki raraia, ao ni bon kabutia n te ka inanon 20 te maire (32 km) nakon bootaki ni mwaien te aba irouia ataein te reirei n te tairiki ma ataeinaine ake a tia ni kaoiia bwa a na nako ni mwaie ma ngaiia (ni ikotaki ma uoman ataeinaine ake tiaki kain te Ekaretia) nako rarikin ana kainiwene n te onaoraki bwa aonga n tibwauai baike a tia n rinanona n aia tai n reirei n te kauarian.

Inanon ana kabanea ni bong, te Taari Anderson e tuangiia bwa a na nako ni karaoa te mwakuri ni mitinare, ni mare n te tembora, ao ni bon karekea aia tai ni kaitibo imarenaiia. N raka iaon tebwi ma uoua te ririki imwiina, n okira mweengaia imwin aia mitinare, ni mareaki n te tembora, ao ni wakina katean oin aia utu, a bon kauringi kangaangan te tai are a bootaki ni wakini ibuobuoki n tamnei ma aia tia kairiiri ae e rangi n tatangiraki.