Tauan Wakaa aika Matoatoa

Ngke ataein te reire ngai i Russia, I wareka te karaki ae e kakamaku ae karakinaia uoman ataeinimwaane ngke a kaitibo ma te man ae te bea n te buakonikai. N ririk ake imwina, ngke I a tia n riki bwa te tia reirei, a tuangai raoraou tabeman bwa N na iria ni manangaia teuana ni rikorikoi taian taninganiba. E bon tiku mamakan te buakonikai irou, ma I kariaia n nako ma ngaiia.

N rokora n te buakonikai, I ana te mwakoro ni kai bwa I aonga n tauraoi ni kamanoai bwa rimwi I a kaitibo ma te bea. Ngai, n te itera are teuana, I kakaai taian taninganiba ake a uraura taubukiia, ngaia are I a moana kawaiu man te kawai are e kaokoro. Imwaain ae I ataia, I a tiku n ti ngai.

Inanon au tai ni kakaei, I a marannako ao ni bobukitaua. Au bwaene n taninganiba e kibarake nako eta, ma are I bon kamatoa naba au kai n taua. Ngke I a kataia n teirake, I a noria ae aontano e bokaboka mani kanimnim. E a bon roko riki maaku, ngke I ataia ae I a rokoroko inanon te kaneinei are e kanimnim! E waekoa n onrake au kau rabwa ake a mwarairai n te ran, ao I a tabe ni inako nako nano. I kataia ni kamwainga waeu, ma n onea mwin bwaranakou, I a katikatikaki riki nako nano. Ngke e a roko ni bebeu te bokaboka, e a bon taonai te maku ae korakora.

I takarua n tang nakoia raoraou, ma ti te kaeka ae I ongo e roko man kakarongoaia tenan keketi ao kungkungia biraoki. Ngke N nang moana n tang, I waekoa ni uringa tinau. N tabo ake e rootaki iai n te angibuaka, e tataro. E aki toki ni kaoai bwa ti na tataro, ma I bon rarawa n taainako, ao ni kaeka, “Akea te Atua.”

Man te kaneinei are e bokaboka mani kanimnim e na bae ni waekoa n riki bwa ruanimateu, bon akea riki te bwai ae I kona ni karaoia bwa ti te tataro ao ni wewete rake nakon te Atua ibukin buokau. “Ngkana Ko maiu, taiaoka buokai!” I tang.

N te tai naba ae e rangi ni waekoa I ongo te bwana ae akoi man tuangai, “Kakoaua ao tai maaku. Katika waakan te kai ane e matoatoa anne.”

Ngke I taratara nako, I noora waakan te kai ae bubura irarikiu. Ni kabongan au kai, I a kona ni kamatoai n tine nako aona. Iai te bwai teuana ae e anganai te korakora ni butairake mani kaotinakoai man te kaneinei ae e bokaboka ao ni kanimnim.

N rabunaki n te bokaboka, I bwaka nako aontano ao ni karabwa te Atua ibukin kaekaan au tataro. I a kakoaua ngkai ae E maiu. I a tia n namakina Ana iraorao ao n ongo Bwanaana, ao E a tia naba n anganai te korakora ni kamaiuai.

E aki maan te tai imwina, ngke a reireinai mitinare ake a bwanin aia tai ae te Burabeti Iotebwa Timiti e a tia naba ni karekea te kaeka nakon ana tataro n te Buakonikai ae Tabu, I rangi ni kakoauaia. N tokina, E a tia te Atua ni kaeka au taaro n te buakonikai. I tine nako aon waakan te euangkerio ae e matoatoa, man ni waekoa ni bwabetitoaki imwina ao ni ibuobuoki n te tai aei n te Gyumri Mwaanga i Armenia.

I ataia ae Tamara are i Karawa e tangiria Natina ni kabane, ao I rangi kakaitau n riki bwa kaain Ana Ekaretia Iesu Kristo ibukiia Aika Itiaki ni Boong aika Kaitira. I rangi ni kakaitau naba ibukin mwaitin kakabwaia riki ake I a tia ni karekei mairoun Tamara are i Karawa, ai moara riki ibukin Ana kaeka nakon te tataro ni kaitara te tai inanon te buakonikai n ririki aika a bwakanako.