Bunin te take ae Buretireti ke te Swan ae Tamaroa man Kakateke? E Bon Nakoim!

Ngke te tei ngai, I uringa tinau ngke e wareka nakoiu karakinan “The Ugly Duckling,” iroun Hans Christian Andersen.Tao bukina ngke I mama ao I namakina ae I aki tangiria ni kairaki irouia rorou, ma te ururing ao te nano ibukin te karaki arei e aki toki n titiku irou.

N te kibu ae I ururingnga, te tina n take e rangi ni ingainga nanona n tataningaa rauren ana bunnimoa nakon taian buntake aika uarereke. Inanon te tai ae maan, tenan buraerae, ni baabobo n buntake aika uarereke a kaotirake nako matan te tina n take ma te kakatonga. E ngae n anne, iai teuana te bunnimoa ae bubura riki are e tuai man raure. Te tina n take ma bunna a tataninga ao ni mataku. Ngke e a tabe n raurenako te bunnimoa arei,tenan baabobo ni buntake akekei a nora kaain aia utu ae bou aio ae rangi n tara ni kaokoro. A katobibia ao a taku nakon tinaia ma tamaia, “E aki katotongiira. E buretireti.” A katikua n ti ngaia inanon te ngao ao a uaua nako. Te buntake are e buretireti e a kitana te ngao ao ni kataia ni karaba. Ni katoa temanna are e kaitibo ma ngaia a bane n aki iraorao ao ni kukurei. E a bon iango irouna man taku. “Ni kabane a bane n ribai bwa tao bukina ngkai I buretireti.”

Ao ngkanne e a riki te kamimi nakon maiuna. E a noria tabeman riki aika a tara ao ni karaoi aro aika titebo ma aron are e karaoia! E a iraorao ma ngaiia ao a kairia nakon tinaia man taku, “Tinara, Tinara, ti a kunea tarira ae e uarereke! E kona n tiku irarikira n aki toki?” Te tina n tiuaon ae tamaroa man kakateke e mwaneia n rabwatia ni baina ni kiba aika a mainaina ao n taku nakoina n te bwana ae e maraara, “Ai tiaki te buntake ngkoe ! Ai te tiuaon ae uarereke ngkoe, ao n te bongina ko na riki bwa te uea n te nei aio.”

I rangi n tatangiria n ongo te karaki aio ngke te tei ngai. I aki ataia ae taian reirei ake I reiakini ma iai e na buokai inanon au kanganga n au ririki n ataeinimwaane. I bwabetitoaki bwa temanna kain te Ekaretia ngke e a koro waniua au ririki ni maiu, ma au utu a rikirake n riki bwa naake aki bati ni kakaonimaki.

N te taun ae uarereke i Idaho te tabo ae I rikirake iai, iai te tabo ni kaoti tamnei ae e kaotaki iai te kaotiotio n te bwakantaai ni katoa Kaonobong koraki. I aki toki n nanako iai ma raoraou aika temanna ke uoman. Te tabo ni kaoti tamnei e na kaota tamnei aika a kimototo ibukin te takakaro ao teuana ibukin bwaai aika a riki n te aonaaba ni katoa bong. Te tamnei raoi ae e aki toki n otioti tamnein te mwaane are e mwamwanga iaon te aoti mani baiti ni kati ao re rangi ni kakamataku

N te Kaonobong teuana inanon taain te motirawa teutana, temanna te tia mwakuri e kaotinakoa tewana te bwatika ae 10 kiiana. E uraura karana, e rangi n tamaroa, ao a na angan te aomata n te tabo ni kamataku anne are e reke irouna te tiketi ni katekeraoi!. O, I rangi n tangira te bwatika arei!

Te tia katanoata e karina baina inanon te baoki ao ni kaotinakoa te tiketi. Ngke e tabe ni wareka te nambwa are iaon te tiketi, I a kunea bwa ngaia e a reke irou te tiketi ni katekeraoi. I aki kakamwakuri ao n taekina te bwai teuana. I rangi ni mama ao ni bainrang. Akea korakorau ae tau irou n teirake ao ni kaotia nakoia ni bane bwa a na ataia ae e reke irou te tiketi ni katekeraoi. E a manga katanoataki riki uoua te tai te nambwa are e tekeraoi, ao ni katoa tai I taua rikaki te tiketi bwa e aonga n aki noraki. N tokina, te tia katanoata e a manga wareka te nambwa riki teuana. Temanna maibuakoia raoraou ake I roko ma ngaiia nakon te tamnei iai irouna te nambwa ae bou. E kibarake, e takarua, ao e biri nakon te tabo are e oti te tamnei iai n anaa ana bwatika. Te bwatika arei e na bon au bwai.!

Ngke I okira mweengau n ti ngai man te tamnei n te Kaonobong arei, I iangoa te karaki are karakinan te buntake are e buretireti. I namakinna ae ai bon titebo ngai ma te tiuaon are e uarereke arei. I namakina ae I a tiotio nako ni katobibi inanon te buakonikai ni kataia ni karabai ao bwa akea temanna ae tangirai. I aki ataia bwa antai ngai ke N na riki bwa tera. N te tai are I roko iai ni mwengau, I ataia ae e na riai ni bitaki. I a uringa iangoakina. “E a roko te tai ni ikawai. E na aki manga riki aio nakoiu.

I moanna ni kunea bwa ngaia iai riki tabeman irarikiu aika a tangirai ao a tabeakinai. Kain te bitiobiriki n au uoote iai nanona irou, ao ai aron naba ma au beretitenti n te titeiki, ae e maeka i nano riki n te kawai are I maeka iai. A reireinai te euangkerio. A kaota aia koaua nakoiu ibukin koauan te Tia Kamaiu ao Ana Mwakuri ni Kamaiu ae e kakawaki ao tera ae e kona ni karaoia ibukiu. A wareware ni kaokioka karakinan Iotebwa Timiti ao miina ni burabeti n te Buakonikai ae Tabu. Man te rabakau ane e reke anne I a tia ni karikirakea te anua ae moan te kamimi ni warekan Iotebwa Timiti—Rongorongona ni katoa wiiki. Ni karaoan aio, I ataia ae I a kona ni karekea irou te korakora ni kaitarai bwaai ni bane ake a kaweneaki imatau n te wiiki anne.

N te tai anne inanon maiu, ngkana I rangi kainnanoa temanna, Tamau are i Karawa e na kakabwaiai. E atai bwa antai Ngai, ao E kanakoaAna taan beku ni buokai bwa N na kunea anne i bon irou. A anganai te namakin ae I tangiraki ao ni boutokaki ao n tuangai man aia mwakuri ae ai tiaki Ngai te buntake ae e buretireti ma ngkana I kakororaoai ao ni kawakina ana tua te Atua, N na kona n riki bwa “uean te nei.” Te kakabwaia ao te kamataata ibukin te Mwakuri ni Kamaiu e anganai riki kakorakorau ao kamatoatoan nanou.

Ngke I a roko n te ririki ae16, aomata aika a tamaroa aikai a kaungaai ni karekea ana kakabwaia te tamaniuea. Ngke I a karekea te kariaia, I tokara au bwatika ao ni buti inanon tabeua te maire nakon mwengan te tamaniuea. E kabwarabwara raoi te kakabwaia mairoun te tamaniuea ao e na kanga ni kakabwaia maiu. E katoka baina iaon atuu. Imwiin atakin anne, maiu ai tiaki arona ngkoa.

I kariaia ana wewete te mition n nako Scotland ao e reke irou te namakin ae e rangi n tamaroa. Tabeua te wiiki imwina I a okira mweengau, I kaitibo ma kainabau n te tai ae na roko ni bootakin te Ekaretia. Ti maroro ni kareke tangira, ao I a tuangnga ae I kan mare ma ngaia. Ti a mareaki n te tembora are i Salt Lake

Teuana te kibuntaeka inanon te kakabwaia mairoun te tamaniuea e taekinaki ae N na kariaiakaki ni maeka ni mamate ma te anera. N te tai anne te tamaniuea e anganai te kakabwaia anne, I aki ataia bwa tera te anera, ao man aki katuka nanon te mwakoro n taeka aei. Ngke I kitana te tembora te bong are ngai ma kainabau ti a tia ni kabaeaki, I a ata are e kananonaaki. E riki kainabau bwa te anera are e taekinaki ni kakabwaiau ibukina bwa e a tia ni kaona maiu n te ota. Te kakaitau nakoina, I a tia ni kariaiakaki ni maeka n otan te otabwaninin. E a tia ni uota te kukurei ao te kakatonga nakoia 8 natira, 25 tibura ao 2 tibutorura. A teirake natiu ao atongnga ae raoiroi. I angan te Atua te kakaitau ibukin te kakabwaia n te euangkerio ao te kakabwaia ae akea tokina ibukin tuan ao otenantin te tembora ae mimitong.

Tatan e kariaia ae ti kakoaua ae ngaira tenan buntake ake a buretireti ma n aki reke ara tai n riki bwa katotongan Tamara are i Karawa ao Natina are E mimitong. I kaota au koaua bwa te Atua e tangirira n tatabemanira nako n anga aika a kakaokoro. Ngke Elder Neal? A. Maxwell (1926–2004) n te Kooram n Abotoro ake Tengaun ma Uoman e aki toki n taku, “Rekereken te Atua ni buokira n riki bwa ngaira E tangirira ni kuneaki inanon kabwarabwaran maiura ae uarereke.”¹ Ngaira bon Natina. I a moanna n ataia ae ti kona n teimatoa n raoiroi riki nakoia aomata are a kantaningaia mairoura n ara otabaninin ma bwaina aika ngkai ao n riki bwa “uea mwaane ao uea aine n te nei” man iriirakin tuan te euangkerio.

I ata te bwai teuana riki. I ataia ae antai ngkoe ao ko roko mai ia. Taian kaotioti a kauringira ibukin ara kakaonimaki inaon te maiu are aki mamate (tara Te Kaotioti 12:7–11; D&C 138:56; Aberaam 3:22–23). Ngkana ti kabaei ara kakoaua nakon te koaua ae korakora, e na rikirake te kakabwaia ae kamimi ni katoa bong ibukira n tatabemanira nako.

Teimatoa ni kakaonimaki ao n ongeaba nakon te Uea. Ngkana E kona n tararua, te tenimwaane ae e mama n ai arou, E na bon tararuaiko ngkai ao n taai aika a na roko. Ngkoe natin te Atua ae te mwane ke te aine ae ko a tia n rineaki. Rineia bwa ko na maiuakina am konabwai ae mairoun te Atua aika a wene inanom.