I Berita ma Tamau are i Karawa

Ngke teniua ana ririki Yukari, ana reirei neiei e anga te miriki ma te koobee inanona. Ibukina bwa tinan Yukari e a tia n reireina neiei Tuan te Mauri, Yukari e na bon aki nima te koobee ae mirikinaki. Neiei e na kanoa ana mangko n te ran man nimma n onea mwina.

N te bong teuana e taku Yukari nakon tinana, “I kan nima te koobee ae mirikinaki n aroia aomata ni kabane.” E a tekateka tinan neiei ma ngaia mani buokia ni kamataata neiei bwa Tamana are i Karawa e tangira neiei, bwa E aki tangira neiei bwa e na moi n te koobee, ao anne bon te tua. Man te bong anne, e a bon taraia raoi Yukari bwa e na bon aki nima te koobee. E a nako teuana tabun te ririki.

Teuana te bong ngke ana tia reirei Yukari e aki kona ni mena ikekei, e a roko temanna te tia reirei nakon te kiraati. E teimatoa naba, Yukari ni bon moi ran. E noora aei te tia reirei man titiraki, “E aera ngkai ko a moi ran?” E kamataata Yukari bwa e kakaea te taromauri ao e a tia neiei ni berita ma Tamana are i Karawa bwa e na aki nima te koobee. E bon kukurei te tia reirei. Man te tai anne, te reirei e katoka te anga te miriki ae koobenaki man anga aekaki ni mooi riki ake tabeua.