Te Kakai ae te Tortilla

Uoman ataeinimwaane a kunnikainia n te mainaina man neketai a roko nakon mweengara i Honduras. A taku “Ngaira man Ana Ekaretia Iesu Kristo ibukia Aomata aika Itiaki ni Boong aika Kaitira.

E butimwaaia mama mani karinia. A reireinaki ara utu irouia mitinare taekan ana euangkerio Iesu Kristo. E ngae ngke ai tiba ruaiwa au ririki, Te Tamnei e kaota koauan aia taeka nakoiu

“Tera te bwai ae ti riai ni karaoia bwa tina riki bwa kaain ana Ekaretia Kristo?” e titiraki Papa.

“Ko na bwabetitoaki,” e taku te unimwaane are temanna.

Mama, Papa, ao Ngai ti a bon bwabetitoaki teuana namakaina imwina. Tariu, Tomas, are bon onoua ana ririki ni maiu, e na bwabetitoaki inanon uoua te riki ririki.

Inanon aia tai n reireinira riki taekan te euangkerio, a kamataata unimwaane aroia taian utu ni kona ni ikotaki mani kabaeaki inanon te tembora.

Te kabanea ni kaan n tembora e bon mena i Guatemala, mwaitira riki te kiromiita raroana. Ti na riai ni kabooa uoua te bong te kantoka n te bwati ao uoua te tairiki ni matu n te kaawa ae bubura. Akea ara mwane ibukin te aekaki ni mwananga aei, ma Mama ao Papa aki kariaia bwa aei e na katoka kaean te tembora iroura.

Ni katoa ririki ara utu a unika te koon. Ti kabonganai ni karaoi tortillas ni kaboonakoi nakoia taan neweaba ake a rinanon nanon ara kaawa.

E kaotinakoa te beebwa ao te bentira Mama. E ikoti tabeua waare man taku, “Ti riai ni kaboonakoi 2,500 tortilla ni kakoroa boon mwanangara.”

A takaneaua matau. A bon rangi ni koro mwaitin te tortillas akanne! “Ti tuai mani kaboonakoi aekaki ni mwaitin te tortilla anne,” I taku.

Mama e aki tara n raraoma. E taku neiei “E na katauraoia te Uea,”. “Raoul, ngke ao Tomas kam na buoka ami papa n taia te koon,” e tuangai Mama.

Tomas ao Ngai ti buoka Papa n taia te koon. Ni katoa bong, Mama e kamantia, ni karaoa te toonati, mani baania. Tomas ao Ngai ti uoti tortilla nakon te kaawa.

“Tewaana te bwati ae onrake irouia taan neweaba e roko n te bong aei,” I tuanga Mama ngke ti okira mweengara n te moan bong. “Ti kaboonakoi tortilla aika mwaiti.”

“Bon te kakai,” e taku Mama.

Ti kabooinako riki tortilla ni katoa bong. Inanon ti tabeua namakaina ao ti a tia ni kawakina te mwaiti ni mwane are ti kainnanoia ni karaoan te mwananga nako Guatemala. Ma I bon teimatoa n raraoma. I a tia n ongo karaki ni kaineti ma taan ira ake a katei bwaati ake a ribuakon te buakonikai. Man anai aia bwai bwatintia ake a kakawaki.

“Tera aroia taan ira?” I titiraki.

“E na kamanoira te Uea,” e taku Mama. Imwina e titiraki, “Raoul, ko kakoaua te euangkeri?”

“Eng.”

“Ngkanne ko ataia ae ti riai ni kabanea korakorara n ira te Uea ao Ana burabeti.”

Teuana te ririki imwin bwabetitoakira, e a tauraoi au utu ni karaoa te mwananga nakon te tembora. Ti toka nakon te kaawa ae bubura ae Guatemala n te bwati. I aki kona ni mwaninga te Tamnei ae I namakinna ngke e a I kotaki ni kabaeaki au utu ibukin te maiu aei ao ae akea tokina.

N te tairiki arei, ngke I tabe ni katorobubua n tataro, I kaitaua Tamau are i Karawa ibukin kakabwaia n te tembora. ●