Materaoin te Tataninga

Ngke I rin n te Buenos Aires Argentina Temple ma kaain te roronrikirake n ara uoote bwa ti na karaoa te bwabetito ibukiia maate, ti tataninga teutana n te ru n tataninga. Imwiina e roko te tia mwakuri n te tembora man tuangiira bwa ti na nakon te tabo n tataninga are iai kaintekateka iai man tataninga riki ikekei.

Bukina bwa te Kaonobong, angiia aomata a tia n nakon te tembora man taabo ni kabane iaon Argentina. Ti tataninga ikekei inanon te maan ae uoua ma te iterana te aua, n tataninga n akea te karongoa. Iangoa tabeua aika aki rangin ni kakukurei a roko n au iango: “A kanga ni katikuira n tataninga n te maan aei? I a kua, ao e raoiroi riki ngke arona bwa I aki roko, bukina bwa bon te kabane tai.”

I teirake ao I moanna n nakon te tabo n tataninga. E aki maan ao e roko te tia mwakuri ao e taku: “Aomata aika kairake, taiaoka n taotaona nanomi. I ataia bwa kamwa tia n tataninga n te tai ae maan, ma kam ata te bwai ae riki? N te aba n tamnei ao mirion aomata aika a tia n tataninga ibukin te tai aei inanon tienture aika mwaiti, ao I kakoaua nakoimi bwa a tia n rangin n ingainga ibukin aia tai. Taari a karaoa te bwabetito ao te kamatoa, ao aikoa kona ni karaoa ae raka riki nakon ae a karaoia.”

Ngke e atong taeka aikai, ao e rootai te mama. I ataia bwa I a tia n aki iraorao bukina bwa I a tia n aki anga te tai nakoia aomata ake a tia n tataninga inanon ririki aika maan ao aki reke aia tai n ongoraea taekan te Ekaretia ae koaua man bwabetitoaki nako iai n te aonaaba.

E a manga otinako riki te tia mwakuri, ao e a moanna ni wetei aara man ara uoote. E anganiira te titita kunnikai aika mainaina ae a aki roko raoi tauia. Imwiin are ti kunnikaiaki, e katikirikaaki irara ao e kabaei n te kunnikai ae mainaina.

Ti kanakoi ara kau ao ti a nakonako nakon te tabo n tekateka n te tabo ni bwabetito. Rabunan aontano e rangin n rietata ae ti tebo ma ti aki nakonako iaon tano.

Ngke e a roko n au tai, e rotai te nako n nano kanga ti tebo ma ngke i moan bwabetitoaki. Ma a rangin n tamaroa taan mwakuri bwa e rangin n korakora aia taotaonaki n nano nakoira n tatabemaniira nako man namakina te kukurei.

Ngke I a otinako man te nei ni bwabetito, temanna te titita e tataningaai ma te taara ae mainaina ae bubura ma te moangare ae korakora. I bita au kunnikai man nakon te ru are I a kamatoaaki iai. Te titita naba are e anganai te taara e irai man kaitauai ibukin nanou ni karaoa ana mwakuri te Uea.

Ngke I kitana te tembora, I namakinna bwa e a tia n riki bwa te bwai ae moan te kakawaki ae riki inanon maiu. Te tembora bon te tabo ae tabu ae iai Tamnein te Uea iai, are e kaira Ana mwakuri ae moan te kakawaki. E materaoi aron te tataninga.