“Inanon au utu boni Ngai te kabanea ni uarereke ni maitin te ririki. I aki toki ni kakatukaki irouia kain au utu n aia waaki ni kakukurei ao aia marooro. Tera ae I kona ni karaoia ni kanakoraoa ara reitaki?”

Inanon au utu, Ngai naba te kabanea ni uarereke ni mwaitin te ririki, ma te bwai ae I kunea bwa kaain au utu a tangiria ni kan kinai n aron ae I rangi n tangiria ni kan kinaia naba. Kaain am utu a na rangi ni ingainga nanoia ngkana ko tareboniia ni kaotia ae ko ti kan taetae ma ngaiia, ke ko kaoiia bwa kam na nako ni katawanou n te taina. Tuangiia bwaai aika a riki inanon maium. E na rangi ni manena nakoiia ae ko namakina te rau ae tau n tibwaua am iango ao am namakin ma ngaiia. Maroro naba ma ngaiia atuun rongorongo aika a na karina te tamnei. E na buokiko riki ni kaaniko tiaki ti nakoia ma nakon naba Tamam are i Karawa.

I a tia naba n rinanon te aeka ni waaki ae e kangaanga aio. I taku bwa te bwai ae tamaroa ae ti kona ni karaoia bon te riki bwa te banna ni katoto nakoia tarira ma mwanera. N te aro aio, te tangira ao te rau e na kona ni maeka ibuakora. Ti na riai n tuangiia bwa ti rangi n tangiriia, ti na riai ni kataia ni katiteuanaki n ai aron te utu. Ni waekoa ke rimwi riki a na ataia ae ti rangi n tangiriia. I ataia ae bwaai aikai a na mwakuri teutana imwin teutana.

E bon kanganga n tabetai kabaneakin te tai ma tarira ao mwanera ake a ikawai riki ibukina bwa are te reirei ao tabeua waaki ni katoa bong. Ma ngkana ko kona, n ti nako ni maroro ma ngaiia, kaongoraia aron am bong, ao taraia bwa auara ni kabane. Ngkana iai am kanganga n te bwai teuana, ko kona ni butia ibukin aia iango bwa aonga n ataia ae ko karinea aia iango. Buokiia n aron ae ko tangiriia naba bwa a na buokiko. Kam kona n takakaro ao ni kabanea ami tai ni bootaki—e na rangi ni ibuobuoki. Ko riai naba n tuangiia ae ko rangi n tangiriia. Ma te bwai ae rangi ni kakawaki, tataro, Tamam are i Karawa e na bon buobuokiko.

Kai ngai te kabanea ni uarereke man au utu, n tabetai I namakina katutukau man aia waaki ni kakukurei ao ni maroro ma kaain au utu, ao e rangi ni kammaraki nakoiu. Ma ngkana I iangoa Iesu Kristo, I a ataia ae man tibwauaan kantaninga aika tatangiraki ma au utu, ti kona ni kakorakoraira ao ni kaungaira n tatabemanira nako. Buokia ni kabane ma te akoi ao te kororaoi. Kaota ae mamate nanom irouiia, ao kaotia bwa a na ataia ae ko tabeakiniia.

N taitabetai I namakina mwanuokinau ibukina bwa tariu boni iai oin aia waki ni kakukurei, n aron are a karaoia naba au kaaro. Inanon taai aika a tia n nako, I a moanna n ataia ae a bane n tangirai ao ae tiaki are a rawa ni kabanea aia tai ma ngai ma are bon iai tain bwaai ni kabane. E rangi ni kakawaki bwa ko na kukurei n auan te tai are ko kona n tiku iai ma ngaiia, ni ngarengare, n akoia, ni mannanoia, ao iaon bwaai nako ni kaota am tangira nakoia. E rangi ni kakawaki naba ibukim bwa ko na tataro ao ni butia Tamara bwa e na buokira ni kaanira riki nakoia tarira ao mwanera. E na bon ongo iroum ao ni buokiko.

Bon te kabanea ni uarereke ngai maibuakoia ataei aika itiman. Ngke I uarereke riki, I namakina katinanikuau, ma I a ataia ae a bon tangirai riki, nakon are I kantaningaia. Tao ko na aki kona ni kairekerekeko nakoiia n te tai aio, ma te kabanea n tamaroa n tai are I karekea ma kaain au utu n ara mamaroro. I ataia ae a rangi ni kakoauai ao ai bon arona naba ngkai. N te aro ae N na mamaroro ma ngaiia, N na riai ni buokiia n aia beku, n akoi nakoia, kakea te unun irouiia, ao ni uaia ni ibuobuoki ma ngaiia nakon te kouru ae titebo bwa aonga ni buokai. Anne ae e buokai n namakina ae I mwannanoaki ao n tangiraki.