“Paano ko mapaglalabanan ang tukso?”

Para mapaglabanan ang tukso, kailangan muna nating loobin at taos na hangaring piliin ang tama. Malaking tulong sa akin kung iisipin ko muna ang isang sitwasyon bago pa man ito mangyari at pipiliin ko ang tama kapag nangyari iyon. Ang isa pang bagay na nakakatulong sa akin ay ang panalangin. Kung mananalangin tayo na mabigyan ng lakas, hahangarin nating mapangalagaan tayo sa espirituwal, at pipiliin nating mabuti kung saan tayo gugugol ng oras, maaari nating makasama palagi ang Espiritu Santo na siya ring magbibigay sa atin ng babala.

Palagay ko sa pagbabasa ng mga banal na kasulatan araw-araw, pagdarasal, pagpipigil sa sarili, at pagsunod sa mga salita ng propeta, malalabanan natin ang tukso. Ang paglaban sa tukso ay nagpapalakas sa iyong pananampalataya at nagpapakita ng iyong pangako sa Ama sa Langit na susundin mo ang mga tipang ginawa mo. Ang pagkakaroon ng mga kaibigan sa Simbahan ay makakatulong din sa atin dahil masusuportahan natin ang isa’t isa. Kailangan ng lakas ng loob na magsabi ng hindi. Tandaan, “Hindi tayo binigyan ng Dios ng espiritu ng katakutan; kundi ng kapangyarihan at ng pag-ibig at ng kahusayan” (II Kay Timoteo 1:7). Kapag pinaglalabanan natin ang tukso, napapalapit tayo kay Jesucristo at sa ating Ama sa Langit.

Noong high school ako, marami sa mga kaklase ko ang nagyayaya sa aking uminom ng alak at manood ng pornograpiya. Lagi akong tumatanggi dahil ginagawa ko ang nais ipagawa sa akin ng Tagapagligtas. Inaalala ko Siya at tinutupad ang aking mga tipan. Kung minsan hindi na ako niyaya at tinutukso ng mga kaibigan at kaklase ko dahil alam na nila ang relihiyon ko. Ang pagbabahagi ng ating mga paniniwala at patotoo sa iba—lalo na sa mga kaibigan, kaklase, kapitbahay, at pamilya—ay magpapabawas ng mga tukso sa ating paligid. Alam ko na sa pamumuhay ng ebanghelyo, mapaglalabanan natin ang mga tukso sa ating buhay.

Nalaman ko na kapag dumarating ang tukso, sinisikap ng Espiritu Santo na magbabala sa akin na piliin ang tama. Gawin ang mga bagay—tulad ng pagdarasal at pagbabasa ng iyong mga banal na kasulatan—na magpapanatili ng Espiritu sa iyo at iwasan ang lugar kung saan hindi makaparoroon ang Espiritu Santo.

Laging sinasabi ng kuya ko sa akin na “tumayo sa mga banal na lugar.” Nalaman ko na ang ibig sabihin nito ay pumunta ka kung saan hindi laganap ang tukso o di gaanong matindi. Sabi ng stake president ko, “Hindi lamang labanan ang tukso—iwasan ang tukso.” May pagkakataong kailangan mong labanan ang tukso, pero mas madaling ipamuhay ang ebanghelyo kapag walang tuksong naroon para tuksuhin ka.

Ang kaloob na Espiritu Santo ay tumutulong sa atin na makita ang kaibhan ng mabuti at masama at tumutulong sa atin na matanto na tinutukso tayo. Dapat nating tandaan na ang mga tukso ay pagsubok na tutulong sa ating malaman kung tama ang ating ginagawa at kung mali, at dapat nating malaman na kung susundin natin ang Panginoon, hindi Niya tayo hahayaang matukso nang higit sa kaya nating paglabanan (tingnan sa I Mga Taga Corinto 10:13). Lagi nating maipapasiyang piliin kung ano ang tamang landas sa halip na ang mali.

Palagay ko mahalagang ihanda na sa isip ko nang maaga ang mga pagpiling gagawin ko. Hindi ko inasahan na mahaharap ako sa mahirap na sitwasyon, at maganda ang kinalabasan dahil naipasiya ko na sa isip ko na hindi ko ibababa ang aking mga pamantayan. Kahit kung minsan ay asiwa ako, gumagawa ng pagsasadula ang pamilya ko para alam ko kung ano ang sasabihin o gagawin kapag naharap sa mga tukso.

Ang pagkakaroon ng mabubuting kaibigan na pumipili ng tama ay isang bagay na magagawa mo para labanan ang tukso. Nagpapakita sila ng mabuting halimbawa. Matatawagan mo sila kapag natutukso ka. Tutulungan ka nilang piliin ang tama. Maipapaalala sa iyo ng mabubuting kaibigan na manalangin, magbasa ng mga banal na kasulatan, at sumunod.