Nagkamaayong Mobasa Matag Adlaw
Ang mga tagsulat nagpuyo sa Utah, USA, ug Bolivia.
Si Joseph mipakli sa pahina sa iyang basahon. Siya nagmug-ot. Siya adunay duha pa ka mga pahina nga tiwason.
“Ok ra ka?” Si mama nangutana.
“Ganahan ko nga mobasa,” miingon si Joseph. “Apan hinay kaayo ko. Unsaon nako nga makat-on sa pagbasa nga mas maayo?”
“Ako adunay ideya,” miingon si Mama. “Pagbasa og usa ka kapitulo sa Basahon ni Mormon matag adlaw. Kini makatabang kanimo nga makat-on sa pagbasa og mas maayo.”
Naningkamot si Joseph. Sa sinugdanan, dugay niya kining nakuha. Kinahanglan niyang litukon ang mga tag-as nga mga pulong. Apan nagpadayon siya sa pagbasa sa matag adlaw. Sa wala madugay makabasa na siya og sobra sa usa ka kapitulo.
Duha ka semana ang milabay. Ang bookmark ni Joseph nabalhin na gikan sa 1 Nephi ngadto sa 2 Nephi. Dayon anaa na kini sa basahon ni Jacob!
Usa ka gabii turno na ni Joseph sa paghatag og leksyon sa family home evening.
“Kahibalo ko kon unsay buhaton!” Naghunahuna si Joseph. Iyang nakit-an ang Mga Sugilanon sa Basahon ni Mormon nga basahon. Aduna kini mga pulong ug mga litrato. Iyang gipakli ang mga pahina hangtud nga iyang nakaplagan ang hingpit nga istorya.
Si Joseph mibasa sa istorya ngadto sa iyang pamilya. Siya mibasa sa mubo nga mga pulong, sama sa barko. Siya mibasa og taas nga mga pulong, sama sa misugo. Ang mga Propeta misulat niini nga mga pulong sa dugay nang panahon. Ang mga pulong sayon ra basahon.
Sa dihang natapos na ang istorya, si Mama adunay mga luha sa iyang mga mata.
“Ok ra ka, Ma?” Nangutana si Joseph.
“Oo,” miingon si Mama. “Nalipay ko. Nagkugi ka og maayo.”
Si Joseph mipahiyum og dako.
“Nagbasa ko matag adlaw, sumala sa imong gisulti.” Siya mipakita ni Mama sa iyang Basahon ni Mormon. Ang iyang bookmark diha na sa basahon ni Alma!
Moabut ang adlaw nga ang bookmark ni Joseph moabut na sa katapusan sa basahon. Ug dayon siya mahimong magsugod na usab!